ၼမ်ႉသၢႆ လုပ်ႇထူမ်ႈ ဝဵင်းတႃႈၶီႈလဵၵ်း – မႄႈသၢႆ ႁၢဝ်ႈႁႅင်း

သွင်ဝၼ်းထပ်းၵၼ်မႃးၼႆႉ မႄႈၼမ်ႉသၢႆ ၼွင်းလုပ်ႇထူမ်ႈ ၼႂ်းဝဵင်းတႃႈၶီႈလဵၵ်း – မႄႈသၢႆ လႅၼ်လိၼ်တႆး – ထႆး ႁၢဝ်ႈႁႅင်း မၢင်ဢွင်ႈတီႈ ၼမ်ႉလိုၵ်ႉပူၼ်ႉႁူဝ်ၵူၼ်းလႄႈ ၸွမ်ႁိူၼ်း ၸိူဝ်းၼႆႉ။

တႄႇဢဝ် ဝၼ်းတီႈ 10/09/2024 ယၢမ်းၵၢင်ၼႂ် တေႃႇထိုင် မိူဝ်ႈၼႆႉ ဝၼ်းတီႈ 11 မႄႈၼမ်ႉသၢႆ ၼွင်းလုပ်ႇ ထူမ်ႈ ပွၵ်ႉပုင်းထုၼ်၊ မၢၵ်ႇၵႃႇႁူဝ်ၶမ်း၊ သၼ်သၢႆး၊ မႄႈၶၢဝ်လႄႈ ဢိၵ်ႇထႅင်ႈ လၢႆဢွင်ႈတီႈ ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇၶူင်း ယဝ်ႉၵေႃႈ တၢင်းဝဵင်းမႄႈသၢႆ ၾင်ႇမိူင်းထႆးၵေႃႈ ထူမ်ႈႁႅင်း မိူၼ်ၵၼ် ဝႃႈၼႆ။

ၵူၼ်းဝဵင်းတႃႈၶီႈလဵၵ်း ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် ၼမ်ႉပႆႇယွမ်းသေ ဢိတ်းၶႃႈ။ တႄႇဢဝ် ႁူဝ်ၶူဝ်မၢႆ 1 ထိုင် မၢႆ 2 ၼၼ်ႉ ၼမ်ႉထူမ်ႈၵူႈတီႈယဝ်ႉ။ လႆႈငိၼ်းဝႃႈ လွႆၵေႃႈ ၵူၼ်ႇၼႆဢေႃႈ။ မၢင်တီႈ ၼမ်ႉၼႆႉ လိုၵ်ႉပူၼ်ႉႁူဝ်၊ ပဵင်းဢႅဝ်၊ ပဵင်းဢူၵ်း ၸိူဝ်းၼႆႉ။ တၢင်းမႄႈသၢႆၵေႃႈ ထူမ်ႈႁႅင်းဢေႃႈ။ ၵူၺ်းၵႃႈ ဢၼ်ထူမ်ႈ ႁႅင်းတႄႉ တၢင်းတႃႈၶီႈလဵၵ်းၼႆႉဢေႃႈ။ လွင်ႈလူႉသုမ်း ၶူဝ်းႁိူၼ်းယေးတႄႉ ဢမ်ႇၸၢင်ႈဝႃႈႁိုဝ်ယဝ်ႉၶႃႈ” – ဝႃႈၼႆ။

ယၢမ်းလဵဝ် တီႈၶူဝ်မၢႆ 1 တႃႈၶီႈလဵၵ်းၼႆႉ ၼမ်ႉသၢႆလုပ်ႇထူမ်ႈ ထိုင်ၼိူဝ်ၶူဝ်ယဝ်ႉ ၵူႈပွၵ်ႈတႄႉ သင်ၼမ်ႉသၢႆ ၼွင်းႁႅင်း ၸိုင် တေထူမ်ႈထိုင် တွင်ႉၶူဝ်မွၵ်ႈၼၼ်ႉၵူၺ်း ဝႃႈၼႆ။

“တီႈတႃႈၶီႈလဵၵ်းၼႆႉ ၸိူဝ်းႁိူၼ်းသွင်သၢမ်ၸၼ်ႉတႄႉ ပိူၼ်ႈဢွၼ်ၵၼ် ၶၢႆႉၶိုၼ်ႈယူႇ ၸၼ်ႉၼိူဝ်။ ၸၼ်ႉတႂ်ႈတႄႉ ဢမ်ႇၸၢင်ႈယူႇယဝ်ႉ ၼမ်ႉထူမ်ႈမူတ်းဢေႃႈ။ ယၢမ်းလဵဝ် တီႈၶူဝ်မၢႆ 1 လႄႈ ဝူင်းဝဵၼ်း ၸိူဝ်းၼၼ်ႉၵေႃႈ ထူမ်ႈမူတ်း။ ၵူႈပွၵ်ႈ ဢမ်ႇထူမ်ႈလူး ဢွင်ႈတီႈ ၸိူဝ်းၼၼ်ႉ။ တီႈၵၢတ်ႇတႃႈလေႃႉတႄႉ ဢမ်ႇၸၢင်ႈဝႃႈ ႁိုဝ်ယဝ်ႉ။ ၼမ်ႉတႄႉလႆလူတ်ႈလူတ်ႈ ၸိူင်ႉၼၼ်ယဝ်ႉၶႃႈ။ ယဝ်ႉၵေႃႈ ၾႆးၾႃႉ၊ ဢိၼ်ႊထိူဝ်ႊၼႅတ်ႊ ၸိူဝ်းၼႆႉၵေႃႈ ၶၢတ်ႇဝႆႉဢေႃႈ”- ၵူၼ်းဝဵင်းတႃႈ ၶီႈလဵၵ်း သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ တၢင်းဝဵင်းမႄႈသၢႆ ၾင်ႇမိူင်းထႆး ၼၼ်ႉၵေႃႈ ၼမ်ႉသၢႆ ၼွင်းလုပ်ႇထူမ်ႈ ႁၢဝ်ႈႁႅင်း လွင်ႈလူႉသုမ်းၵေႃႈ မီးၼမ်မိူၼ်ၵၼ် ဝႃႈၼႆ။  

ၵူၼ်းဝဵင်းမႄႈသၢႆ ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ပေႃးထႅဝ်တၢင်းၵေႃႉသၢႆး၊ မႆႉယုင်းၶူၼ် ၵႂႃႇတၢင်းၼၼ်ႉတႄႉ ၼမ်ႉလိုၵ်းထူမ်ႈႁူဝ်၊ ပဵင်းၶေႃး၊ ပဵင်းဢူၵ်း ၸိူဝ်းၼႆႉဢေႃႈ ယွၼ်ႉယူႇၸမ် ၾင်ႇၼမ်ႉလႄႈ ၸိူဝ်း ႁိူၼ်းယေး 2 ၸၼ်ႉတႄႉ ၸၼ်ႉတႂ်ႈၼၼ်ႉ ထူမ်ႈမူတ်းဢေႃႈ။ ၵူၼ်းမိူင်းတႄႉ ၵမ်ႈၼမ် ပၢႆႈၵႂႃႇသွၼ်ႈဝႆႉ ဢွင်ႈတီႈလွတ်ႈၽေးယဝ်ႉ”- ဝႃႈၼႆ။

ၼႂ်းပီၼႆႉ မႄႈၼမ်ႉသၢႆ ၼွင်းထူမ်ႈ ၼႂ်းဝဵင်းတႃႈၶီႈလဵၵ်း – မႄႈသၢႆၼႆႉ ဢမ်ႇယွမ်း 6 ပွၵ်ႈယဝ်ႉ။ ႁဵတ်းႁႂ်ႈ ၶူဝ်းၶွင် ႁိူၼ်းယေး ၵူၼ်းမိူင်းလူႉသုမ်း တင်းၼမ်လၢႆ။ ဢိင်ၼိူဝ် လွင်ႈၼမ်ႉသၢႆထူမ်ႈၼႆႉ ယွၼ်ႉလူင်ပွင် တင်းသွင်ၾၢႆႇ ဢမ်ႇလၢင်း ႁွင်ႈၼမ်ႉ၊ ပွႆႇႁႂ်ႈႁွင်ႈၼမ်ႉတိုၼ်ႈ ယဝ်ႉၵေႃႈ ၵူၼ်းမိူင်းသမ်ႉ ပႅတ်ႈယုၵ်းယၢၵ်း သႂ်ႇထႅင်ႈၵေႃႈၼမ်။ ယဝ်ႉၵေႃႈ ၵူၼ်းမိူင်းတင်းသွင်ၾင်ႇသမ်ႉ ႁဵတ်းႁိူၼ်းၶႂၢၵ်ႈၶဝ်ႈမႃး ၼႂ်းမႄႈၼမ်ႉသၢႆသေ ႁဵတ်းႁႂ်ႈႁွင်ႈၵႅပ်ႈလူင်း ၸိူဝ်းၼႆႉၵေႃႈပႃး – ၵူၼ်းပိုၼ်ႉတီႈ ဝဵင်းတႃႈၶီႈလဵၵ်းလၢတ်ႈ။

ၼွၵ်ႈလိူဝ်သေ ဝဵင်းတႃႈၶီႈလဵၵ်းၼႆႉယဝ်ႉ မိူၼ်ၼင်ႇ – ၸႄႈဝဵင်းၵဵင်းတုင်၊ မိူင်းသၢတ်ႇ၊ မိူင်းတူၼ်၊ မိူင်း ယွင်း၊ မိူင်းပွၵ်ႉ၊ ပၢင်သၢင်း၊ မိူင်းလႃး ၼႂ်းၸိုင်ႈတႆးပွတ်းဢွၵ်ႇၶူင်း ၸိူဝ်းၼႆႉၵေႃႈ ထူမ်ႈႁႅင်း။ ယဝ်ႉၵေႃႈ ၼႂ်းၸိုင်ႈတႆးပွတ်းၸၢၼ်းလႄႈ ပွတ်းႁွင်ႇ ၸိူဝ်းၼႆႉထႅင်ႈ။