ၵူၼ်းမိူင်း ဝဵင်းႁူဝ်ပူင်း ၸိူဝ်းဢၼ်သဵၼ်ႈၸိုဝ်ႈလုၵ်ႈလၢင်း တူၵ်းမႃးတႃႇၵႂႃႇႁၢပ်ႇၵၢၼ်သိုၵ်းၼၼ်ႉ သင် ဢမ်ႇပၼ်လုၵ်ႈလၢင်းလႆႈၸိုင် တေလႆႈပၼ်ငိုၼ်း ၵႃႈၸၢင်ႈၵူၼ်းၵႂႃႇတႅၼ်းတၢင် ၼပ်ႉႁူဝ်သႅၼ်ပျႃး၊ မီးလုၵ်ႈၸၢႆးၼမ်ၵႃႈႁိုဝ် လႆႈပၼ် ၵႃႈၼၼ်ႉ ဝႃႈၼႆ။

တႄႇဢဝ် လိူၼ်ၵျုၼ်ႊမႃး သိုၵ်းမၢၼ်ႈ ၵဵပ်းၵူၼ်းၼုမ်ႇ တႃႇၵႂႃႇၾိုၵ်းၵၢၼ်သိုၵ်း သင်ဢမ်ႇပၼ်ၵူၼ်းလႆႈၵေႃႈ လုၵ်ႈ ၸၢႆးၼိုင်ႈၵေႃႈ ငိုၼ်း 1 သႅၼ်ပျႃး ပေႃးမီးလုၵ်ႈၸၢႆး 3 ၵေႃႉၵေႃႈ လႆႈပၼ်တႃႇ 3 သႅၼ်ပျႃး။ ၵဵပ်းသဵၼ်ႈၸိုဝ်ႈ ၼႂ်းပွၵ်ႉႁူဝ်ဝဵင်း (မဵဝ်ႉဢူး) ၊ ပွၵ်ႉဢွၵ်ႇ ၊ ပွၵ်ႉတူၵ်း ၊ ပွၵ်ႉၸၢၼ်း ၊ ပွၵ်ႉတူင်ႈၶၢၼ် ၼႂ်းဝဵင်းႁူဝ်ပူင်းသေ ႁွင်ႉၵူၼ်းဝၢၼ်ႈ ၼိုင်ႈ ႁိူၼ်းၼိုင်ႈၵေႃႉ မႃးပၢင်ၵုမ်ၵၼ် ၽႂ်ဢမ်ႇပၼ် လုၵ်ႈလၢင်းၸဝ်ႈၵဝ်ႇလႆႈၵေႃႈ တေလႆႈပၼ်ငိုၼ်း ဢမ်ႇပၼ်ဢမ်ႇလႆႈ ဝႃႈၼႆ။

ၵူၼ်းပိုၼ်ႉတီႈ ဝဵင်းႁူဝ်ပူင်း လၢတ်ႈတီႈၽူႈတွႆႇႁွၵ်ႈဝႃႈ – “တေလႆႈသႂ်ႇငိုၼ်းၵူႈႁိူၼ်းၼႆၶႃႈဝႃႇ။ ငဝ်းလၢႆး ဝၢၼ်ႈမိူင်းမိူဝ်ႈလဵဝ် ပဵၼ်ဢၼ်ယၢပ်ႇၸႂ်ၽႂ်မၼ်း။ တႃႇႁႃၵိၼ်လဵင်ႉတွင်ႉ တၢင်းယၢပ်ႇယူႇယဝ်ႉ။ ပေႃးဢမ်ႇ သႂ်ႇငိုၼ်း၊ ဢမ်ႇပၼ်ၵူၼ်း ၸိုင် – တေဢဝ်လိူင်ႈ၊ တေတီႉၺွပ်းပၼ်တူတ်ႈတၢမ်ႇ”- ဝႃႈၼႆ။

ဢၼ်လူင်းမႃးၵဵပ်းငိုၼ်းၼႆႉ တေပႃးၽူႈၵွၼ်းႁွင်ႈၵၢၼ် ၾၢႆႇၽွင်းငမ်း ၵူႈလွင်ႈလွင်ႈ ၊ ၵႄႇသိပ်းႁိူၼ်း ၊ ၵႄႇပၢၵ်ႇႁိူၼ်း ၊ ၽူႈမၢႆလုမ်းၵွၼ်းပွၵ်ႉ ၊ ၽူႈမၢႆလုမ်းၵွၼ်းဢိူင်ႇ ၸိူဝ်းၼႆႉ။ ၸိူဝ်းၶဝ် ၶိုၼ်ႈႁိူၼ်းလူင်းႁိူၼ်း ၵဵပ်း ငိုၼ်း၊ ပေႃးဢမ်ႇသႂ်ႇ တေဢဝ်လိူင်ႈ ဝႃႈၼႆပႃး။

ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၶဝ်ဢႅဝ်ႇႁႃၸၢင်ႈ ၵူၼ်းဢမ်ႇမီးၵၢၼ်၊ ၶီႈယႃႈၶီႈလဝ်ႈ ၸိူဝ်းၼႆႉ။ မၢင်ၸိူဝ်း ႁူႉ ၶႂ်ႈလႆႈငိုၼ်းၵူၺ်း ၊ ပေႃးဝႃႈ တေပၼ်ငိုၼ်းၼႆၵေႃႈ ၽွမ်ႉၵႂႃႇၾိုၵ်းၵၢၼ်သိုၵ်းၸွမ်းၶဝ်။ ၵူၺ်းၵႃႈ ၸွင်ႇၶဝ်ပၼ်ၵႃႈၸၢင်ႈတႄႉ ယူႇႁိုဝ်ၵေႃႈဢမ်ႇႁူႉ ၊ ငိုၼ်းဢၼ်ၵဵပ်းၼႂ်းပွၵ်ႉၵေႃႈ လႆႈၵႃႈႁိုဝ် ၶဝ်ဢမ်ႇ ပွင်ႇပၼ်ၵူၼ်းမိူင်းၶိုၼ်း”- ဝႃႈၼႆ။

ၵူၼ်းဢၼ်ထုၵ်ႇသူင်ႇၵႂႃႇၾိုၵ်းၵၢၼ်သိုၵ်းၼႆႉ ဢမ်ႇႁူႉဝႃႈ သူင်ႇၵႂႃႇတပ်ႉမၢႆလႂ် ၊ ၵူၼ်းၸိူဝ်းၵႂႃႇ ၸုပ်ႈဢွၼ်တၢင်း ၸိူဝ်းၼၼ်ႉၵေႃႈ ဢမ်ႇမီးလွင်ႈၵပ်းသိုပ်ႇတိတ်းတေႃႇမႃး တၢင်းႁိူၼ်းၶိုၼ်း၊ တၢႆႁိုဝ်လိပ်းၵေႃႈ ဢမ်ႇႁူႉ – ဝႃႈၼႆ။

မိူၼ်ၼႆၼင်ႇၵဝ်ႇ တီႈဝဵင်းပၢင်လႃႈ (ပၢင်းတရႃႉ) ဝၢၼ်ႈမိူင်းလီၵေႃႈ သိုၵ်းမၢၼ်ႈၵဵပ်းငိုၼ်းၵူၼ်းမိူင်း ႁိူၼ်း 1 လင် 2 သႅၼ်ပျႃး။ တေလႆႈၸၢႆႇပၼ် ႁႂ်ႈယဝ်ႉတူဝ်ႈ ၼႂ်းလိူၼ်ဢေႃႊၵတ်ႊသ်ၼႆႉသဵင်ႈၼႆလႄႈ ၵူၼ်းပိုၼ်ႉ တီႈပဵၼ်ဢၼ်ယၢပ်ႇၽိုတ်ႇဝႆႉ ဝႃႈၼႆ။

ယၢမ်းလဵဝ် သိုၵ်းမၢၼ်ႈ လႆႈၸႂ်ႉဢဵၼ်ႁႅင်း ယိုဝ်းသိုၵ်းလႄႈ သုမ်းႁႅင်းသိုၵ်းၼမ်။ ၵွပ်ႈၼႆ မိူဝ်ႈႁူဝ်ပီၼႆႉ သိုၵ်းမၢၼ်ႈ ပိုၼ် ၽၢဝ်ႇ ၵဵပ်းသိုၵ်းၵူၼ်းမိူင်း တႃႇထႅမ်ဢဵၼ်ႁႅင်းၶိုၼ်း။ ၾိုၵ်းၵၢၼ်သိုၵ်းပၼ်ယဝ်ႉ 3 ၸုပ်ႈ။ တေတႄႇၾိုၵ်းၸုပ်ႈထီႉ 4 ၼႂ်းလိူၼ်ၼႆႉ။

လွင်ႈၼႆႉ ၵူၼ်းမိူင်း ဢမ်ႇၶႂ်ႈၾိုၵ်းၵၢၼ်သိုၵ်း ၸွမ်းသိုၵ်းမၢၼ်ႈလႄႈ ဢွၼ်ၵၼ်ပၢႆႈ ၵေႃႉႁူးၵေႃႉတၢင်း မိူင်းပေႃးယဵၼ်။ ၸင်ႇဝႃႈ ပေႃးလႆႈၵဵပ်းငိုၼ်းၸၢင်ႈဢဝ်။

ၾၢႆႇၼိုင်ႈ သိုၵ်းမၢၼ်ႈ ပိုၼ်ႇၽၢဝ်ႇဝႆႉထႅင်ႈဝႃႈ ၾိုၵ်းၵၢၼ်သိုၵ်း ၸုပ်ႈထီႉ 5 ၼႆႉ တေဢဝ်ပႃး ၵူၼ်းၼုမ်ႇ ၼၢင်းယိင်း ၼႆလႄႈ ႁဵတ်းႁႂ်ႈလုၵ်ႈဢွၼ်ႇယိင်းၼုမ်ႇ ၼႂ်းပိုၼ်ႉတီႈ ၵူဝ်သေ ဢွၼ်ၵၼ်ပၢႆႈဝႆႉထႃႈယဝ်ႉ ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)