သိုၵ်းမၢၼ်ႈ မိူင်းယႆ ထႅမ်ႁႅင်းသိုၵ်း တင်ႈၵွင်ႈလူင် တီႈဝဵင်းမိူင်းယႆ ၵူၼ်းမိူင်းၵူဝ်ပၢင်တိုၵ်း လၢမ်းထိုင် မႃးၵူၺ်းယဝ်ႉ ဝႃႈၼႆ။
ဝၼ်းတီႈ 10/09/2024 သိုၵ်းမၢၼ်ႈ ထႅမ်ႁႅင်းသိုၵ်း ၶိုၼ်ႈမႃးမိူင်းယႆ တႃႇရူတ်ႉၵႃး 10 လမ်းပၢႆ ႁၢင်ႈႁႅၼ်း ၶိူင်ႈၵွင်ႈၵၢင်ႇ ဝၢႆႇပၢၵ်ႇၵွင်ႈၵႂႃႇတၢင်းပိုၼ်ႉတီႈသိုၵ်းၵဝ်ႈၵၢင်ႉ ယူႇသဝ်း။ ၵူၼ်းမိူင်းၵူဝ် ပၢင်တိုၵ်း လၢမ်းထိုင်မိူင်းယႆ၊ ၵူၼ်းတၢင်ႇတီႈ ၸိူဝ်းပၢႆႈၽေးသိုၵ်း မီးဝႆႉတီႈမိူင်းယႆၵေႃႈ ဢွၼ်ၵၼ်သိုပ်ႇပၢႆႈထႅင်ႈ ဝႃႈၼႆ။
ၽူႈၸၢႆး ဢႃယု မွၵ်ႈ 40 ပီ ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝၼ်းသိုၼ်း သိုၵ်းမၢၼ်ႈမႃးတင်ႈ မၢၵ်ႇလူင် ၾၢႆႇတၢင်းတူၵ်းဝဵင်းမိူင်းယႆ တၢင်းၵွင်းၼမ်ႉမႃ – ၾၢႆႇတူၵ်းၼမ်ႉလွင်း။ တၢင်းၵုင်းဝႅတ်ႈ ၼမ်ႉမေႃႈတွင်းသမ်ႉ မီးသိုၵ်း ၶႄႇၵဝ်ႈၵၢင်ႉ။ ၵူၼ်းမိူင်းလႄႈ ၵၢင်ႉၵႄႇ ၾၢႆႇၽွင်းငမ်း တၢင်းၼွၵ်ႈတၢင်းၼႂ်း ဢွၼ်ၵၼ်ၵႂႃႇလၢတ်ႈၵႂႃႇႁၢမ်ႈ ယႃႇႁႂ်ႈသိုၵ်းမၢၼ်ႈယိုဝ်း။ ၵူၺ်းၵႃႈ မိူဝ်းဝႃး လႆႈငိၼ်းသဵင်မၢၵ်ႇ၊ ဢၼ်လုၵ်ႉ တီႈၵွင်ႈလူင်သေယိုဝ်းၵေႃႈပႃး ဢၼ်ဢဝ်ၻရူၼ်ႊသေ မႃးပွႆႇၵေႃႈမီး။ ယိုဝ်းၵၼ်တႄႉ ဢမ်ႇၸႂ်ႈၼင်ႇၵဝ်ႇ ။ မိူၼ်ၶဝ်ယိုဝ်းလွၵ်ႇၵၼ်ဝႆႉ။ လွင်ႈတုမ်ႉတိူဝ်ႉ ၵူၼ်းပိုၼ်ႉတီႈတႄႉ ဢမ်ႇမီး ၵူၺ်းၵႃႈ မႆႈၸႂ် ၵူဝ်ပၢင်တိုၵ်း လၢမ်းၽႄႈမႃးၵူၺ်းယဝ်ႉ။ ၵူၼ်းမိူင်းၸိူဝ်းယူႇႁိမ်းၶႅပ်ႇဝဵင်းလႄႈ ၵူၼ်းပၢႆႈၽေးသိုၵ်း ၸိူဝ်းမႃးသွၼ်ႈဝႆႉ တီႈမိူင်းယႆၵေႃႈ ဢွၼ်ၵၼ်ပၢႆႈထႅင်ႈ”- ဝႃႈၼႆ။
လုၵ်ႉတီႈမိူင်းယႆ မႃးထိုင်ၵွင်းၼမ်ႉမႃ ၾၢႆႇတူၵ်းဝဵင်း ပဵၼ်သိုၵ်းမၢၼ်ႈလွၼ်ႉလွၼ်ႉ။ သႂ်ႇၶူဝ်းလၢႆး တိုဝ်းမၢၵ်ႇႁူဝ်လဵၵ်း – ၵူၼ်းမိူင်းလၢတ်ႈဝႃႈ လႅပ်ႈပဵၼ်တပ်ႉဢၼ်လုၵ်ႉတၢင်းမိူင်းမၢၼ်ႈ တူင်ႈပဵင်းၶိုၼ်ႈမႃး ဝႃႈၼႆ။
ၼၢင်းယိင်း ၵူၼ်းပိုၼ်ႉတီႈ လၢတ်ႈဝႃႈ – “လၢႆးသိုၵ်းမၢၼ်ႈ တူင်ႉၼိုင်ၼႆႉ မၢင်ၵမ်းၵေႃႈ မိူၼ်ၶႂ်ႈႁူၺ်းၸၼ် ပၢင်တိုၵ်း မႃးတၢင်းမိူင်းယႆဝႆႉ”- ဝႃႈၼႆ။
သိုၵ်းမၢၼ်ႈ ၸိူဝ်းၼႆႉ ၵႂႃႇပႂ်ႉပႃး တင်းဝၢၼ်ႈၼႃးၵႅင်း၊ ၼႃးယၢင်း၊ ၼွင်ပဵတ်း ထုင်ႉတၢင်းတူၵ်းဝဵင်းမိူင်းယႆသေ ပႂ်ႉၸွမ်းတႃႈၸွမ်းတၢင်း တင်ႈၵဵတ်ႉ/ လၢၼ်ႇ ၵူတ်ႇထတ်းရူတ်ႉၵႃးၵႂႃႇမႃး ႁၢမ်ႈၵၢၼ်တေႃႉသူင်ႇ ၶူဝ်းၵုၼ်ႇၵိၼ်ယႅမ်ႉ။
ၵူၼ်းၸၢႆး ၵူၼ်းပိုၼ်ႉတီႈ လၢတ်ႈထႅင်ႈဝႃႈ -“သိုၵ်းမၢၼ်ႈ ဢၼ်လူင်းၵႂႃႇတၢင်းတူၵ်း မိူင်းယႆၼႆႉ ၶဝ်ဢမ်ႇပၼ်တေႃႉတၢင်ႇၼမ်ႉမၼ်း ၶဝ်ႈၼမ်ႉတၢင်းၵိၼ်ၵႂႃႇမႃး။ ယွၼ်ႉဝႃႈ သဵၼ်ႈတၢင်းၼၼ်ႉ ပွင်ႇထိုင်ဝဵင်းလႃႈသဵဝ်ႈ။ ၶဝ်ၸၢင်ႈလႆႈသဵၼ်ႈတၢင်းတေႃႇသူင်ႇႁင်းၶဝ် လႅပ်ႈတႃႇတေထူဝ်းသိုၵ်းတေႃႇလႃႈသဵဝ်ႈ။ ၵွပ်ႈၼႆၶဝ် တမ်းတီႈယူႇၶဝ် တင်ႈတပ်ႉၶဝ်”- ဝႃႈၼႆ။
ယၢမ်းလဵဝ် တီႈၸႄႈဝဵင်းမိူင်းယႆ သဵင်ၵွင်ႈသဵင်မၢၵ်ႇ ဢမ်ႇငိၼ်းသေတႃႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ၶဵင်ႈၶႅင်ၵၢၼ်သိုၵ်းၵၼ်ဝႆႉ ဝႃႈၼႆ။
ၵၢင်လိူၼ်ၵျူႊလၢႆႊမႃးၼႆႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈဢိူင်ႇႁူဝ်ယ ၸႄႈဝဵင်းမိူင်းယႆ။ သိုၵ်း SSPP/SSA ၵေႃႈ မႃးတူင်ႉၼိုင်ဝႆႉ တီႈမိူင်းယႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ