ၾူၼ်တူၵ်းထပ်းၵၼ် လၢႆဝၼ်းသေ ႁဵတ်းႁႂ်ႈၼမ်ႉႁူၺ်ႈ/ လွႆ လႆလူင်းၶွၼ်ႈ မႄႈၼမ်ႉၸေႃႇၵျီႇသေ လူၼ်ႉၾင်ႇ ၼွင်းထူမ်ႈ သူၼ်ႁႆႈၼႃး ၵူၼ်းမိူင်းလွၵ်ႉၸွၵ်ႇ လူႉသုမ်းမွၵ်ႈ 30 ဢေႊၶိူဝ်ႊလႄႈ ႁိူၼ်းယေးထႅင်ႈ တင်းၼမ်။
ဝၼ်းတီႈ 10/09/2024 ယၢမ်းၵၢင်ၼႂ် မႄႈၼမ်ႉၸေႃႇၵျီႇ လူၼ်ႉၾင်ႇလုပ်ႇၼွင်းထူမ်ႈႁႅင်း ၸွမ်းပွၵ်ႉၸေႃႇၵျီႇ၊ ဝၢၼ်ႈ ၸလၢႆး၊ ဝၢၼ်ႈႁူၺ်း၊ ဝၢၼ်ႈၵုင်းထုၼ်၊ ဝၢၼ်ႈတိုဝ်ႉသၢႆးလႄႈ ဝၢၼ်ႈမိတ်ႉၵူတ်ႉ ဢိၵ်ႇထႅင်ႈ လၢႆပိုၼ်ႉတီႈ ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း ၼႆယဝ်ႉ။
ၵူၼ်းလွၵ်ႉၸွၵ်ႇ ၽူႈၸၢႆး ဢႃယု 30 ပၢႆ လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉၸေႃႇၵျီႇ လုပ်ႇထူမ်ႈၶႃႈဢေႃႈ။ ၸူဝ်ႈၵႃႈ ယႂ်ႇမႃးၼႆႉ လႆႈႁၼ်ၼမ်ႉထူမ်ႈ ႁၢဝ်ႈႁႅင်း တီႈလွၵ်ႉၸွၵ်ႇ ၸိူင်ႉၼႆၼႆႉ တိုၵ်ႉမီးမႃး 2 ပွၵ်ႈၼႆႉၵူၺ်း ။ ပွၵ်ႈၼႆႉ ၼမ်ႉလုပ်ႇထူမ်ႈႁႅင်း တီႈပွၵ်ႉၸေႃႇၵျီႇၼၼ်ႉ ႁိူၼ်းယေး ဢၼ်ၺႃးၼမ်ႉထူမ်ႈၼၼ်ႉ တေမီး လင်ႁိူၼ်း 1,000 ပၢႆ ပွၵ်ႉၼႆႉသမ်ႉ ယူႇႁိမ်းၾင်ႇၼမ်ႉ ယဝ်ႉၵေႃႈ ပဵၼ်ပိုၼ်ႉတီႈတႅမ်ႇ၊ ၼမ်ႉထူမ်ႈ လိုၵ်ႉပဵင်းႁူဝ် ၽႅဝ်ၸွမ်ႁိူၼ်း ၸိူဝ်းၼႆႉဢေႃႈ။ လိူဝ်ၼၼ်ႉ ၸွမ်းဝၢၼ်ႈၼွၵ်ႈၼႃးပၢင်ႇထႅင်ႈ”- ဝႃႈၼႆ။
ယွၼ်ႉမႄႈၼမ်ႉၸေႃႇၵျီႇ လုပ်ႇထူမ်ႈ ၸိူင်ႉၼႆသေ တုမ်ႉတိူဝ်ႉတူင်ႈၼႃးလႄႈ သူၼ်ၶဝ်ႈၵၢပ်ႇ ၵူၼ်းမိူင်း လူႉသုမ်းမွၵ်ႈ 30 ဢေႊၶိူဝ်ႊ ဝႃႈၼႆ။
“ယွၼ်ႉၼမ်ႉထူမ်ႈၼႆႉသေ တူၼ်ႈၶဝ်ႈၵၢပ်ႇ လူမ်ႉတိူၵ်ႈလိၼ် လႆထွင်းၸွမ်းၼမ်ႉၼႆႉ မီးတင်းၼမ်ယဝ်ႉ ပေႃးၼပ်ႉသွၼ်တူၺ်းတႄႉ မွၵ်ႈ 20 ဢေႊၶိူဝ်ႊၼႆႉ။ တေႃႈလဵဝ် သူၼ်ၶဝ်ႈၵၢပ်ႇၼႆႉ တိုၵ်ႉပဵၼ်ၽွင်းၼုမ်ႇယူႇလႄႈ ယဝ်ႉၵေႃႈ တူင်ႈၼႃး ၵူၼ်းမိူင်းထႅင်ႈမွၵ်ႈ 10 ဢေႊၶိူဝ်ႊ ႁူမ်ႈၵၼ် တင်းမူတ်းမွၵ်ႈ 30 ဢေႊၶိူဝ်ႊ ၼႆႉၶႃႈ ဢၼ်လူႉသုမ်းၼႆႉ”- ၵူၼ်းလွၵ်ႉၸွၵ်ႇ သိုပ်ႇလၢတ်ႈၼႄၼင်ႇၼႆ။
သူၼ်ၶဝ်ႈၵၢပ်ႇ၊ တူင်းၼႃး ၵူၼ်းမိူင်း ဢၼ်ၺႃးၼမ်ႉၸေႃႇၵျီႇ လုပ်ႇထူမ်ႈၼႆႉသမ်ႉ ပဵၼ်ၶွင်ၵူၼ်းဝၢၼ်ႈႁူၺ်း၊ ဝၢၼ်ႈ ၸလၢႆး၊ ဝၢၼ်ႈမိတ်ႉၵူတ်ႉ၊ ဝၢၼ်ႈပုင်းထုၼ်၊ ဝၢၼ်ႈတိုဝ်ႉသၢႆးလႄႈ ဢိၵ်ႇထႅင်ႈလၢႆပိုၼ်ႉတီႈ ၼႆယဝ်ႉ။
လိူဝ်သေ ဝဵင်းလွၵ်ႉၸွၵ်ႇယဝ်ႉ မိူၼ်ၼင်ႇ ၸဝ်ႈသူၼ်ႁႆႈၼႃး တၢင်းဝဵင်းလၢႆးၶႃႈ ၼၼ်ႉၵေႃႈ ဢွၼ်ၵၼ်မႆႈ ၸႂ်ႁႅင်းၵူဝ် ၼမ်ႉတဵင်း လုပ်ႇထူမ်ႈသူၼ်ႁႆႈၼႃး လူႉၵွႆၼမ်။
ၸဝ်ႈၼႃး ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉတဵင်း ဢၼ်ထူမ်ႈတီႈမိူင်းၵိုင်ၼၼ်ႉ ၵူဝ်မၼ်းမႃး ယိုင်ႈထူမ်ႈတီႈလၢႆးၶႃႈၼႆႉသေ မႆႈၸႂ်ၵူဝ်လုပ်ႇထူမ်ႈ တူင်ႈၼႃး သူၼ်ၶဝ်ႈၵၢပ်ႇၼၼ်ႉၶႃႈယဝ်ႉ။ ပေႃးမၼ်း ယိုင်ႈထူမ်ႈ 2-3 ၸူဝ်ႈမူင်းတႄႉ ႁဝ်းၶႃႈ ဢမ်ႇပေႃးမႆႈၸႂ်။ ပေႃးမၼ်းထူမ်ႈ 3-4 ဝၼ်းတႄႉ တူၼ်ႈၶဝ်ႈ၊ တူၼ်ႈၶဝ်ႈၵၢပ်ႇ ၸိူဝ်းၼႆႉတႄႉ တေၼဝ်ႈပႅတ်ႈသုမ်းမူတ်းၶႃႈယဝ်ႉ။ ၸွမ်းၾင်ႇၼမ်ႉတဵင်းၼၼ်ႉသမ်ႉ ပိူၼ်ႈၽုၵ်ႇၶဝ်ႈၵၢပ်ႇတင်းသွင်ၾင်ႇလူး”- ဝႃႈၼႆ။
ယၢမ်းလဵဝ် ၼႂ်းမိူင်းတႆးပွတ်းၸၢၼ်းၼႆႉ ၺႃးၼမ်ႉလုပ်ႇထူမ်ႈ ႁၢဝ်ႈႁႅင်း မိူၼ်ၼင်ႇ – ဝဵင်းလၢင်းၶိူဝ်း၊ မိူင်းၼၢႆး၊ မိူင်းပၼ်ႇ၊ ၵဵင်းတွင်း၊ ပၢင်လွင်း၊ ဢွင်ႇပၢၼ်း၊ ၵၢတ်ႇလေႃႉ၊ တူၼ်ႈတီး၊ ၼမ်ႉၸၢင်၊ မိူင်းၵိုင်၊ ထုင်ႉပူင်း၊ သီႇသႅင်ႇ၊ ႁူဝ်ပူင်း၊ မိူင်းပွၼ်၊ ယွင်ႁူၺ်ႈ၊ သူၺ်ႇၺွင်ႇ၊ ၵုၼ်ႁဵင် ၸိူဝ်းၼႆႉ။ ယဝ်ႉၵေႃႈ တၢင်းဝဵင်းၼမ်ႉလၼ်ႈ၊ ၵျွၵ်ႉမႄးလႄႈ ဢိၵ်ႇထႅင်ႈလၢႆပိုၼ်ႉတီႈ။
ၼွၵ်ႈလိူဝ်မိူင်းတႆးယဝ်ႉ တၢင်းမိူင်းမၢၼ်ႈထုင်းပဵင်းသမ်ႉ မိူၼ်ၼင်ႇ – ဝဵင်းၼေႇပျီႇတေႃႇ၊ တပ်ႉၵူင်း၊ ပၢင်မၢၵ်ႇၼႃႉ (ပျိၼ်းမၼႃး)လႄႈ ဢိၵ်ႇထႅင်ႈလၢႆပိုၼ်ႉတီႈ ၼႆယဝ်ႉ။
