မိူဝ်ႈၼႆႉ ဝၼ်းတီႈ 14/09/2024 ယၢမ်းၵၢင်ၶမ်ႈ 6 မူင်း ၼုမ်ႇၸၢႆးဢွၼ်ႇ ဢႃယု 15 ပီ ၵေႃႉၼိုင်ႈ ၺႃးၸုမ်း ဢမ်ႇႁူႉၾၢႆႇ ၸူၼ်ဢဝ်ရူတ်ႉၶိူင်ႈမၼ်းၸၢႆးၵႂႃႇသေဢမ်ႇၵႃး ပၢႆယိုဝ်းတၢႆပႅတ်ႈထႅင်ႈ တီႈၵွင်းၼၢမ်ႇသႃႇ ပွၵ်ႉၵၢတ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆး မႄးရူတ်ႉၶိူင်ႈယဝ်ႉသေ ဢဝ်ၵႂႃႇသူင်ႇပၼ်တီႈ ႁိူၼ်းၸဝ်ႈၶွင်ရူတ်ႉၶိူင်ႈ တီႈပွၵ်ႉၵၢတ်ႇၼၼ်ႉ ၸဝ်ႈႁိူၼ်းသမ်ႉ ဢမ်ႇယူႇ မၼ်းၸၢႆးႁေႃႈရူတ်ႉၶိူင်ႈ ပွၵ်ႈမႃးၶိုၼ်း မႃး ၺႃးၵူၼ်းႁၢႆႉ ၸွမ်းတၢင်းသေ ၸူၼ်ဢဝ်ရူတ်ႉၶိူင်ႈၵႂႃႇ ယဝ်ႉၵေႃႈ ယိုဝ်းမၼ်းၸၢႆး တၢႆၵႂႃႇ ၶႃႈဢေႃႈ”- ဝႃႈၼႆ။
ၼုမ်ႇၸၢႆးဢွၼ်ႇ ဢၼ်ၺႃးယိုဝ်းတၢႆၼၼ်ႉ ၸိုဝ်ႈႁွင်ႉ ၸၢႆးၵွၼ်းၶမ်း ဢႃယု 15 ပီ ပဵၼ်လုၵ်ႈၸၢႆး ၸၢႆးယီႈၸၢၼ်ႇလႄႈ ၼၢင်းသွၼ်း ယူႇမၢၼ်ႈၸၢၼ်းသႃႇ ၸႄႈဝဵင်းမူႇၸေႊ မၼ်းၸၢႆး မႃးႁဵတ်းလုၵ်ႈၼွင်ႉ မႄးရူတ်ႉၶိူင်ႈ ယူႇဝႆႉ တီႈပွၵ်ႉၵၢတ်ႇ ဝဵင်းမူႇၸေႊ မီးၶၢဝ်းတၢင်းမွၵ်ႈ 2 ပီယဝ်ႉ။
ယၢမ်းလဵဝ် ၶၢပ်ႈတူဝ် ၸၢႆးၵွၼ်းၶမ်းၼႆႉ လႆႈသူင်ႇဝႆႉတီႈႁူင်းယႃ ဝဵင်းမူႇၸေႊယဝ်ႉ မၼ်းၸၢႆး ၺႃးယိုဝ်း တီႈႁူဝ်ဢူၵ်းသေ လူႉတၢႆ ၵူၺ်းၵႃႈ ၺႃးယိုဝ်းလၢႆၵမ်းတႄႉ ပႆႇႁူႉ ယူႇတီႈ ပလိၵ်ႈၶဝ် တိုၵ်ႉၵူတ်ႇထတ်း တူၺ်းယူႇ – ၵူၼ်းပိုၼ်ႉတီႈ မူႇၸေႊလၢတ်ႈ။
