သိုၵ်းမၢၼ်ႈတင်ႈၸႂ် ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းမၢၼ်ႈတူင်ႈ  

လၢႆပိုၼ်ႉတီႈ ၼႂ်းမိူင်းတႆးပွတ်းႁွင်ႇ တီႈဢၼ်သိုၵ်းၸၢဝ်းၶိူဝ်း ပိုတ်းယိုဝ်းလႆႈ တပ်ႉသိုၵ်းမၢၼ်ႈသေ ပိုၼ် ၽၢဝ်ႇဝႃႈၵုမ်းလႆႈဝႆႉၼၼ်ႉ သိုၵ်းမၢၼ်ႈ ၼႂ်းတပ်ႉပၢႆႈမူတ်းယဝ်ႉသေတႃႉ ယၢမ်းၵၢင်ၶမ်ႈၵၢင်ၶိုၼ်း ၵႆႉဢဝ် ၶိူင်ႈမိၼ်မႃးပွႆႇမၢၵ်ႇ တိူဝ်ႉသႂ်ႇႁိူၼ်းယေး ၵူၼ်းမိူင်း ႁဵတ်းႁႂ်ႈၵူၼ်းမိူင်းမၢတ်ႇၸဵပ်းလူႉတၢႆ။

တီႈဝဵင်းမၢၼ်ႈတူင်ႈ ၸိုင်ႈတႆးပွတ်းႁွင်ႇၵေႃႈ ဝၢႆးလင်ပၢင်တိုၵ်း 1027 ၼႆႉ သိုၵ်းမၢၼ်ႈ တင်ႈၸႂ်ဢဝ်ၶိူင်ႈမိၼ် Jet Fighter မႃးပွႆႇမၢၵ်ႇလူင်သႂ်ႇလႄႈ တုမ်ႉတိူဝ်ႉ ၵူၼ်းဝၢၼ်ႈၵူၼ်းမိူင်း ၼႂ်းၼၼ်ႉ ႁူင်းၸၢၵ်ႈႁဵတ်းဢွၵ်ႇၼဵင်ႈၵေႃႈ လူႉယႂ်ႇသုမ်းၼမ် ၼႆယဝ်ႉ။

ဝၢႆးသေ သိုၵ်းမၢၼ်ႈ ပိုၼ်ၽၢဝ်ႇဝႃႈ သိုၵ်းတဢၢင်း TNLA ပဵၼ်ၸုမ်းၵေႃႇၵၢၼ်ႁၢႆႉ ၼႂ်းဝၼ်းတီႈ 02/09/2024 ၼၼ်ႉယဝ်ႉၵေႃႈ သိုၵ်းမၢၼ်ႈ တင်ႈၸႂ်ဢဝ်မၢၵ်ႇ မႃးပွႆႇသႂ်ႇဢွင်ႈတီႈဢၼ်သိုၵ်းၸၢဝ်းၶိူဝ်း ၵုမ်းၵမ်ဝႆႉၸိူဝ်းၼၼ်ႉ မိူၼ်ၼင်ႇ ၸႄႈဝဵင်းမၢၼ်ႈတူင်ႈ (ၸိုင်ႈတႆးပွတ်းႁွင်ႇ) လႄႈ ၸႄႈဝဵင်းလွၵ်ႉၸွၵ်ႇ (ၸိုင်ႈတႆးပွတ်းၸၢၼ်း)။

ဝၼ်းတီႈ 03/09/2024 ၵၢင်ၶမ်ႈ 10 မူင်းပၢႆၼၼ်ႉ သိုၵ်းမၢၼ်ႈ တင်ႈၸႂ်ႈဢဝ်ၶိူင်ႈမိၼ်သိုၵ်း Jet Fighter မႃးပွႆႇမၢၵ်ႇလူင်သႂ်ႇ တီႈမၢၼ်ႈတူင်ႈ 2 ၵမ်း ႁူင်းၼဵင်ႈလင်ၼိုင်ႈ၊ ႁိူၼ်းၵူၼ်းမိူင်း 5 လင် လူႉၵွႆ ၵူၼ်းမၢတ်ႇၸဵပ်းၸွမ်းၵေႃႈမီး။

ၸုမ်းၼၢင်းယိင်းတဢၢင်း TWO လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၼႆႉ မႃးပွႆႇမၢၵ်ႇသႂ်ႇ ၶၢဝ်းၵၢင်ၶိုၼ်း ၵူၼ်း ၼွၼ်းလပ်းယဵၼ်။ ႁဵတ်းႁႂ်ႈၵူၼ်းမိူင်း ဢမ်ႇတၼ်းတင်ႈတူဝ် ဢမ်ႇတူဝ်ႈတၼ်း တႃႇတေပၢႆႈသွၼ်ႈသေ မီးၵူၼ်းမၢတ်ႇ ၸဵပ်းၸွမ်းလႄႈ ႁူင်းႁဵတ်းဢွၵ်ႇၼဵင်ႈ လင်ၼိုင်ႈလႄႈ ႁိူၼ်းယေး ဢမ်ႇယွမ်း 5 လင်လူႉၵွႆၸွမ်း – မၼ်းၼၢင်း လၢတ်ႈ ၵႂႃႇ တင်းၵႂၢမ်းမၢၼ်ႈၼင်ႇၼႆ။   

“ၶဝ်ႁေႃႈ Jet Fighter မႃးပွႆႇမၢၵ်ႇၵႂႃႇ ၵၢင်ၶိုၼ်းၼႆႉဢေႃႈၼၼ်ႉ။ တိူဝ်ႉပႃးႁိူၼ်းယေးသေ ၵူၼ်းမိူင်းလႆႈ မၢတ်ႇၸဵပ်း ၵႂႃႇ ၵေႃႉၼိုင်ႈ။ ယဝ်ႉၵေႃႈ မၢၵ်ႇလူင်တူၵ်းသႂ်ႇႁူင်းၸၢၵ်ႈၼဵင်ႈၼၼ်ႉ လူႉၵွႆၼမ် ၼႂ်းၼၼ်ႉ ၵူၼ်းႁဵတ်းၵၢၼ်မၢတ်ႇၸဵပ်း 2 ၵေႃႉ။ တိူဝ်ႉပႃးႁိူၼ်း 4-5 လင် လူႉၵွႆ ႁိူၼ်းၽႂ်ၵေႃႈ ပႆႇလႆႈႁူႉတႅတ်ႈတေႃး။ တီႈမၢၼ်ႈတူင်ႈၼႆႉ လႅင်းၾူၼ်းၵေႃႈ ဢမ်ႇမီး”- ဝႃႈၼႆ။  

မၢၼ်ႈတူင်ႈၼႆႉ သိုၵ်းတဢၢင်း ပိုၼ်ၽၢဝ်ႇ ၵုမ်းလႆႈ မိူဝ်ႈဝၼ်းတီႈ 23/12/2023 ၼၼ်ႉသေ ဝၢႆးၼၼ်ႉ ပိုၼ်ၽၢဝ်ႇ ယိုတ်းၵုမ်းလႆႈပႃးၼမ်ႉသၼ်ႇ၊ ၼမ်ႉၶမ်း၊ မိူင်းလူင် ၸဵမ်ၸိူဝ်းၼႆႉထႅင်ႈ။

ၵူၼ်းၸၢႆးၼုမ်ႇ ၼႂ်းၸိုင်ႈတႆး ပွတ်းႁွင်ႇ ၵေႃႉၼိုင်ႈၵေႃႈ ထတ်းသၢင်လၢတ်ႈဝႃႈ – ပိူင်လူင်တႄႉ ဢၼ်သိုၵ်းမၢၼ်ႈ တင်ႈၸႂ်ၵမ်းၵမ်းမႃးပွႆႇမၢၵ်ႇသႂ်ႇ ဢွင်ႈတီႈဢၼ်သိုၵ်းၸၢဝ်းၶိူဝ်း ၵုမ်းၵမ်ဝႆႉၼႆႉ ၶဝ်ၶႂ်ႈၼႄဝႃႈ ဝၢၼ်ႈဢိူင်ႇ ဝဵင်းၸိူဝ်းၼႆႉ တိုၵ်ႉယူႇတႂ်ႈမိူင်းႁူမ်ႈတုမ်ယူႇ။

သိုၵ်းၸၢဝ်းၶိူဝ်း ၵႃႈပေႉၶႂ်ႈပိုၼ်ၽၢဝ်ႇဝႃႈ ၵုမ်းၵမ်လႆႈ ၸိူင်ႉႁိုဝ်ၵေႃႈ – သင်ဝႃႈ ၵူၼ်းမိူင်းဢမ်ႇလႆႈယူႇၵတ်းယဵၼ်၊ ဢမ်ႇၸၢင်ႈႁဵတ်းသၢင်ႈၵၢၼ်ငၢၼ်းလီလီၸိုင် ဝၢၼ်ႈဝဵင်းၵေႃႈ တေဢမ်ႇၸၢင်ႈပဵၼ် ဢွင်ႈတီႈဢၼ်ၵူၼ်းမိူင်းယူႇလႆႈ။ ယွၼ်ႉၼၼ် သင်ဝႃႈ ဢမ်ႇမီးၵူၼ်း မိူင်းယူႇၸိုင် မီးၵူၼ်းၵုမ်းလၢႆလၢႆၵူၺ်းတႄႉ ဢွင်ႈတီႈၼၼ်ႉ တေဢမ်ႇၵိုင်ႇတၢၼ်ႇ ပဵၼ်ဝၢၼ်ႈဝဵင်း ဢၼ် ၵၢၼ်ၽွင်းငမ်းလီလႆႈ။ ယွၼ်ႉၼၼ် သိုၵ်းမၢၼ်ႈ ၸင်ႇတင်ႈၸႂ် ၶႂ်ႈယႃႉၵဝ်းႁႂ်ႈသိုၵ်းၸၢဝ်းၶိူဝ်း ဢမ်ႇၵုမ်း ဝၢၼ်ႈဝဵင်းလႆႈလီလီ၊ တင်ႈၸႂ်ႁဵတ်းႁႂ်ႈၵူၼ်းမိူင်း ဢမ်ႇယွမ်းႁပ်ႉ သိုၵ်းၸၢဝ်းၶိူဝ်းလႆႈၵူၺ်း ဝႃႈၼႆ။

“သိုၵ်းၸၢဝ်းၶိူဝ်းၶဝ် တိုၵ်းယိုတ်းၵုမ်းလႆႈဝႆႉ လၢႆဝဵင်းပွတ်းႁွင်ႇၼႆသေတႃႉၵေႃႈ မၼ်းတိုၵ်ႉ မီးၼႂ်းသဵၼ်ႈ မၢႆမိူင်းႁူမ်ႈတုမ်မၢၼ်ႈယူႇလူး။ မၢၼ်ႈၵေႃႈ တေဢမ်ႇၶႂ်ႈယွမ်းၼၼ်ႉၼႃႇ။ တႃႇတေတိုၵ်းပေႉလႆႈ သိုၵ်း ၸၢဝ်းၶိူဝ်းၶိုၼ်း ၼၼ်ႉၵေႃႈ ဢဵၼ်ႁႅင်းသိုၵ်းမၢၼ်ႈသမ်ႉ ဢူၼ်ႈဝႆႉၵူႈၾၢႆႇယဝ်ႉလႄႈ ၸင်ႇၸႂ်ႉၶိူင်ႈမိၼ် မႃးယိုဝ်းသႂ်ႇ ၼႂ်းဢွင်ႈတီႈ ဢၼ်သိုၵ်းၸၢဝ်းၶိူဝ်းၵုမ်းဝႆႉ ၸိူဝ်းၼႆႉ”- ဝႃႈၼႆ။  

ဢၼ်သိုၵ်းမၢၼ်ႈ ယိုဝ်းသႂ်ႇဝၢၼ်ႈသူၼ်ႁိူၼ်းယေး ၵူၼ်းမိူင်းယူႇၼႆႉ ဢမ်ႇၵႃးတီႈမၢၼ်ႈတူင်ႈၵူၺ်း။ မိူၼ်ၼင်ႇ တီႈဝဵင်းၼွင်ၶဵဝ်၊ သီႇပေႃႉ၊ ၵျွၵ်ႉမႄး၊ လႃႈသဵဝ်ႈ ၸိူဝ်းၼႆႉၵေႃႈ ပၢင်တိုၵ်း ဢမ်ႇမီးယဝ်ႉသေတႃႉ သိုၵ်းမၢၼ်ႈ ၵႆႉဢဝ်ၶိူင်ႈမိၼ် မႃးယိုဝ်းယူႇၶိူဝ်းယႂ်း။

လွင်ႈသိုၵ်းမၢၼ်ႈ ပွႆႇမၢၵ်ႇသႂ်ႇ ဢွင်ႈတီႈၵူၼ်းမိူင်းယူႇ ၶိူဝ်းယႂ်းၼႆႉ ပဵၼ်လွင်ႈၵေႃႇၵၢၼ်ႁၢႆႉတႄႉတႄႉဝႃႈဝႃႈ။ ယွၼ်ႉ ၼၼ် ၼႂ်းလိူၼ်ဢေႃႊၵတ်ႊသ် ဝၼ်းတီႈ 20 ၼၼ်ႉ ၸုမ်းၼၢင်းယိင်းတဢၢင်း ႁူမ်ႈပႃး တူင်ႇၵူၼ်းတဢၢင်းလၢႆၸုမ်း ႁူမ်ႈၵၼ်တုၵ်းယွၼ်း ႁႂ်ႈၵူႈၸိုင်ႈမိူင်း ပၼ်ႁႅင်းဢီး သိုၵ်းမၢၼ်ႈ ႁႄႉႁၢမ်ႈပၼ်ယႃႇ ႁႂ်ႈသိုၵ်းမၢၼ်ႈ ယိုဝ်းႁိူၼ်းယေးၵူၼ်းမိူင်းတိၵ်းတိၵ်း ဝႃႈၼႆ။