သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇထႅင်ႈ တီႈဝဵင်းလႃႈသဵဝ်ႈ တိူဝ်ႉၺႃးမိူင်းၵူၼ်း လူႉတၢႆ 5 မၢတ်ႇၸဵပ်း 8 ၼႂ်း ၼၼ်ႉ ၵူၼ်းမၢတ်ႇၸဵပ်း တႃႇ 3 ၵေႃႉ ပဵၼ်ဢၼ်မႆႈၸႂ်ဝႆႉ။
ဝၼ်းတီႈ 13/09/2024 ယၢမ်းၵၢင်ၶမ်ႈ 7 မူင်းပၢႆ သိုၵ်းမၢၼ်ႈ ယိုတ်းမိူင်း တင်ႈၸႂ် ဢဝ်ၶိူင်ႈမိၼ်မႃးပွႆႇမၢၵ်ႇထႅင်ႈ တီႈဝၢၼ်ႈၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းၵၢင်ၶမ်ႈ 7:06 မူင်းၼႆႉ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝၢၼ်ႈၼမ်ႉပွင်ႈ တိူဝ်ႉၺႃး ၵူၼ်းမိူင်းလူႉတၢႆ ထင်တီႈ 5 ၵေႃႉ မၢတ်ႇ ၸဵပ်း 8 ၵေႃႉ။ ယၢမ်းလဵဝ် ၵူၼ်းမၢတ်ႇၸဵပ်းတႄႉ လႆႈသူင်ႇယူတ်းယႃ ဝႆႉတီႈႁူင်းယႃ ယဝ်ႉ”- ဝႃႈၼႆ။
လိူဝ်ၼၼ်ႉ မၢၵ်ႇၶိူင်ႈမိၼ် သိုၵ်းမၢၼ်ႈ တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈၼမ်ႉပွင်ႈလူႉၵွႆထႅင်ႈ 2 လင် ဝႃႈၼႆ။
“ယၢမ်းလဵဝ် တီႈဝဵင်းလႃႈသဵဝ်ႈ ႁဝ်းၶႃႈၼႆႉ ၼွၼ်းယူႇၼႂ်းႁိူၼ်းသေတႃႉၵေႃႈ တိုၵ်ႉလႆႈမႆႈၸႂ် ၵူဝ်ၶိူင်ႈမိၼ် မႃးပွႆႇမၢၵ်ႇ ၼၼ်ႉၵူၺ်းၶႃႈယဝ်ႉ တၢင်းၼွၼ်းတၢင်းလႆႈၾၢင်ႉ ယူႇတႃႇသေႇၼၼ်ႉယဝ်ႉၶႃႈ”- ၵူၼ်းပိုၼ်ႉ တီႈဝဵင်းလႃႈသဵဝ်ႈ သိုပ်ႇလၢတ်ႈၼႄ ၼင်ႇၼႆ။
မိူဝ်ႈဝၼ်းတီႈ 09/09/2024 ယၢမ်းၵၢင်ၶိုၼ်း 12 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ တီႈထုင်ႉၼမ်ႉပွင်ႈတင်း ၼမ်ႉမပေႃးတ ၸိူဝ်းၼႆႉ ၸႅၵ်ႇမၢၵ်ႇတိူဝ်ႉသႂ်ႇ ႁိူၼ်းယေး လူႉၵွႆၸွမ်းလၢႆလင်။ ၼႂ်းၶိုၼ်းၼၼ်ႉၵူၺ်း မႃးပွႆႇထႅင်ႈ တီႈပွၵ်ႉ 1 ၼႂ်းဝဵင်းလႃႈသဵဝ်ႈ တိူဝ်ႉသႂ်ႇၵူၼ်းမိူင်း လူႉတၢႆ 1 ၵေႃႉ မၢတ်ႇၸဵပ်း 12 ၵေႃႉ။ ယဝ်ႉ ၵေႃႈ ႁိူၼ်းယေး လူႉၵွႆၸွမ်း ၵမ်ႈၽွင်ႈ။ မိူဝ်ႈဝၼ်းတီႈ 8 ၼၼ်ႉၵေႃႈ သိုၵ်းမၢၼ်ႈ မႃးပွႆႇမၢၵ်ႇ တီႈပွၵ်ႉ 12 တီႈ Silver Sky Hotel တိူဝ်ႉႁိူၼ်းယေး ၵူၼ်းမိူင်းလူႉၵွႆ ၵမ်ႈၽွင်ႈ။
ၼႂ်းလိူၼ်သႅပ်ႊထႅမ်ႊပိူဝ်ႊၼႆႉၵူၺ်း သိုၵ်းမၢၼ်ႈ မႃးပွႆႇမၢၵ်ႇ တီႈဝဵင်းလႃႈသဵဝ်ႈၼႆႉ ဢမ်ႇယွမ်း 3 ပွၵ်ႈယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ