ပီၼႆႉ ၼမ်ႉသၢႆလူၼ်ႉၾင်ႇ ၼွင်းထူမ်ႈ ၼႂ်းဝဵင်းတႃႈၶီႈလဵၵ်း ႁၢဝ်ႈႁႅင်း ဢမ်ႇယွမ်း 7 ပွၵ်ႈယဝ်ႉ ဝၢႆးၼမ်ႉယူပ်ႈလူင်းယဝ်ႉ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ တႃႇပတ်းၽဵဝ်ႈၶီႈၵူမ်ႇၶီႈငႂ်ႈ ဢၼ်ၵိုတ်းၶမ်ဝႆႉ ၸိူဝ်းၼၼ်ႉ။

ယၢမ်းလဵဝ် ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆးၼႆႉ မၢင်ပွၵ်ႉမၢင်ယွမ်ႇ ၼမ်ႉယွမ်းလူင်းယဝ်ႉသေတႃႉ မၢင်ပွၵ်ႉတႄႉ တိုၵ်ႉထူမ်ႈဝႆႉယူႇလႄႈ ပွၵ်ႈၼႆႉ ယွၼ်ႉၼမ်ႉထူမ်ႈႁႅင်း လိူဝ်ၵဝ်ႇသေ ႁဵတ်းႁႂ်ႈႁၢၼ်ႉတၢင်း ၶၢႆ၊ ႁိူၼ်းယေးလႄႈ ၶူဝ်းၶွင်ၵူၼ်းမိူင်း ၸိူဝ်းၼႆႉ လူႉသုမ်းၸွမ်းတင်းၼမ်လၢႆ။

ၵူၼ်းပိုၼ်ႉတီႈ ၽူႈယိင်း ဢႃယု 30 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“တီႈဝဵင်းတႃႈၶီႈလဵၵ်းၼႆႉ ပဵၼ်ႁႅင်းတီႈသုတ်းယဝ်ႉ။ ႁိူၼ်းယေး လူႉၵွႆၵေႃႈတင်းၼမ်ယဝ်ႉ။ ရူတ်ႉၵႃး ၸိူဝ်းၼႆႉၵေႃႈ ထုၵ်ႇၶီႈၵူမ်ႇၶီႈငႂ်ႈ ထူမ်ႈသႂ်ႇၼႂ်းၵႃးတင်း ၼမ်ဢေႃႈ။ လူႉၵွႆ ၸိူဝ်းၼႆႉၵေႃႈ ၼမ်ဝႃႈၼမ်ယဝ်ႉ။ ဢၼ်ပဵၼ်ႁႅင်းတႄႉ တၢင်းပွၵ်ႉပုင်းထုၼ်၊ လွႆတေႃႇၶမ်း ယဝ်ႉ ၵေႃႈ ထႅင်ႈလၢႆလၢႆပွၵ်ႉ။ ၶီႈၵူမ်ႇၶီႈငႂ်ႈ ၵိုတ်းၶၢင်ႉဝႆႉ ၸွမ်းၼႂ်း ႁိူၼ်းယေးၵေႃႈ ၼမ်ဝႃႈၼမ်ယဝ်ႉ”- ဝႃႈၼႆ။

တႄႇဢဝ် ဝၼ်းတီႈ 10/09/2024 ယၢမ်းၵၢင်ၼႂ် မႄႈၼမ်ႉသၢႆ ၼွင်းလုပ်ႇထူမ်ႈ ပွၵ်ႉပုင်းထုၼ်၊ မၢၵ်ႇၵႃႇႁူဝ်ၶမ်း၊ သၼ်သၢႆး၊ မႄႈၶၢဝ်၊ လွႆတေႃႇၶမ်းလႄႈ ဢိၵ်ႇထႅင်ႈ လၢႆဢွင်ႈတီႈ။ ပွၵ်ႈၼႆႉ လႆႈဝႃႈ မႄႈၼမ်ႉသၢႆ လူၼ်ႉၾင်ႇ ၼွင်းထူမ်ႈႁၢဝ်ႈႁႅင်း လိူဝ်ၵူႈပွၵ်ႈ ဝႃႈၼႆ။

ၵူၼ်းပိုၼ်ႉတီႈ ၽူႈၸၢႆး ၵေႃႉၼိုင်ႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ပွၵ်ႈၼႆႉ ၼမ်ႉႁႅင်း ၼႃႇၶႃႈ ပႃးၵႂႃႇမူတ်းဢေႃႈ ၸွမ်းလၢၼ်ႉပိူၼ်ႈ ၸိူဝ်းၼၼ်ႉ။ ႁိူၼ်းပိူၼ်ႈၵေႃႈ မိူၼ်ၼင်ႇ ၸၼ်ႉတႂ်ႈ၊ ၸၼ်ႉၼိူဝ် ၸိူဝ်းဢၼ်ပိူၼ်ႈပိုတ်ႇလၢၼ်ႉဝႆႉၵေႃႈ ပႃးၵႂႃႇၸွမ်းၼမ် ၸဵမ်ၽၵ်းတူ၊ ရူတ်ႉၵႃး ၸိူဝ်းၼႆႉ ထႅင်ႈ။ ပေႃးပႃး တၢင်းထႅဝ်ပုင်းထုၼ် ၸိူဝ်းၼႆႉတႄႉ မၼ်းတေဢမ်ႇယွမ်း မွၵ်ႈ 40 လင်ၼႆႉၶႃႈ ဢၼ် လူႉၵွႆမၼ်း။ မၢင်တီႈၵေႃႈ လူႉသုမ်းၼမ်၊ မၢင်တီႈၵေႃႈ လူႉသုမ်း ဢေႇ။ ယဝ်ႉၵေႃႈ တင်းပုင်းပုၼ်ၼႆႉ တေမီးလိၼ်ၵူၼ်ႇပႃးလႄႈ ၶႂ်ႈဝႃႈၵွႆၼမ်ဝႆႉၶႃႈဢေႃႈ”- ဝႃႈၼႆ။

ၼမ်ႉထူမ်ႈပွၵ်ႈၼႆႉ လႆႈဝႃႈႁႅင်းလိူဝ်ၵူႈပွၵ်ႈ၊ ၶီႈၵူမ်ႇၶီႈငႂ်ႈ ၸိူဝ်းၼႆႉၵေႃႈ ၵိုတ်းၶမ်ၼမ်ဝႆႉ။ ယွၼ်ႉၼၼ် ၵူၼ်းမိူင်းၶဝ် ဢွၼ်ၵၼ်ထူပ်းတၢင်းယၢပ်ႇ တႃႇတေပတ်းၽဵဝ်ႈၶိုၼ်း ႁႂ်ႈမီးလွင်ႈမူတ်းသႂ် ၼႆယဝ်ႉ။

“ၵူၼ်းမိူင်း တိုၵ်ႉပတ်းၽဵဝ်ႈၼႆႉ တေမီးႁိမ်းတၢင်းလူင် ၸိူဝ်းၼႆႉၵူၺ်း။ ၸိူဝ်းႁိမ်းၵၢတ်ႇတႃႈလေႃႉ၊ ၸွမ်းတၢင်းလူင် ၸိူဝ်းၼႆႉ တိုၵ်ႉမႅၼ်ႈၽွင်း ပတ်းၽဵဝ်ႈမၼ်း။ ၵူႈပွၵ်ႈတႄႉ မၼ်းထူမ်ႈဢိတ်းဢွတ်း ၵူၺ်း။ မိူဝ်ႈလဵဝ်ၼႆႉ မၼ်းထူမ်ႈႁႅင်းၼႆ ၵူမ်ႇၵေႃႈ တေၼမ် လွင်ႈယၢပ်ႇၵေႃႈ ၼမ်ၼၼ်ႉယဝ်ႉ။ မၢင်တီႈ ၼႆႉ ၵူၼ်းႁၢႆၵေႃႈမီး ဢၼ်ပႃးၵႂႃႇၸွမ်းၼမ်ႉၵေႃႈ မီးဢေႃႈ။ လႅင်းၼႅတ်ႇၵေႃႈႁၢႆ ၾႆးၾႃႉၵေႃႈ ၶၢတ်ႇ ဢေႃႈ။ မၼ်းဢမ်ႇၸၢင်ႈလၢတ်ႈၼႄၵၼ်။ ၸွမ်းၸွၵ်ႉၸွမ်းၸဵင်ႇ ဢၼ်ဢမ်ႇပႆႇလႆႈ ၵႂႃႇတူၺ်းၵေႃႈ မီး ဢေႃႈ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း ၽူႈၸၢႆး ၵေႃႉၼိုင်ႈ သိုပ်ႇလၢတ်ႈၼႄၼင်ႇၼႆ။

တေႃႇထိုင် ဝၼ်းမိူဝ်ႈၼႆႉ မိူၼ်ၼင်ႇ ၸွမ်းၵၢတ်ႇတႃႈလေႃႉ၊ ပွၵ်ႉသၼ်သၢႆး၊ ပွၵ်ႉမႄႈၶၢဝ် ၸိူဝ်းၼႆႉ ၼမ်ႉပႆႇယွမ်းမူတ်း။ ယွၼ်ႉၼၼ် ၵူၼ်းမိူင်း ဢွၼ်ၵၼ်ထူပ်းတၢင်းယၢပ်ႇ တႃႇတေၽဵဝ်ႈၵူမ်ႇၽဵဝ်ႈ ဢုင်လႄႈ တႃႇတေမႄးပူၵ်းပွင်ႁိူၼ်းယေး ၸဝ်ႈၵဝ်ႇၶိုၼ်း ၸိူဝ်းၼႆႉ။