သိုၵ်းမၢၼ်ႈတင်း သိုၵ်းတဢၢင်း TNLA ပိုတ်းယိုဝ်းၵၼ်  ႁၢဝ်ႈႁႅင်း တၢင်းဝၢၼ်ႈတွင်ၶမ်း ဢၼ်မီးၸဵင်ႇၸၢၼ်းဝၼ်း ဢွၵ်ႇ ဝဵင်းၼွင်ၶဵဝ် မၢၵ်ႇလူင်တူၵ်းသႂ်ႇ ၼႂ်းဝၢၼ်ႈမႆႉပူၵ်ႇ ဢၼ်မီးၾၢႆႇႁွင်ႇဝၼ်းဢွၵ်ႇ ဝၢၼ်ႈတွင်ၶမ်း ၵူၼ်းဝၢၼ်ႈမၢတ်ႇၸဵပ်းလူႉတၢႆ 3 ၵေႃႉ။

ဝၼ်းတီႈ 03/09/2024 ၼႆႉ သိုၵ်းမၢၼ်ႈ ဢၼ်ယူႇတၢင်းဝဵင်းပၢင်ႁူႈ ယိုဝ်းမၢၵ်ႇလူင်ၸွႆႈ ပူၼ်ႉၵႂႃႇတူၵ်း သႂ်ႇတၢင်းဝၢၼ်ႈမႆႉပူၵ်ႇ၊ ႁိူၼ်းယေးၵူၼ်းမိူင်းလူႉၵွႆ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ 3 ၵေႃႉ တေႃႇထိုင် မိူဝ်ႈၼႆႉ ယၢမ်းဝၢႆးဝၼ်း သိုၵ်းမၢၼ်ႈ တိုၵ်ႉပိုတ်းယိုဝ်း ၵွင်ႈလူင်ယူႇ ဢမ်ႇထၢတ်ႇ။ 

လွင်ႈၼႆႉ ၽူႈၸၢႆး ၵူၼ်းဝၢၼ်ႈတွင်ၶမ်း ၵေႃႉၼိုင်ႈ လၢတ်ႈဝႃႈ – “တေႃႇထိုင်ဝၢႆးဝၼ်းၼႆႉၵေႃႈ တိုၵ်ႉယိုဝ်းမၢၵ်ႇလူင်ယူႇ။ တူၵ်းသႂ်ႇႁိူၼ်းၵူၼ်းဝၢၼ်ႈမႆႉပူၵ်ႇ ၵွႆၼမ်ယူႇ၊ ၸၢၵ်ႇမၢၵ်ႇသဵၼ်သႂ်ႇ ၵူၼ်းဝၢၼ်ႈ 3 ၵေႃႉ ဢၼ်တိုၵ်ႉဢုပ်ႇၵၼ်ယူႇၼႂ်းဝၢင်းႁိူၼ်း၊ ငိၼ်းဝႃႈတၢႆၵေႃႉၼိုင်ႈ၊ 2 ၵေႃႉမၢတ်ႇၸဵပ်းႁႅင်း” – ဝႃႈၼႆ။

ၼႂ်းဝၢၼ်ႈတွင်ၶမ်းၼႆႉ မီးတပ်ႉသိုၵ်းမၢၼ်ႈ 902 ၊ 406 လႄႈ 206 သေ ၾၢႆႇသိုၵ်းတဢၢင်း TNLA  တိုၵ်ႉ ၶဝ်ႈလေႃႇတိုၵ်ႉႁၢဝ်ႈႁႅင်းယူႇ။ ၾၢႆႇသိုၵ်းမၢၼ်ႈသမ်ႉ ၵႆႉဢဝ်ၶိူင်ႈမိၼ် Jetfighter လႄႈ ၵွင်ႈလူင်ပိုတ်း ယိုဝ်းႁၢဝ်ႈႁႅင်း။ ယၢမ်းလဵဝ် ၵူၼ်းဝၢၼ်ႈပၢႆႈၽေးသိုၵ်းဝႆႉလႄႈ လွင်ႈမၢတ်ႇၸဵပ်းလူႉတၢႆ မီးၵႃႈႁိုဝ် ယၢမ်းလဵဝ် ႁဵတ်းႁိုဝ်ဝႆႉယူႇၼႆတႄႉ ပႆႇႁူႉတႅတ်ႈတေႃး။

မိူဝ်ႈဝၼ်းတီႈ 02/09/2024 ၼႆႉၵေႃႈ သိုၵ်းမၢၼ်ႈ ယိုဝ်းမၢၵ်ႇလူင်တူၵ်းသႂ်ႇ ၼႂ်းဝၢၼ်ႈမႆႉပူၵ်ႇ ၸဝ်ႈသၢင်ႇ 4 တူၼ် မၢတ်ႇၸဵပ်း။ ၵူၼ်းဝၢၼ်ႈလႄႈ သင်ၶၸဝ်ႈ မွၵ်ႈ 70 လႆႈဢွၼ်ၵၼ်ပၢႆႈယၢၼ်ႁိူၼ်းယေး။

တေႃႇထိုင်ယၢမ်းလဵဝ် သိုၵ်းမၢၼ်ႈတင်း သိုၵ်းတဢၢင်း TNLA တိုၵ်ႉသိုပ်ႇပိုတ်းယိုဝ်းၵၼ်ႁႅင်း ၼႂ်းဝၢၼ်ႈတွင်ၶမ်း၊ ဝၢၼ်ႈမၢၵ်ႇၵႅင်း၊ ဝၢၼ်ႈလွႆယၢဝ်းလႄႈ ဝၢၼ်ႈမႆႉပူၵ်ႇ ၸိူဝ်းၼႆႉ။ ႁိူၼ်းယေးလႄႈ ဝတ်ႉဝႃးၽႃသိူဝ်ႇလူႉၵွႆ။ ၵူၼ်းဝၢၼ်ႈ မွၵ်ႈ 500 လႆႈပၢႆႈယၢၼ်ႁိူၼ်းယေး ၵႂႃႇသွၼ်ႈဝႆႉၸွမ်း ပိုၼ်ႉတီႈဢၼ် ဢမ်ႇမီးပၢင်တိုၵ်း။