ၶၢဝ်းတၢင်း 6 ဝၼ်းမႃးၼႆႉ မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇသႂ်ႇ တီႈဝဵင်းသီႇပေႃႉ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ ဢမ်ႇယွမ်း 10 ၵေႃႉ မၢတ်ၸဵပ်းမွၵ်ႈ 5 ၵေႃႉ ႁိူၼ်းယေးထုၵ်ႇၾႆးမႆႈ ဢမ်ႇယွမ်း 8 လင်။
ဝၼ်းတီႈ 16/09/2024 ယၢမ်းၵၢင်ၼႂ် 9 မူင်းပၢႆ မၢၵ်ႇၶိူင်ႈမိၼ် သိုၵ်းမၢၼ်ႈ ယိုတ်းမိူင်း တိူဝ်ႉသႂ်ႇၵူၼ်း မိူင်းသွင်မႄႈလုၵ်ႈ ၽွင်းတိုၵ်ႉပၼ်ႇရူတ်ႉထိပ်ႇမႃးၼၼ်ႉ တိူဝ်ႉသႂ်ႇလူႉတၢႆ ၵေႃႉၼိုင်ႈ၊ မၢတ်ႇၸဵပ်း ၵေႃႉၼိုင်ႈ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉ ၺႃးႁိူၼ်းယေး လူႉၵွႆၸွမ်းထႅင်ႈသွင်လင် ၼႂ်းဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶၢဝ်းတၢင်း 2 ဝၼ်းမႃးၼႆႉ မၢၵ်ႇၶိူင်ႈမိၼ် သိုၵ်းမၢၼ်ႈ မႃးတူၵ်းသႂ်ႇ တိူဝ်ႉၺႃးၵူၼ်းမိူင်း လူႉတၢႆ 3 ၵေႃႉ မၢတ်ႇၸဵပ်း 1 ၵေႃႉ။ မိူဝ်ႈဝႃး ဝၼ်းတီႈ 17 ၼႆႉ တူၵ်းသႂ်ႇ တီႈဝၢၼ်ႈဝဵင်းၵဝ်ႇဢေႃႈ။ ၽူႈလၵ်ႉၵေႃႈ လိူင်ႇၼႃႇ၊ ၸုမ်းယိပ်းၵွင်ႈၵၢင်ႇ လၵ်ႉႁႃႉ၊ ၵူၼ်းမိူင်းလၵ်ႉႁႃႉၵေႃႈ ဢမ်ႇႁူႉ။ ဢၼ်တုၵ်ႉၶတႄႉ ပဵၼ်ၵူၼ်းမိူင်းၵူၺ်းၶႃႈဢေႃႈ”- ဝႃႈၼႆ။
ယွၼ်ႉၶိူင်ႈမိၼ်သိုၵ်းမၢၼ်ႈ ၵႆႉမႃးပွႆႇမၢၵ်ႇ ၸိူင်ႉၼႆၼႆႉ ႁဵတ်းႁႂ်ႈၵူၼ်းမိူင်း ၼႂ်းၸႄႈဝဵင်းသီႇပေႃႉ ဢွၼ်ၵၼ်ငိူင်ႉပၢႆႈႁႃတီႈလွတ်ႈၽေး ၵမ်ႈၽွင်ႈ ပၢႆႈၵႂႃႇယူႇၸွမ်းဝၢၼ်ႈၼွၵ်ႈၼႃးပၢင်ႇ၊ ၸွမ်းၼႂ်းထိူၼ်ႇ ၸိူဝ်းၼၼ်ႉၵေႃႈ ၼမ်လႄႈ ၵွပ်ႈၼႆ ဢွၼ်ၵၼ်ထူပ်းတၢင်းယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ်လႄႈ ယႃႈ ယႃ ၸိူဝ်းၼႆႉ။
“လွင်ႈယၢပ်ႇၽိုတ်ႇတႄႉ ဢမ်ႇၸၢင်ႈဝႃႈႁိုဝ်ယဝ်ႉ။ ဢမ်ႇမီးငိုၼ်း ဢမ်ႇမီးၵၢၼ်ႁဵတ်း ဢမ်ႇမီးငိုၼ်းၶဝ်ႈ။ ၵူၺ်းၵႃႈ ဢၼ်ယၢပ်ႇၽိုတ်ႇတႄႉ မႄႈမၼ်းၶဝ် တႃႇတေၵိူတ်ႇလုၵ်ႈ လဵင်ႉလုၵ်ႈ ၸိူဝ်းၼၼ်ႉၶႃႈဢေႃႈ။ ယဝ်ႉၵေႃႈ လွင်ႈၵိၼ်ယႅမ်ႉ လွင်ႈပၢႆးယူႇလီ ၸိူဝ်းၼႆႉထႅင်ႈ”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 15 ယၢမ်းၵၢင်ၶိုၼ်း ၼၼ်ႉၵေႃႈ မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇတီႈဝဵင်းသီႇပေႃႉ ၸၢၵ်ႇမၢၵ်ႇ တိူဝ်ႉသႂ်ႇႁိူၼ်းယေး ၵူၼ်းမိူင်း လူႉၵွႆ လင်ၼိုင်ႈ။
ပၢင်တိုၵ်း တီႈဝဵင်းသီႇပေႃႉၼႆႉ တႄႇပဵၼ်မႃးၶိုၼ်းႁၢဝ်ႈႁႅင်ႈ ၼႂ်းဝၼ်းတီႈ 13 ၼႆႉ ဝၢႆးၼၼ်ႉမႃး ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇၼႂ်းဝၢၼ်ႈၼႂ်းဝဵင်းယူႇ ၵူႈဝၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ