မၢၵ်ႇၶိူဝ်သူမ်ႈ ဢမ်ႇမီးၵႃႈၶၼ် ၼႂ်းမိူင်းတႆးပွတ်းၸၢၼ်း လႆႈထွၵ်ႇပႅတ်ႈ လူႉသုမ်းၼမ်

တီႈၸႄႈဝဵင်းပၢင်လွင်း မိူင်းတႆးပွတ်းၸၢၼ်း မၢၵ်ႇၶိူဝ်သူမ်ႈ ဢမ်ႇမီးၵႃႈၶၼ် တေဢဝ်ၶၢႆၵေႃႈ တေသုမ်းပႃး ၵႃႈႁႅင်း ၵႃႈ ၼမ်ႉမၼ်းၸၢၵ်ႈၵူၺ်းၼႆသေ ၸဝ်ႈသူၼ်လႆႈပွႆႇပႅတ်ႈ သုမ်းတင်းၼမ်တင်းလၢႆ။

ဝၼ်းတီႈ 05/09/2024 ၼႆႉ ၶၼ်မၢၵ်ႇၶိူဝ်သူမ်ႈ ဝဵင်းပၢင်လွင်း ၼိုင်ႈၸွႆႉ 300 ပျုး၊ သူၼ်မၢၵ်ႇၶိူဝ်သူမ်ႈ ၸိူဝ်းမီးၾၢႆႇဢွၵ်ႇဝၢၼ်ႈၼွင်တရႃးသမ်ႉ မူင်ႈမႅင်းယႃႉ၊ ၾူၼ်ၼမ်လႄႈ မၢၵ်ႇၶိူဝ်သူမ်ႈၼဝ်ႈ ၸဝ်ႈသူၼ် ၵႃႈလႆႈ ပွႆႇမၢၵ်ႇၶိူဝ်သူမ်ႈပႅတ်ႈ ၼႂ်းသူၼ်။

ၸၢႆးၼုမ်ႇ ဢႃယု 30 ပၢႆ ၸဝ်ႈသူၼ် မၢၵ်ႇၶိူဝ်သူမ်ႈ ဝဵင်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ -“သူၼ်မၢၵ်ႇ ၶိူဝ်သူမ်ႈ ၾၢႆႇဢွၵ်ႇဝၢၼ်ႈၼွင်တရႃးၼၼ်ႉ ဢၼ်ၼဝ်ႈၵေႃႈၼမ် ဢၼ်လႆႈသမ်ႉဢေႇ၊ ပေႃးတေဢဝ်ၶၢႆသမ်ႉ တေသုမ်းပႃး ၵႃႈၼမ်ႉမၼ်းထႅင်ႈၵူၺ်းလႄႈ ၵႃႈလႆႈပႅတ်ႈဝႆႉၼႂ်းသူၼ်။ ပီၼႆႉ ပဵၼ်ဢၼ်သုမ်းၼမ်”- ဝႃႈၼႆ။

မၢၵ်ႇၶိူဝ်သူမ်ႈၼႆႉ မၢၵ်ႇဢၼ်ဢဝ်ၶၢႆလႆႈၵေႃႈ ပဵၼ်မဵဝ်းဝႆႉႁိုင် ဢမ်ႇလႆႈလႄႈ ၶၼ်လီဢမ်ႇလီၵေႃႈယဝ်ႉ ပေႃးထိုင်ၶၢဝ်း ဢဝ်ၶၢႆလႆႈၼၼ်ႉ ၸဝ်ႈသူၼ်ၵႃႈလႆႈဢဝ်ၶၢႆတိၵ်းတိၵ်း ဝႃႈၼႆ။ 

ၸဝ်ႈသူၼ် မၢၵ်ႇၶိူဝ်သူမ်ႈ လၢတ်ႈၽူႈတွႆႇႁွၵ်ႈထႅင်ႈဝႃႈ – “ၽၵ်းယိူဝ်ႈၼၢင်းၶဵဝ် ၶူဝ်းၵုၼ်ႇလိပ်းၼႆႉ ပေႃးမၼ်းသၢင်ႇထုၵ်ႇလႆႈၼမ်ႉတွၼ်းၵေႃႈ လႆႈၼမ်။ ၵူၺ်းၵႃႈ ပေႃးဢမ်ႇသၢင်ႇထုၵ်ႇၸိူင်ႉ ပီၼႆ ပေႃးသုမ်းၵေႃႈ တေသုမ်းၼမ်။ ပေႃးဝႃႈ တေၽုၵ်ႇၶိုၼ်းတႅၼ်းထႅင်ႈၼႆသမ်ႉ တေသုမ်းၵႃႈၸိူဝ်ႉၵႃႈၽၼ်း ၵႃႈႁႅင်းထႅင်ႈၵူၺ်း”- ဝႃႈၼႆ။  

ၸဝ်ႈသူၼ် မၢၵ်ႇၶိူဝ်သူမ်ႈ တၢင်းထုင်ႉဝဵင်းပၢင်လွင်း လၢတ်ႈဝႃႈ သင်ၸိူဝ်ႉမီးၸဝ်ႈတႃႇၼ ဢၼ်တေမႃး ဢဝ်ၼႂ်းသူၼ် မိူင်းတႆးပွတ်းၸၢၼ်းသေ ဢဝ်ၶိုၼ်ႈမိူဝ်းၸွႆႈမိူင်းတႆးပွတ်းႁွင်ႇတႄႉ ယိင်ႈၶႅၼ်းတေလီ ဝႃႈၼႆ။

ယၢမ်းလဵဝ် တီႈၼႂ်းၼွင်ႁၢႆးယႃႈ မၢၵ်ႇၶိူဝ်သူမ်ႈလိပ်း ၼိုင်ႈၸွႆႉ 600 ပျု ၊ မၢၵ်ႇၶိူဝ်သူမ်ႈ သုၵ်း 800 ပျုး။ ၵူၺ်းၵႃႈ ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇ တၢင်းဝဵင်းမူႇၸေႊ၊ ၼမ်ႉၶမ်း လႅၼ်လိၼ်တႆး – ၶႄႇ ပိုၼ်ႉတီႈ ဢၼ်မီးပၢင်တိုၵ်းသိုၵ်းသိူဝ် ၸိူဝ်းၼၼ်ႉသမ်ႉ ၶၼ်မၢၵ်ႇၶိူဝ်သူမ်ႈ သုင်ႁႅင်း၊ လႆႈသိုဝ်ႉၵိၼ် ၼိုင်ႈၸွႆႉ မွၵ်ႈ 9,000 ပျုး ၼႆယဝ်ႉ။

မၢၵ်ႇၶိူဝ်သူမ်ႈ ဢၼ်ဢွၵ်ႇတၢင်း ထုင်ႉပၢင်လွင်း၊ ၼွင်တရႃး ၸိူဝ်းၼႆႉ သူင်ႇၶၢႆတီႈဝဵင်းဢွင်ႇပၢၼ်း၊ ယူႇတီႈ ဝဵင်းဢွင်ႇပၢၼ်း ၶိုၼ်းသူင်ႇၵႃႉၶၢႆ တၢင်းဝဵင်းတႃႈၵုင်ႈ၊ ဝဵင်းလိူဝ်ႇ၊ မျႃႉဝတီႇ၊ မူႇၸေႊ ၸိူဝ်းၼႆႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)