ဝဵင်းၵၢတ်ႇလေႃႉ (ၵလေႃး) ၸိုင်ႈတႆးပွတ်းၸၢၼ်း ဝဵင်းဢၼ်မီးၼိူဝ်လွႆသုင်ၼၼ်ႉ ပီၼႆႉ ၼမ်ႉထူမ်ႈဝဵင်းႁၢဝ်ႈႁႅင်း ထိုင်တီႈမီးၵူၼ်းမၢတ်ႇၸဵပ်းလူႉတၢႆ ႁိူၼ်းယေးလူႉၵွႆၼမ်။

ၾူၼ်တူၵ်းႁႅင်းလႄႈ ၼမ်ႉတႄႇထူမ်ႈဝဵင်း မိူဝ်ႈဝၼ်းတီႈ 10/09/2024 ထိုင် ဝၼ်းတီႈ 16 ၼႆႉ ၼမ်ႉၸင်ႇ ယွမ်းလူင်းႁႅင်ႈၵႂႃႇ။

ၼၢင်းယိင်း ၵူၼ်းၼုမ်ႇ ယူႇဝဵင်းၵၢတ်ႇလေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉတႄႉယွမ်းလူင်းယဝ်ႉ။ ၵိုတ်းၵူမ်ႇဢုင်ၼႃၼႃႇ။ ၵူၼ်းပိုၼ်ႉတီႈသမ်ႉ ငိူင်ႉပၢႆႈဝႆႉ ပႆႇၸၢင်ႈပွၵ်ႈယူႇႁိူၼ်းယေးၶိုၼ်း။ ၸိူဝ်းၶဝ် ၵႂႃႇ ယူႇၸွမ်း ၵျွင်းမုၼ်ၸဝ်ႈ၊ ဢၼ်ၺႃးၼမ်ႉထူမ်ႈႁႅင်း ႁိူၼ်းလူႉၵွႆမီး 3 ပွၵ်ႉ။ ၶူဝ်းႁိူၼ်း ဢမ်ႇတၼ်းလႆႈသင်လႄႈ ယၢမ်းလဵဝ် လူဝ်ႇတၢင်းၸွႆႈထႅမ်ၽႃႈ၊ မွၼ်ႁူဝ်၊ တၢင်းၵိၼ်တင်းယႅမ်ႉ”- ဝႃႈၼႆ။ 

ၶၢဝ်းတၢင်းၼမ်ႉထူမ်ႈ တႄႇဝၼ်းတီႈ 10 တေႃႇထိုင် ဝၼ်းတီႈ 14 လိူၼ်သႅပ်ႊထႅမ်ႊပိူဝ်ႊၼႆႉ ၵူၼ်းပိုၼ်ႉ တီႈဢၼ်လႆႈလူႉတၢႆမီး 13 ၵေႃႉ။ ပဵၼ်ၵူၼ်းပွၵ်ႉ 1 – 2 – 3 – 4 ၼႆ ၸုမ်းၸွႆႈထႅမ်ပိုၼ်ႉတီႈ ၵေႃႉၼိုင်ႈ လၢတ်ႈၼင်ၼႆ။  

ဝဵင်းၵၢတ်ႇလေႃႉၼႆႉ ပဵၼ်ဝဵင်းၼိူဝ်လွႆ ၼမ်ႉဢမ်ႇယၢမ်ႈထူမ်ႈႁၢႆႉႁႅင်းၸိူင်ႉၼႆသေပွၵ်ႈ။ ယၢမ်းၼႆႉၵေႃႈ ၼမ်ႉၵိုင်ႉၵၢင်ႉ ၼွင်းထူမ်ႈမႃးဝႆးလႄႈ ႁဵတ်းႁႂ်ႈလူႉသုမ်း တင်းၼမ် ဝႃႈၼႆ။

ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ဢၼ်ပိူၼ်ႈမႃးၸွႆႈထႅမ် ႁေႃႇၶဝ်ႈၸွၵ်းၽၵ်း ပၼ်ႁဝ်းၶႃႈၵေႃႈ ၸူမ်းၵျႃႉ။ ၵူၺ်း ၵႃႈ ၽၵ်းမၢင် ၸိူဝ်းၼႆႉ မၼ်းဢမ်ႇဝႆႉႁိုင်လႆႈ မၼ်းၸဵဝ်းမဵၼ်သူမ်ႈ ၸဵဝ်းလူႉ။ ၵွပ်ႈၼႆ ၶႂ်ႈတုၵ်းယွၼ်းမႃးၸွႆႈပၼ် ၶဝ်ႈသၢၼ် တၢင်းၵိၼ်ႁႅင်ႈ ၸိူဝ်းၼႆႉၵူၺ်းယဝ်ႉၶႃႈ”- ဝႃႈၼႆ။

ယၢမ်းလဵဝ် ၼမ်ႉယွမ်းလူင်းၵႂႃႇယဝ်ႉ ဝႃႈၼႆသေတႃႉ ၵၢၼ်တိတ်းတေႃႇၵပ်းသိုပ်ႇၵၼ် မိူၼ်ၼင်ႇ လႅင်းၾူၼ်း၊ လႅင်း ဢိၼ်ႊထိူဝ်ႊၼႅတ်ႊ ဢမ်ႇမီးသေဢိတ်း။ ပေႃးပဵၼ်ၾူၼ်း MPT ၊ Mytel ၸိူဝ်းၼႆႉတႄႉ လႆႈပဵၼ်ၵမ်းယူႇ။ ၵူၺ်းၵႃႈ သဵင်ၶၢတ်ႇၶၢတ်ႇႁၢႆႁၢႆ – ဢမ်ႇၸၢင်းလၢတ်ႈတေႃႇၵၼ်လီလီ – ဝႃႈၼႆ။

ၵူၼ်းမိူင်းဝဵင်းၵၢတ်ႇလေႃႉတႄႉ ယၢမ်းလဵဝ် ဢွၼ်ၵၼ်ပၢႆႈၵႂႃႇသွၼ်ႈယူႇဝႆႉတီႈ ဝတ်ႉၵျွင်းမုၼ်ၸဝ်ႈမဵဝ်ႉမ၊ ဝတ်ႉၵျွင်းထမ်မၸၵ်ႉၵျႃႇ၊ ဝတ်ႉၵျွင်းမျႅတ်ႉယႄးဢိၼ်းလႄႈ ႁူင်းႁဵၼ်းၸၼ်ႉၵၢင် ၸၼ်ႉသုင် တီႈဢၼ် လွတ်ႈၽေးၼမ်ႉ။ ၵူၼ်းပၢႆႈၽေးသိုၵ်း လူဝ်ႇတၢင်းၸွႆထႅမ် ၶဝ်ႈၼမ်ႉတၢင်းၵိၼ်၊ ၶူဝ်းၼုင်ႈၶူဝ်းဝႆလႄႈ ၽႃႈႁူမ်ႇၶူဝ်းၼွၼ်း မွၼ်ႁူဝ် ဢိၵ်ႇယႃႈယႃ ၸိူဝ်းၼႆႉ။

ယၢမ်းလဵဝ် ၼႂ်းမိူင်းတႆးပွတ်းၸၢၼ်း ထုင်ႉတူၼ်ႈတီး၊ သီႇသႅင်ႇ၊ မွၵ်ႇမႆႇ၊ လၢင်းၶိူဝ်း၊ မိူင်းပၼ်ႇ၊ ၼမ်ႉၸၢင်၊ မိူင်းၼၢႆး၊ လၢင်းၶိူဝ်း၊ မိူင်းၵိုင်၊ မိူင်းပွၼ်၊ ႁူဝ်ပူင်း၊ ပဵၼ်ၼမ်ႉထူမ်ႈၼမ်ႉၼွင်း၊ လိၼ်ၵူၼ်ႇသေ ၵူၼ်းပိုၼ်ႉ တီႈလူႉတၢႆ လူႉသုမ်း ၸွမ်းတင်းၼမ်။ မၢင်တီႈ ၼမ်ႉယင်းပႆႇလူတ်းယွမ်းႁႅင်ႈ။ မၢင်တီႈၵေႃႈ ၼမ်ႉၶိုၼ်ႈ ၶိုၼ်ႈယွမ်းယွမ်း ၵူၼ်းမိူင်းပႆႇၸၢင်ႈပွၵ်ႈၶိုၼ်းႁိူၼ်းယေး။

ၸုၸုၸၢၼ်ႇ ၽူႈလူင်ႉလႅၼ်ႇ ၾၢႆႇလၢမ်းၶၢတ်ႈ ၾိင်ႈၾႃႉရႃႇသီႇတႄႉ တႅမ်ႈတၢင်ႇပိုၼ်ၽၢဝ်ႇဝႆႉဝႃႈ – ၼႂ်းဝၼ်းတီႈ  22 လႄႈ 23  သႅပ်ႊထႅမ်ႊပိူဝ်ႊၼႆႉ မီးလူမ်းလႅင်ႉထႅင်ႈလုၵ်ႈၼိုင်ႈ ၸိုဝ်ႈႁွင်ႉ Soulik Typhoon ဢၼ်လုၵ်ႉၼႂ်းၼႃႈၼမ်ႉပၢင်ႇလၢႆႇ ၾၢႆႇႁွင်ႇမိူင်းၾိလိပ်ႉပိၼ်ႊသ်မႃး။ တေၽတ်ႉပဝ်ႇၶဝ်ႈမႃး ၾၢႆႇၼႃႈ တၢင်းတူၵ်း ဢၼ်တေတုမ်ႉတိူဝ်ႉ ၵမ်းသိုဝ်ႈ တေပဵၼ်မိူင်းၵမ်ႊပေႃႊတီႊယႃႊ၊ ဝီႊယႅတ်ႉၼၢမ်ႊလႄႈ မိူင်းထႆး မိူင်းတႆး – ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႈၶၢဝ်ႇၾိုၵ်းၵၢၼ်)