ဝၼ်းတီႈ 05/09/2024 ၼႆႉ ၸုမ်းသိုၵ်းရၶႅင်ႇ AA ယိုတ်းၵုမ်းလႆႈတပ်ႉၼမ်ႉသိုၵ်းမၢၼ်ႈ ဢၼ်မီးၼႂ်းၸႄႈဝဵင်းတၢၼ်ႇတွႆး မိူင်းရၶႅင်ႇ ဝႃႈၼႆ။

တႃႇယိုတ်းလႆႈတပ်ႉၼမ်ႉၼႆႉ သိုၵ်းရၶႅင်ႇ တႄႇယိုတ်းတိုၵ်းမႃး ၸဵမ်မိူဝ်ႈဝၼ်းတီႈ 7 လိူၼ်ဢေႃႊၵတ်ႊသ်ၼၼ်ႉ၊ တီႈတပ်ႉၼမ်ႉၼၼ်ႉ ဢဵၼ်ႁႅင်းသိုၵ်းမၢၼ်ႈမီး 1,200 ပၢႆ ၾၢႆႇသိုၵ်းမၢၼ်ႈ ၸႂ်ႉပႃး ၶိူင်ႈမိၼ်တိုၵ်း ၶိူင်ႈၵွင်ႈယႂ်ႇတပ်ႉၼမ်ႉ ယိုဝ်းၸွႆႈသေတႃႉ ဝၢႆးပၢင်တိုၵ်းၸမ်တဵမ်လိူၼ် ၼႂ်းဝၼ်းတီႈ 5 ၼႆႉ ယိုတ်းၵုမ်းလႆႈတင်းသဵင်ႈယဝ်ႉၼႆ သိုၵ်းရၶႅင်ႇ AA ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 6 ၼင်ႇၼႆ။

တီႈပၢင်တိုၵ်းၼၼ်ႉ သိုၵ်းမၢၼ်ႈတၢႆ မွၵ်ႈ 400 ၵေႃႉသေ ယိုတ်းလႆႈပႃး ၶိူင်ႈၵွင်ႈၵၢင်ႇ သိုၵ်းမၢၼ်ႈ တင်းၼမ်ထႅင်ႈ။

ယၢမ်းလဵဝ် သိုၵ်းရၶႅင်ႇ AA ယိုတ်းၵုမ်းလႆႈဝႆႉ ဝဵင်းတၢၼ်ႇတွႆး တင်းဝဵင်းယဝ်ႉသေတႃႉ တိုၵ်ႉသိုပ်ႇပဵၼ်ပၢင်တိုၵ်းၵၼ်တင်း သိုၵ်းမၢၼ်ႈ တီႈလႅၼ်လိၼ်ဝဵင်းတၢၼ်ႇတွႆးလႄႈ ဝဵင်းၵႂႃႉ။ ၵဵဝ်ႇၵပ်းငဝ်းလၢႆး ပၢင်တိုၵ်းၼႂ်းမိူင်းရၶႅင်ႇသေ ၾၢႆႇသိုၵ်းမၢၼ်ႈတႄႉ ဢမ်ႇႁၼ်ပိုၼ်ၽၢဝ်ႇသင်။

တီႈမိူင်းရၶႅင်ႇၼႆႉ တႄႇမိူဝ်ႈဝၼ်းတီႈ 13/11/2023 ပူၼ်ႉမႃးၼၼ်ႉသေ ၶိုၼ်းပဵၼ်ပၢင်တိုၵ်းမႃးႁၢဝ်ႈႁႅင်းသေ သိုၵ်းရၶႅင်ႇ ယိုတ်းၵုမ်းလႆႈဝႆႉ 10 ဝဵင်း ၼႂ်းမိူင်းရၶႅင်ႇလႄႈ ဝဵင်းပလႅၵ်ႉဝႃႉ ၼႂ်းမိူင်းၶျၢင်း – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။