ပီၼႆႉ လုၵ်ႈဢွၼ်ႇႁဵၼ်းႁႅင်းၵၢၼ်တႆး လႆႈၶဝ်ႈႁပ်ႉဝႂ်ယုၵ်ႉယွင်ႈ ၼႂ်းပွႆးလူင်းပၢင်သွၼ်လိၵ်ႈတႆး ၶၢဝ်းပွတ်း တီႈၸႄႈတွၼ်ႈၵဵင်းမႂ်ႇ ၸိုင်ႈထႆး ဢမ်ႇယွမ်း 70 ၵေႃႉ ဝႃႈၼႆ။
ဝၼ်းတီႈ 08/09/2024 ယၢမ်းဝၢႆးဝၼ်း 1 မူင်း ထိုင် 4 မူင်း ယူႇတီႈ ႁွင်ႈၵၢၼ်လူင် တိတ်းတေႃႇထႆးလႄႈ ႁွင်ႈၵၢၼ်လူင် ၾၢႆႇပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး RCSS ႁူမ်ႈလူၺ်ႈ သင်ၶၸဝ်ႈ၊ ၶူးသွၼ်/ မေႃသွၼ်သေ ၸတ်းႁဵတ်းပွႆးလူင်းပၢင်သွၼ်လိၵ်ႈတႆး ၶၢဝ်းပွတ်း ပီ 2024 တီႈဝတ်ႉၵူႇမၢၼ်ႉ မူင်းၶူၼ်းၶျႆး ၸႄႈဝဵင်းလွႆသၵဵတ်း ၸႄႈတွၼ်ႈၵဵင်းမႂ်ႇ ၸိုင်ႈထႆး။
မေႃသွၼ် ၼၢင်းႁွမ် ႁူင်းႁဵၼ်း ဝတ်ႉသီဝူဝ်ငိုၼ်း လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ လုၵ်ႈႁဵၼ်းၶဝ်ႈႁပ်ႉ ဝႂ်ယုၵ်ႉယွင်ႈ 73 ၵေႃႉ ၶူးသွၼ် 14 ၵေႃႉ။ ယဝ်ႉၵေႃႈ ယိၼ်းၸူမ်းၶွပ်ႇၸႂ်ထိုင် ၽူႈၵွၼ်းဝတ်ႉၵူႇမၢၼ်ႉ၊ ႁူဝ်ပဝ်ႈလူင် ၸွမ်သိုၵ်းလူင် ယွတ်ႈသိုၵ်း RCSS ၊ ၽူႈယႂ်ႇၵူၼ်းလူင်၊ ၶူးသွၼ်/ မေႃသွၼ်၊ ၵုမ်ႇႁိူၼ်းႁူမ်ႈႁၵ်ႉလႄႈ ၽူႈၶဝ်ႈႁူမ်ႈတင်းမူတ်းၶႃႈ”- ဝႃႈၼႆ။
ပွႆးလူင်းပၢင်သွၼ်လိၵ်ႈတႆး ၶၢဝ်းပွတ်း ပီ 2024 ၼႆႉ ယူႇတီႈ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် ၶွင်ႇသီႇဢဝ် ၶိုၼ်းၸိုင်ႈတႆး RCSS ၶဝ်ႈႁူမ်ႈမွၵ်ႇလၢတ်ႈၶေႃႈၵႂၢမ်းသေ မွပ်ႈယိုၼ်ႈဝႂ်ယုၵ်ႉယွင်ႈ တွၼ်ႈသူးထိုင် လုၵ်ႈႁဵၼ်းလႄႈ ၶူးသွၼ်။
ပၢင်သွၼ်လိၵ်ႈတႆး ဢၼ်လႆႈပူင်သွၼ်မႃး ၼႂ်းပီ 2024 ၼႆႉ မိူၼ်ၼင်ႇ – ဝတ်ႉသီဝူဝ်ငိုၼ်း၊ ဝၢၼ်ႈမႂ်ႇတႆး မၼ်ႈၵိုမ်း ပႃႇၽႆႇမိူင်းၵႅဝ်ႈ၊ ဝၢၼ်ႈပူင်ႇယဵင်းၼွၵ်ႈ ၼႂ်းၸႄႈတွၼ်ႈၵဵင်းမႂ်ႇလႄႈ ဝတ်ႉသၼ်ပႃႇႁဵင် ၸႄႈတွၼ်ႈလမ်းပုၼ်း ၸိုင်ႈထႆး ၸိူဝ်းၼႆႉ။
“ယွၼ်းၾၢၵ်ႇထိုင် လုၵ်ႈဢွၼ်ႇႁဵၼ်းႁႅင်းၵၢၼ်လႄႈ ၼေႃႇတႅၼ်းၶိူဝ်းႁဝ်းၶႃႈ တင်းမူတ်း ပေႃးတေလႆႈ ႁဵၼ်းႁူႉလိၵ်ႈလၢႆး၊ ပၢႆးပိုၼ်း၊ ၸိူဝ်ႉၶိူဝ်း၊ ၽႃသႃတူဝ်ၵဝ်ႇသေ ပႅင်းႁၵ်ႉၸိူဝ်ႉၶိူဝ်း ၸဝ်ႈၵဝ်ႇၵႂႃႇၼၼ်ႉ ၶႂ်ႈႁႂ်ႈ ၶိုၼ်းသိုပ်ႇႁဵၼ်းၵၼ်ၵႂႃႇ ပီၼႃႈၾႃႉမႂ်ႇထႅင်ႈ။ ၵွပ်ႈၼႆလႄႈ တိုၵ်းသူၼ်းထိုင် ပေႃႈမႄႈလုၵ်ႈဢွၼ်ႇၶဝ် ႁႂ်ႈ သူင်ႇလုၵ်ႈလၢင်းၽႂ်မၼ်း မႃးၶိုၼ်ႈ ဢေႃႈ”- မေႃသွၼ် ၼၢင်းႁွမ် သိုပ်ႇလၢတ်ႈၼႄၼင်ႇၼႆ။
ပၢင်သွၼ်လိၵ်ႈတႆး ၶၢဝ်းမႆႈ တီႈၵဵင်းမႂ်ႇ – လမ်းပုၼ်း ပီၼႆႉ တႄႇပူင်သွၼ်မႃး ၼႂ်းလိူၼ်မၢတ်ႊၶျ် တေႃႇထိုင် လိူၼ်ၵျူႊလၢႆႊၼႆႉ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 27/07/2024 ယၢမ်းၵၢင်ၼႂ် 8 မူင်းထိုင် 1 မူင်းဝၢႆးဝၼ်း ၸင်ႇလႆႈၸတ်းႁဵတ်း ပၢင်တွပ်ႇလိၵ်ႈတႆး ၶၢဝ်းမႆႈ တီႈဝတ်ႉသူၼ်ၻွၵ်ႇ ဝဵင်းၵဵင်းမႂ်ႇ ၸိုင်ႈထႆး မီးလုၵ်ႈႁဵၼ်း ၶဝ်ႈတွပ်ႇ 81 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ