ၵူၼ်းမိူင်းမၢၼ်ႈ 15 ၵေႃႉ ၸိူဝ်းဢမ်ႇမီးဝတ်းဝႂ်သင်သေ ဢၢၼ်းၵႂႃႇႁဵတ်းၵၢၼ် တီႈမိူင်းမလေးသျႃးၼၼ်ႉ ၺႃးပလိၵ်ႈထႆးတီႉၺွပ်းလႆႈ တီႈလႅၼ်လိၼ်မိူင်းထႆး ပွတ်းၸၢၼ်း – သိုဝ်ႇၶၢဝ်ႇ Bangkok Post ႁၢႆးငၢၼ်းဝႆႉၼင်ႇၼႆ။
ႁွင်ႈၵၢၼ် ၾၢႆႇၵူတ်ႇထတ်း ၵူၼ်းၶဝ်ႈဢွၵ်ႇမိူင်း မိူင်းထႆးတင်း ပလိၵ်ႈ ႁူမ်ႈၵၼ် ၵူတ်ႇထတ်းရူတ်ႉၵႃး လမ်းၼိုင်ႈ ထူပ်း ႁၼ်ၼၢင်းယိင်းမိူင်းမၢၼ်ႈ 3 ၵေႃႉ ႁူမ်ႈပႃး လုၵ်ႈဢွၼ်ႇလႄႈ ၵူၼ်းၸၢႆး 12 ၵေႃႉ ၸိူဝ်းဢမ်ႇမီး ဝတ်းဝႂ်သင်သေ ၶဝ်ႈ ၵႂႃႇၼႂ်းမိူင်းထႆး လိူဝ်ၼၼ်ႉ တီႉၺွပ်းပႃး ၵူၼ်းထႆး ၽူႈႁေႃႈရူတ်ႉၵႃးၼၼ်ႉ ဝႃႈၼႆ။
ႁွင်ႈၵၢၼ် ၾၢႆႇၵူတ်ႇထတ်း ၵူၼ်းၶဝ်ႈဢွၵ်ႇမိူင်း မိူင်းထႆး လႆႈၶၢဝ်ႇဝႆႉဝႃႈ မီးၵူၼ်းလုၵ်ႉမိူင်ႈမၢၼ်ႈ ၶဝ်ႈမႃးၼႂ်းမိူင်းထႆး ပွတ်းၸၢၼ်းၼႆသေ တေဢၢၼ်းၵႂႃႇမိူင်းမလေးသျုးၼႆလႄႈ ၸင်ႇလႆႈပႂ်ႉၵူတ်ႇထတ်း တီႉၺွပ်း ဝႃႈၼႆ။
ၵူၼ်းႁေႃႈရူတ်ႉၵႃး ဢဝ်ၵႃႈၸၢင်ႈ 1 ၵေႃႉ 800 ဝၢတ်ႇသေ ႁပ်ႉသူင်ႇပၼ်။ တႃႇတေလတ်းၶၢမ်ႈမိူင်းထႆးသေ ၵႂႃႇႁဵတ်း ၵၢၼ်တီႈမိူင်းမလေးသျုးၼၼ်ႉသမ်ႉ လႆႈပၼ်ငိုၼ်းတီႈ ၵူၼ်းၵၢင် (ၼၢႆးၼႃႈ) 1 ၵေႃႉ 50 သႅၼ် ပျႃး – ဝႃႈၼႆ။
ယၢမ်းလဵဝ် ၵူၼ်းၸိူဝ်းၺႃးတီႉၺွပ်းၼၼ်ႉ လႆႈထုၵ်ႇသူင်ႇတူဝ်ဝႆႉ တီႈႁူင်းပလိၵ်ႈသေ တေဢဝ်လိူင်ႈၵႂႃႇ ၸွမ်းၼင်ႇပၵ်းပိူင်မၢႆမီႈ မီးဝႆႉ။ လိူဝ်ၼၼ်ႉ ၸဝ်ႈၼႃႈတီႈၶဝ် တေသိုပ်ႇၵူတ်ႇထတ်းတီႉၺွပ်း ၵူၼ်းၸိူဝ်းၵဵဝ်ႇၶွင်ႈၸွမ်း လွင်ႈတေႃႉတၢင်ႇၵူၼ်းၶဝ်ႈဢွၵ်ႇမိူင်း ဢမ်ႇၸႂ်ႈတၢင်းၵၢၼ် ၸိူဝ်းၼႆႉၵႂႃႇထႅင်ႈ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
