ၾူၼ်တူၵ်းထပ်းၵၼ်လၢႆဝၼ်းသေ ၼမ်ႉထူမ်ႈႁႅင်း ၼႂ်းႁူဝ်လိူၼ်သႅပ်ႊထႅမ်ႊပိူဝ်ႊၼႆႉ ႁဵတ်းႁႂ်ႈထူမ်ႈပႃး ႁိူၼ်းယေး ၵူၼ်းမိူင်း ၼႂ်းၼွင်ႁၢႆးယႃႈ ဢမ်ႇတၼ်းလႆႈသင် မၢၵ်ႇၶဝ်ႈတဝ်ႈၼမ်ႉ ၼႂ်းႁိူၼ်းလႆလွင်ႈၸွမ်း ၼမ်ႉမူတ်း။
ဝၼ်းတီႈ 16/09/2024 ၵူၼ်းပိုၼ်ႉတီႈ ၼွင်ႁၢႆးယႃႈ ၸႄႈဝဵင်းယွင်ႁူၺ်ႈ မိူင်းတႆးပွတ်းၸၢၼ်း ထၢႆႇႁၢင်ႈတၢင်ႇၶိုၼ်ႈၼိူဝ်ၾဵတ်ႉသ်ပုၵ်ႉ သူဝ်ႊသျႄႊမီႊတီႊယႃႊမႃးဝႃႈ ၶူဝ်းၶွင်ႁိူၼ်းယေး ပႃးၸဵမ်မၢၵ်ႇၶိူဝ်သူမ်ႈ ဢၼ်ပိတ်းယဝ်ႉသေ ဢၢၼ်းတေဢဝ်ၵႂႃႇၶၢႆ ၼၼ်ႉၵေႃႈ လွင်ႈၸွမ်းၼမ်ႉမူတ်း ယၢပ်ႇၽိုတ်ႇပႃးလွင်ႈ ၼမ်ႉၵိၼ်ၼမ်ႉၸႂ်ႉ ဝႃႈၼႆ။
ၵူၼ်းမိူင်း ထုင်ႉၼွင်ႁၢႆးယႃႈ ၽူႈၸၢႆးၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၼမ်ႉၼွင်ႁၢႆးယႃႈလူၼ်ႉၾင်ႇ။ သုင်ၶိုၼ်ႈထူမ်ႈႁိူၼ်းယေး ဢၼ်မီးၸွမ်းၾင်ႇၼွင်လႄႈ ၼိူဝ်ၵုၼ်ၼႂ်းၼွင်။ လၢၵ်ႈဢဝ်ၶူဝ်းၶွင်ၼႂ်းႁိူၼ်း ၼႂ်းယေးၵူၼ်းမိူင်းၵႂႃႇပႃးမူတ်း။ ယၢမ်းလဵဝ်ၵေႃႈ ၼမ်ႉယိုင်ႈဝႆႉ တႃႇတေလူတ်းယွမ်းၶိုၼ်းၵေႃႈ ပႆႇငၢႆႈငၢႆႈ ပေႃးသိုၵ်းမၢၼ်ႈ ပႆႇပိုတ်ႇၾၢႆၼမ်ႉမိူင်းပၢႆး၊ တေႃႈလဵဝ်တႄႉ ၵူၼ်းၼႂ်းပိုၼ်ႉတီႈ လႆႈပၢႆႈၽႄးၼမ်ႉဝႆႉ ၊ မိူဝ်ႈၼႆႉ ဢွၼ်ၵၼ်ၸွႆႈၵၼ် ၶၢႆႉၶူဝ်းၶၢႆႉလဵင်း”- ဝႃႈၼႆ။
ဢၼ်မၢၵ်ႇၶိူဝ်သူမ်ႈ လွင်ႈလႆၼၼ်ႉ ပဵၼ်တီႈဝၢၼ်ႈၼမ်ႉပၼ်ႇ ဢၼ်မီးၼႃႈဝၼ်းဢွၵ်ႇ ၼွင်ႁၢႆးယႃႈ။ ပဵၼ်ဝၢၼ်ႈ ဢၼ် ၶဝ်ႈပႃးၼႂ်းၶူင်းၵၢၼ် ဢႅဝ်ႇယဵမ်ႈတွင်ႈတဵဝ်း ၼႂ်းၼွင်ႁၢႆးယႃႈ ဝၢၼ်ႈၼိုင်ႈ။ ၼမ်ႉတႄႇထူမ်ႈ ႁၢဝ်ႈႁႅင်း တင်ႈတႄႇဝၼ်းတီႈ 12/09/2024။ တေႃႇထိုင်ယၢမ်းလဵဝ် ၼမ်ႉပႆႇယွမ်းလူင်းၶိုၼ်း ၵူၼ်းမိူင်း ဢမ်ႇၸၢင်ႈႁဵတ်းၵၢၼ် ႁႃၵိၼ်လဵင်ႉတွင်ႉ။
ယၢမ်းလဵဝ် ၼႂ်းၼွင်ႁၢႆးယႃႈ ၵၢၼ်ၵပ်းသိုပ်ႇတိတ်းတေႃႇၾူၼ်း ၸူးၵၼ်ၵေႃႈဢမ်ႇလႆႈ ၾႆးၾႃႉၵေႃႈ ဢမ်ႇမီး၊ ၽိုၼ်း ၵေႃႈယမ်းလႄႈ ဢမ်ႇၸၢင်ႈႁုင်ၵိၼ်ႁုင်ယႅမ်ႉ ၼမ်ႉၵိၼ်ၵေႃႈ ဢမ်ႇမီး ၵူၼ်းပိုၼ်ႉတီႈ ပဵၼ် ဢၼ်ယၢပ်ႇၸႂ်ၵူႈမဵဝ်း – ဝႃႈၼႆ။
ၵူၼ်းပိုၼ်ႉတီႈ ၽူႈယိင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၼႂ်းၼွင် ဢမ်ႇမီးၼမ်ႉၵိၼ် ယၢမ်းလဵဝ်၊ ၾႆးၾႃႉၵေႃႈ ဢမ်ႇမႃးလႄႈ တႃႇတေၵိၼ်ယႅမ်ႉၵေႃႈယၢပ်ႇ၊ ၽိုၼ်းၵေႃႈယမ်းမူတ်း ၵူၼ်းပိုၼ်ႉတီႈ မၢင်ၸိူဝ်း ဢမ်ႇလႆႈၵိၼ်ၶဝ်ႈ 2-3 ဝၼ်းယဝ်ႉ ၵေႃႈမီး၊ ၵူၼ်းမႃးၸွႆႈထႅမ် မီးယူႇဢိတ်းဢွတ်း ယၢမ်းလဵဝ် လူဝ်ႇ ၵူၼ်းၸွႆႈထႅမ်ၶဝ်ႈၼမ်ႉတၢင်းၵိၼ်”- ဝႃႈ ၼႆ။
ယၢမ်းလဵဝ် တီႈၼွင်ႁၢႆးယႃႈၼႆႉ ၼမ်ႉထူမ်ႈၶိုၼ်ႈ ၵျွင်းမုၼ်ၸဝ်ႈ၊ ႁူင်းႁဵၼ်း ၊ ႁိူၼ်းၵူၼ်းပိုၼ်ႉတီႈ ၼမ်ႉထူမ်ႈႁၢဝ်ႈႁႅင်းသေ ၵူၼ်းပၢႆႈၽေးသိုၵ်း တၢင်းမိူင်းယၢင်းလႅင် ဢၼ်မႃးသွၼ်ႈယူႇ တီႈၸွမ်းၵျွင်းမုၼ်ၸဝ်ႈ ၸိူဝ်းၼၼ်ႉ လႆႈပၢႆႈၽေး ၼမ်ႉထႅင်ႈ ၵမ်းၼိုင်ႈ။
တီႈၸႄႈဝဵင်းယွင်ႁူၺ်ႈၼႆႉ မီးဝၢၼ်ႈ 400 ပၢႆ။ ၼႂ်းၼၼ်ႉ ၼမ်ႉထူမ်ႈဝႆႉ ဝၢၼ်ႈ 100 ပၢႆ။ မၢင်ထုင်ႉ တီႈဢၼ်မီးတႅမ်ႇ ၶူင်ႈယၢၼ်းၼၼ်ႉ ၼမ်ႉထူမ်ႈႁႅင်း ထိုင်ၶေႃးႁိူၼ်း။ မၢင်ႁိူၼ်း ၵိုတ်းၸွမ်ႁိူၼ်းၵူၺ်း။ ၵူၼ်းပိုၼ်ႉတီႈ ပဵၼ်ဢၼ်ယၢပ်ႇၽိုတ်ႇၵိၼ်းၸႂ်။ ၼမ်ႉထူမ်ႈဝၢၼ်ႈဢိူင်ႇ ဢၼ်မီးၶွပ်ႇၼွင် ႁၢဝ်ႈႁႅင်း ၸိူင်ႉၼႆ မိူဝ်ႈၵွၼ်ႇ ပႆႇယၢမ်ႈထူပ်းယၢမ်ႈႁၼ်သေပွၵ်ႈ ၵူၼ်းပိုၼ်ႉတီႈလၢတ်ႈၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇ ၾိုၵ်းၵၢၼ်)
