ပေႃးဢွၵ်ႇဝႃႇသႃယဝ်ႉၸိုင် ၵူၼ်းမိူင်းတူၼ် တေဢွၼ်ၵၼ်ႁၢင်ႈႁႅၼ်း တႃႇၽုၵ်ႇသွမ်ႈၽၵ်းမီႇႁေႃ ၵၼ်ယဝ်ႉ။ ပီၼႆႉ ယွၼ်ႉၼမ်ႉလုပ်ႇထူမ်ႈတူင်ႈၼႃးႁၢဝ်ႈႁႅင်း ၶီႈၵူမ်ႇၶီႈသၢႆး လႆထူမ်ႈတဵမ်ဝႆႉမူတ်းလႄႈ မိူၼ်ၼင်ႇ တေးၼႃး၊ လွၵ်းၼႃး ၸိူဝ်းၼႆႉ ပေႃးၸူမ်ႁၢႆၵႂႃႇၸွမ်း ၶီႈၵူမ်ႇသၢႆး ၵမ်ႈၼမ်ယဝ်ႉ။

ယွၼ်ႉၼၼ် ၶဝ်ႈၼႂ်းၼႃးဢၼ်ၽုၵ်ႇဝႆႉ ၸိူဝ်းၼၼ်ႉၵေႃႈ မၢင်တီႈယင်းဢမ်ႇလႆႈသင်။ မၢင်ၸိူဝ်း တႃႇလုမ်းလႃးၼႃး ၸဝ်ႈၵဝ်ႇ ဢမ်ႇမီးငိုၼ်းတိုၼ်းလႄႈ လႆႈၶၢႆၸိူဝ်ႉၽၵ်းမီႇ ဢၼ်မီးဝႆႉ ၸိူဝ်းၼၼ်ႉသေ လုမ်းလႃးၼႃး။ ၵွပ်ႈၼႆ ၸိူဝ်ႉ ၽၵ်းမီႇ တႃႇတေၽုၵ်ႇသွမ်ႇ ပေႃးဢမ်ႇၶႂ်ႈၵိုတ်းသင်ယဝ်ႉ ဝႃႈၼႆ။

ပေႃးထိုင် လိူၼ်ဢွၵ်ႊထူဝ်ႊပိူဝ်ႊ – လိူၼ်ၼူဝ်ႊဝႅမ်ႊပိူဝ်ႊ မႃးၵူႈပီၸိုင် ၵူၼ်းမိူင်းတူၼ် ၵမ်ႈၼမ် ႁၢင်ႈႁႅၼ်းဝႆႉ မိူၼ်ၼင်ႇ ၵွၵ်းပိူၵ်ႇ၊ လေႃႉၵိပ်ႇ ၸိူဝ်းၽၵ်းမီႇႁေႃ မၼ်းဝႆႉမူတ်းယဝ်ႉ ဝႃႈၼႆ။

မၢင်ႁိူၼ်း ၸိူဝ်းၵူၼ်းႁိူၼ်းၼမ်တႄႉ ဢမ်ႇလူဝ်ႇၸၢင်ႈၽႂ် ႁဵတ်းႁင်းၵူၺ်းဢဝ်။ ၸိူဝ်းႁႅင်းၵူၼ်းဢေႇတႄႉ ၵႃႈလႆႈၸၢင်ႈၵူၼ်းႁဵတ်းၸွႆႈ။ လွင်ႈၵွၵ်းပိူၵ်ႇ၊ လေႃႉၵိပ်ႇ ၸိူဝ်ႉၽၵ်းမီႇႁေႃၼႆႉ မိူဝ်ႈဝၢၼ်ႈမိူင်း တိုၵ်ႉၼိမ်ၼၼ်ႉ လႆႈၸၢင်ႈၼိုင်ႈပေႇလႂ် 500 ပျႃး။ ယၢမ်းလဵဝ် လႆႈပၼ် 1,000 ပျႃး ဝႃႈၼႆ။

ပွတ်းတၢင်းမိူင်းတူၼ်ၼႆႉ ၵမ်ႈၼမ် တေၽုၵ်ႇၶဝ်ႈၼႃးလႄႈ ၽၵ်းမီႇႁေႃ ပဵၼ်ပိူင်ယႂ်ႇ။ ပေႃးပၢတ်ႇၶဝ်ႈယဝ်ႉ ၸပ်းမႅၼ်ႈၶၢဝ်းသွမ်ႈၽၵ်းမီႇၵမ်းလဵဝ်။ ၵၢၼ်ၽုၵ်ႇၶဝ်ႈလႄႈ ၽုၵ်ႇၽၵ်းမီႇၼႆႉ မီးလွင်ႈၵမ်ႉယၼ်ၵၼ် ယွၼ်ႉဝႃႈ ဝၢႆးပၢတ်ႇၶဝ်ႈယဝ်ႉ တေလႆႈၽိူင်း တႃႇႁူမ်ႇၽၵ်းမီႇႁေႃ။

ပီၼႆႉတႄႉ ယွၼ်ႉၶဝ်ႈၼႃးၵေႃႈ ဢမ်ႇပဵၼ်ၵၢၼ်လႄႈ ဢမ်ႇမီးၽိူင်းတႃႇႁူမ်ႇတိူၵ်ႇၽၵ်းမီႇႁေႃ။ ပေႃးလႆႈလႄႇႁႃပၢတ်ႇၶႃးသႂ်ႇ ၶႃးသမ်ႉ တေလႆႈမႃးတၢၵ်ႇလႅတ်ႇႁႅင်ႈယဝ်ႉ တႃႇႁူမ်ႈတိူၵ်ႇၽၵ်းမီႇ။ ၸိူဝ်းဢမ်ႇပဵၼ်လႆႈႁႃႁင်းၵူၺ်းသမ်ႉ လႆႈၸၢင်ႈၵူၼ်း ၵႂႃႇပၢတ်ႇပၼ်ၵေႃႈမီး။

ပီၼႆႉ တႃႇလုမ်းလႃးၼႃးၵေႃႈ လႆႈၸၢင်ႈ လိူဝ်ၼၼ်ႉ ၵႃႈၸၢင်ႈပၢတ်ႇၶႃး၊ တေႃႉၶႃး ၸိူဝ်းၼႆႉၵေႃႈလႆႈ ပၼ်ထႅင်ႈ။ ၵမ်ႈၽွင်ႈ ၸိူဝ်းမီးထေႃႈ/ ထူဝ်ႈ၊ ရူတ်ႉၵႃးတႄႉ တင်ႈၸႂ်ႈၵႂႃႇႁႃ သိုဝ်ႉၽိူင်းၶဝ်ႈႁႆႈတၢင်းမိူင်း သၢတ်ႇမႃးႁူမ်ႇတိူၵ်ႇၽၵ်းမီႇႁေႃ။ ၽိူင်းတၢင်းၼၼ်ႉသမ်ႉ ၼိုင်ႈႁဵင်မတ်ႉလႂ် လႆႈသိုဝ်ႉ 2,000 ဝၢတ်ႇ (ငိုၼ်းထႆး) ၸမ် 3,000 ဝၢတ်ႇ ၼၢင်းယိင်း ၵူၼ်းမိူင်းတူၼ် ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ၵူႈပီတႄႉ ၽုၵ်ႇယဝ်ႉဢေႃႈ။ ပီၼႆႉတႄႉ ၵုမ်ႇသုၵ်ႉၸွမ်းတူင်ႈၼႃးၵူၺ်း။ ယွၼ်ႉၼမ်ႉမႃးလုပ်ႈလႄႈ မၼ်းဢမ်ႇမိူၼ် တူင်ႈၼႃးသေဢိတ်းယဝ်ႉ။ တေးၼႃးၵေႃႈ ဢမ်ႇမီးသေဢိတ်းယဝ်ႉ။ မၢၵ်ႇႁိၼ်မၢၵ်ႇသၢႆး မႃးထူမ်ႈမူတ်းယဝ်ႉ။ မၢင်တီႈ ၼမ်ႉမႃးတွင်ႈတူၼ်ႈမႆႉ ၵႂႃႇပႃးႁၢၵ်ႈႁူဝ်မၼ်းလႄႈ ပေႃးပဵၼ် လုၵ်းပဵၼ်လဝ်ဝႆႉၵေႃႈမီး။ ၽိူင်းၵေႃႈ ဢမ်ႇမီးဝႆႉမိူၼ်ၵူႈပီလႄႈ လႆႈလႄႇႁႃပၢတ်ႇၶႃးမႃးဝႆႉ။ မၢင်ၸိူဝ်း ဢမ်ႇ ပဵၼ်လႆႈၵႂႃႇႁႃႁင်းၵူၺ်းလႄႈ လႆႈၸၢင်ႈပိူၼ်ႈၵႂႃႇပၢတ်ႇပၼ်မတ်ႉပၼ်တၢၵ်ႇပၼ် ၸိူဝ်းၼႆႉထႅင်ႈ”- ဝႃႈ ၼႆ။

ၵမ်ႈၽွင်ႈၵေႃႈ ၵႃႈလႆႈၶၢႆပႅတ်ႈ ၸိူဝ်ႉၽၵ်းမီႇဢၼ်မီးဝႆႉ ယွၼ်ႉလူဝ်ႇငိုၼ်းတိုၼ်း ၼမ်လိူဝ်သေၵူႈပီ။ ယွၼ်ႉလႆႈႁိပ်ႈၶၢႆလႄႈ ၶၼ်ၽၵ်းမီႇၵေႃႈ ဢမ်ႇလႆႈလီ။ ၵွၼ်ႇၼႃႈ ပႆႇဢွၵ်ႇဝႃႇသႃၼႆႉ ၶၼ်ၽၵ်းမီႇ ၼိုင်ႈၵီႊလူဝ်ႊလႂ် မီးထိုင် 37 – 38 ဝၢတ်ႇ (ငိုၼ်းထႆး) သေတႃႉ ယၢမ်းလဵဝ် မီး 33 ဝၢတ်ႇၵူၺ်း။ ၶၢဝ်းၼႆႉ ၽႂ်ၵေႃႈ ႁိပ်ႈၶၢႆႁင်းၽႂ်မၼ်းလႄႈ တႃႇၶၼ်ၽၵ်းမီႇ တေၶိုၼ်ႈတႄႉ ပႆႇႁၼ်တၢင်းမၼ်း ၼႆယဝ်ႉ။

လွင်ႈလူႉသုမ်း ဝၢႆးၼမ်ႉထူမ်ႈၼႆႉၵေႃႈ ဢမ်ႇမီးၸုမ်းလႂ်မႃး ၵမ်ႉထႅမ်။ ၼႃးၽႂ်လူႉၵေႃႈ မၼ်းလႆႈမႄး ၵုမ်းၶိုၼ်းၵူၺ်း။ ၽႂ်မီးၼႃးတူင်ႈယႂ်ႇၵေႃႈ သဵင်ႈငိုၼ်းၼမ်။ ၼႂ်းၸႄႈဝဵင်းမိူင်းတူၼ်ၼႆႉ ၼႃးၼိုင်ႈတူင်ႈလႂ် မီး 3 ဢေႊၶိူဝ်ႊ ၶိုၼ်ႈၼိူဝ် ၼႆ ၵူၼ်းပိုၼ်ႉတီႈလၢတ်ႈ။

ၶၢဝ်းၼမ်ႉၼွင်းထူမ်ႈယႂ်ႇၼႆႉ ၾၢႆၼမ်ႉ၊ ႁွင်ႈၼမ်ႉ ဢၼ်လေႃႇလဵင်ႉတူင်ႈၼႃး ၸိူဝ်းၼႆႉၵေႃႈ ၵူၼ်ႇပင်းလူႉၵွႆမူတ်း။ ၼႃးမၢင်တူင်ႈ ၼမ်ႉတိုၵ်ႉထူမ်ႈဝႆႉယူႇၵေႃႈမီး။ တႃႇမႄးၶိုၼ်း ႁႂ်ႈမိူၼ်ၵဝ်ႇၵေႃႈ ဢမ်ႇငၢႆႈလႄႈ ဢၼ်လႂ်ၵေႃႈ လႆႈဢွၵ်ႇ ၵႃႈၸႂ်ႉၸၢႆႇမူတ်း ဝႃႈၼႆ။

“ၵႃႈမႄးၶုတ်း ႁွင်ႈၼမ်ႉၵေႃႈ လႆႈပၼ်ၵူၺ်း၊ ပိူၼ်ႈတႄႉ သဵင်ႈၵႃႈႁိုဝ်ဢမ်ႇႁူႉ ႁဝ်းၶႃႈတႄႉသဵင်ႈ 7 မိုၼ်ႇပၢႆ။ သင်ၵေႃႈ လႆႈဢွၵ်ႇငိုၼ်းမူတ်း။ တႃႇမႄးထုၺ်ႇပႅတ်ႈယုၵ်းယၢၵ်း ၵိင်ႇမႆႉတူၼ်ႈမႆႉ ဢၼ်လွင်ႈမႃးပၢၼ်ႉဝႆႉ ၸိူဝ်းၼၼ်ႉၵေႃႈ လႆႈသဵင်ႈငိုၼ်းထႆး 2,000 ပၢႆ။ ၼႆႉပဵၼ်တႃႇၼႃးႁဝ်း 2 တူင်ႈၵူၺ်း။ ပေႃးၼႃး ၽႂ်ၼမ်လိူဝ် ၼၼ်ႉၵေႃႈ တေလႆႈသဵင်ႈၼမ်ယဝ်ႉ”- ၵူၼ်းပိုၼ်ႉတီႈ ဝဵင်းမိူင်းတူၼ် သိုပ်ႇလၢတ်ႈၼင်ႇၼႆ။  

ပီၼႆႉ ယွၼ်ႉလၢႆးဢွၵ်ႇငိုၼ်းၼမ်လႄႈ ၸဝ်ႈသူၼ်ၸဝ်ႈၼႃးမိူင်းတူၼ် ၵမ်ႈၼမ် လႆႈၸူၵ်းၸႂ်ႉပႃးငိုၼ်း ဢၼ်ၵဵပ်းႁွမ်တွမ်ဝႆႉ တႃႇၸႂ်ႉၸၢႆႇၼႂ်းယၢမ်းၶိုၵ်ႉၶၵ်ႉ ၸိူဝ်းၼၼ်ႉပႃးလႄႈ ပီၼႆႉ ယႃႇဝႃႈတေလႆႈႁွမ်ငိုၼ်းလႆႈ တေႃႈၼင်ႇ ငိုၼ်းတေလူင်းတိုၼ်း ယင်းလႆႈၶွၵ်းၶေႇ ၸႂ်ႉပႃးငိုၼ်းၵဝ်ႇငိုၼ်းမွၼ်လူးၵွၼ်ႇ – ၸဝ်ႈၼႃး ၵေႃႉၼိုင်ႈ လၢတ်ႈၽူႈတွႆႇႁွၵ်ႈၼင်ႇ ၼႆ။

ပီၼႆႉ ယွၼ်ႉၽေးသၽႃႇဝ ၵေႃႈပိူင်ၼိုင်ႈ ယွၼ်ႉၵၢၼ်မိူင်းၵၢၼ်သိုၵ်း ဢမ်ႇၼိမ်သဝ်းၵေႃႈ ပိူင်ၼိုင်ႈလႄႈ ၵူၼ်းမိူင်း ဢမ်ႇထၢင်ႇႁဵတ်းၵၢၼ် ႁႃၵိၼ်လဵင်ႉတွင်ႉလႆႈလီလီ။ မိူၼ်ၼင်ႇ ပွတ်းမိူင်းပၼ်ႇ၊ မိူင်းတူၼ်၊ မႄႈၵႅၼ်း၊ ၼႃးၵွင်းမူးလႄႈ ပုင်ႇပႃႇၶႅမ် ၸိူဝ်းၼႆႉ ၵမ်ႈၼမ် ႁဵတ်းၼႃး၊ ႁဵတ်းသူၼ်ၽၵ်းမီႇႁေႃ ႁႃၵိၼ်လဵင်ႉတွင်ႉ ပဵၼ်ပိူင်ယႂ်ႇ။   

ၵွပ်ႈၼႆ ပီၼႆႉ မီးလွင်ႈလူႉသုမ်းၼမ်ႁႅင်းလႄႈ ၵူၼ်းမိူင်း တုၵ်းယွၼ်းထိုင် ၽူႈယႂ်ႇၵူၼ်းလူင် ၵူႈၾၢႆႇတင်း ၽူႈၵဵဝ်ႇၶွင်ႈတင်းသဵင်ႈ ႁႂ်ႈၸွႆႈၵႄႈလိတ်ႈပၼ်ႁႃ ၸွႆႈထႅမ်တူၺ်းထိုင်ပၼ် ၵူၼ်းမိူင်းၸဝ်ႈႁႆႈ ၸဝ်ႈၼႃးသေၵမ်း ဝႃႈၼႆ။