မိူဝ်ႈၼႆႉ ဝၼ်းတီႈ 06/09/2024 ယၢမ်းၵၢင်ၼႂ်ၸဝ်ႉ 1 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ တီႈပွၵ်ႉၼိူဝ်တင်း ပွၵ်ႉႁူဝ်ၵၢတ်ႇ ၼႂ်းဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၸၢၵ်ႇမၢၵ်ႇ တိူဝ်ႉၺႃး ၵူၼ်းမိူင်းလူႉတၢႆထင်တီႈ 11 ၵေႃႉ မၢတ်ႇၸဵပ်း 12 ၵေႃႉ ႁိူၼ်းယေးလူႉၵွႆ ဢမ်ႇယွမ်း 70 လင်။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၶိူင်ႈမိၼ် သိုၵ်းမၢၼ်ႈ ဢၼ်မႃးပွႆႇတီႈ ဝဵင်းၼမ်ႉၶမ်း တိူဝ်ႉၺႃးလုၵ်ႈဢွၼ်ႇ ဢႃယု မွၵ်ႈ 5 ပီ လူႉတၢႆ 2 ၵေႃႉ၊ ဢႃယု 12 ပီ လူႉတၢႆ 1 ၵေႃႉ၊ ဢႃယု 13 ပီ လူႉတၢႆ 1 ၵေႃႉ။ မႄႈမၢၼ်း လူႉတၢႆ 1 ၵေႃႉ၊ ၵူၼ်းထဝ်ႈ ဢႃယု 70 ပီ လူႉတၢႆ 1 ၵေႃႉလႄႈ လိူဝ်ၼၼ်ႉ ၵူၼ်းလူင် လူႉတၢႆ 5 ၵေႃႉ။ ယဝ်ႉ ၵေႃႈ တီႈပွၵ်ႉႁူဝ်ၵၢတ်ႇၼႆႉ ႁၢႆဝႆႉထႅင်ႈ 2 ၵေႃႉ ယၢမ်းလဵဝ် တိုၵ်ႉ ႁႃဝႆႉယူႇ”- ဝႃႈၼႆ။

ႁိူၼ်းယေး ၵူၼ်းမိူင်း ဢၼ်ၺႃးၸၢၵ်ႇမၢၵ်ႇသေ လူႉၵွႆယွၵ်းယွႆ (လႅဝ်ၽႅဝ်ႉ) မွၵ်ႈ 20 လင်။ ဢၼ်ၺႃးၸၢၵ်ႇမၢၵ်ႇ မိူၼ် ၼင်ႇ ၽၵ်းတူႁူးလႅင်း၊ ၽႃႁိူၼ်း လူႉၵွႆ ဢိတ်းဢွတ်းသမ်ႉ ဢမ်ႇယွမ်း 50 လင် ၼႆယဝ်ႉ။

ယၢမ်းလဵဝ် ၵူၼ်းမိူင်းဢၼ်ၺႃးၸၢၵ်ႇမၢၵ်ႇလူႉတၢႆတႄႉ ယူႇတီႈ ၸုမ်းပရႁိတၶဝ် တေႃႉသူင်ႇဝႆႉ တီႈႁူင်းယႃၼမ်ႉၶမ်း။ ၸိူဝ်းမၢတ်ႇၸဵပ်းႁၢဝ်ႈႁႅင်းသမ်ႉ လႆႈဢဝ်ၵႂႃႇယူတ်းယႃ တူဝ်ဝႆႉတီႈႁူင်းယႃမူႇၸေႊ။ ယဝ်ႉၵေႃႈ ၵၢတ်ႇလူင်လႄႈ ႁူင်း ႁဵၼ်း ၸိူဝ်းၼႆႉၵေႃႈ လႆႈပိၵ်ႉဢိုတ်းဝႆႉ ၸူဝ်ႈၶၢဝ်းယဝ်ႉ ဝႃႈၼႆ။