မိူဝ်ႈၼႆႉ ဝၼ်းတီႈ 06/09/2024 ယၢမ်းၵၢင်ဝၼ်း 11:40 မူင်း ၸဝ်ႈၶူးလူင် ၺႃၼဝရ ၸဝ်ႈၵမ်ႉပၢႆး သင်ၶ ၸဝ်ႈ ၸိုင်ႈပွတ်းဢွၵ်ႇၶူင်း လူႉလွၼ်ႇၵႂႃႇ ၽွင်းဢႃယု 80 ပီ တီႈဝတ်ႉၵမ်မထၢၼ်း မႁႃၽေႃးထိ ဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇၶူင်း လႅၼ်လိၼ်တႆး – ထႆး လူၺ်ႈတၢင်းပဵၼ်မလဵင်း (ၵႅၼ်ႊသိူဝ်ႊ) တီႈတပ်ႉ ဝႃႈၼႆ။

လုၵ်ႈၼွင်ႉပွင်ႈပၢႆ ၸဝ်ႈတူၼ်ၶူးလူင် ၺႃၼဝရ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ၸဝ်ႈႁဝ်း လႆႈလူႉလွၼ်ႇၵႂႃႇ လူၺ်ႈတၢင်းပဵၼ်မလဵင်း (ၵႅၼ်ႊသိူဝ်ႊ) တီႈတပ်ႉ။ တၢင်းပဵၼ်မလဵင်း ၸဝ်ႈႁဝ်းၼႆႉ ၵႂႃႇၵူတ်ႇထတ်း တီႈဝဵင်းၵဵင်းမႂ်ႇ ၸိုင်ႈထႆးၼၼ်ႉသေ ၸင်ႇႁူႉၶႃႈဢေႃႈ။ လိူဝ်ၼၼ်ႉ ပွၵ်ႈၶိုၼ်းတႃႈၶီႈလဵၵ်းသေ ၶိုၼ်းသူင်ႇယူတ်းယႃ တီႈမိူင်းသိင်ႇၵပူဝ်ႇ ႁိုင်ၶၢဝ်းတၢင်းမွၵ်ႈ 1 လိူၼ်ၼႆႉ ၸင်ႇပွၵ်ႈမႃးၶိုၼ်း တီႈတႃႈၶီႈလဵၵ်းၼႆႉသေ လႆႈလူႉလွၼ်ႉၵႂႃႇဢေႃႈ”- ဝႃႈၼႆ။

ၸဝ်ႈတူၼ်ၶူးလူင် ၺႃၼဝရ (ၸဝ်ႈၵမ်ႉပၢႆး) သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်းၼႆႉ ပဵၼ်ၽူႈၵွၼ်းတိူၵ်ႈ ၵမ်မထၢၼ်း မႁႃၽေႃးထိ ဝဵင်းတႃႈၶီႈလဵၵ်း သေဢမ်ႇၵႃး ပဵၼ်ၽူႈၼႄတြႃး ၵေႃႈၸႂ်ႈ။ ယူႇတီႈ ၸဝ်ႈသေလႆႈဢွၼ်ႁူဝ် ပိုတ်ႇတိူၵ်ႈၵမ်မထၢၼ်းမႃးသမ်ႉ မိူၼ်ၼင်ႇ တီႈဝဵင်းၵဵင်းတုင်၊ တႃႈၶီႈလဵၵ်း၊ ဢိူင်ႇမိူင်းပူး ဢွၼ်ႇ ၸႄႈဝဵင်းတႃႈၶီႈလဵၵ်းလႄႈ မိူင်းသၢတ်ႇ ၸိူဝ်းၼႆႉ။

“ယၢမ်းလဵဝ် ၶၢပ်ႈတူဝ် ၸဝ်ႈတူၼ်ၶူးလူင် ၺႃၼဝရၼႆႉ တေၸတ်းပၢင်ၸႃႇပဝႆႉတီႈ ဝတ်ႉၵမ်မထၢၼ်း မႁႃ ၽေႃးထိ ဝဵင်းတႃႈၶီႈလဵၵ်းသေ တေဝႆႉႁိုင်ၵႃႈႁိုဝ် တေသၢင်းၵဵဝ်ႇ မိူဝ်ႈလႂ် ၸိူဝ်းၼႆႉတႄႉ ယူႇတီႈ ၸဝ်ႈ သြႃႇလူင်လႄႈ တၵ်ႉၵႃႇသတ်ႉထႃးၶဝ် တိုၵ်ႉဢုပ်ႇၵုမ်ၵၼ်ယူႇ ဝႃႈတေဝႆႉႁိုင်မွၵ်ႈႁိုဝ် တေသၢင်းၵဵဝ်ႇ မိူဝ်ႈလႂ် ၸိူဝ်းၼႆႉ”- လုၵ်ႈၼွင်ႉပွင်ႈပၢႆ ၸဝ်ႈတူၼ်ၶူးလူင် ၺႃၼဝရ လၢတ်ႈၼႄၼင်ႇၼႆ။

ၸဝ်ႈတူၼ်ၶူးလူင် ၺႃၼဝရၼႆႉ မိူဝ်ႈလိူၼ်ၵျုၼ်ႊ ပီ 2018 ၼၼ်ႉ ယူႇတီႈ တၵ်ႉၵႃႇသတ်ႉထႃး ၸႄႈဝဵင်းၵဵင်းတုင်လႄႈ တီႈၸမ်ၵႆႁူမ်ႈၵၼ် ယုၵ်ႉယွင်ႈၸဝ်ႈ ၶိုၼ်ႈပဵၼ် (ၸဝ်ႈၵမ်ႉပၢႆး) သင်ၶၸဝ်ႈ ၸိုင်ႈတႆးပွတ်းဢွၵ်ႇၶူင်းမႃး ႁၢၼ်ႉတေႃႇထိုင်ယၢမ်းလဵဝ်ၼႆႉ ဝႃႈၼႆ။