ႁႅင်းၵၢၼ်မိူင်းမၢၼ်ႈ ပေႃႈမႄႈလုၵ်ႈသၢမ်ၵေႃႉ ၺႃးၶႃႈတၢႆ တီႈၸႄႈတွၼ်ႈပရၸုတ်ႊ ၶီႊရီႊၶၼ်ႊ ၸိုင်ႈထႆးပွတ်းတူၵ်း ၼႂ်းၼၼ်ႉပႃး မႄႈမၢၼ်းၵေႃႉၼိုင်ႈလႄႈ လုၵ်ႈဢွၼ်ႇ ဢႃယု 7 ၶူပ်ႇ ၵေႃႉၼိုင်ႈၼႆ – သိုဝ်ႇထႆး ႁၢႆးငၢၼ်းဝႆႉၼင်ႇၼႆ။
ၸေႃႇမိၼ်းဢူး ဢႃယု 40 ပီၼႆႉ ပဵၼ်ၵူၼ်းႁဵတ်းၵၢၼ်သူၼ်ယၢင်ရႃႇပႃႇ ၼႂ်းၸႄႈဝဵင်းထပ်ႉသၵႄး ၸႄႈတွၼ်ႈပရၸုတ်ႊၶီႊရီႊၶၼ်ႊ၊ မၼ်းၸၢႆး ဢမ်ႇမႃးလူင်းၵၢၼ် 2-3 ဝၼ်းယဝ်ႉလႄႈ ၼႂ်းဝၼ်း တီႈ 31 လိူၼ်ဢေႃႊၵတ်ႊသ်ၼႆ့ ၸဝ်ႈၵၢၼ်ပေႃႈလဵင်ႉ လႆႈၵႂႃႇၶႆႈထိုင်ႁိူၼ်း၊ ထူပ်းႁၼ် မေးၼၢင်းမၼ်းလႄႈ လုၵ်ႈဢွၼ်ႇလဵၵ်ႉ ၺႃးၶႃႈတၢႆဝႆႉလႄႈ ၸင်ႇတိူင်ႇလၢတ်ႈတီႈႁူင်းပလိၵ်ႈ – ဝႃႈၼႆ။
ဝၢႆးၸဝ်ႈၼႃႈတီႈ မႃးၵူတ်ႇထတ်းသွၵ်ႈႁႃ ၵႂႃႇထူပ်းႁၼ်ၶၢပ်ႈတူဝ် ၸေႃႇမိၼ်းဢူး ၺႃးထိူဝ်ၶေႃးၶႃႈ တၢႆဝႆႉ ၼႂ်းသူၼ်ယၢင်ရႃႇပႃႇ တီႈၵႆႁိူၼ်းမၼ်းၸၢႆး ဝႃႈၼႆ။
ၵွၼ်ႇၼႃႈမၼ်းၸၢႆး ပႆႇၺႃးၶႃႈတၢႆၼၼ်ႉ မၼ်းႁွင်ႉဢူၺ်းၵေႃႉ 2 ၵေႃႉ မႃးဢႅဝ်ႇလႄႇတီႈႁိူၼ်း တႃႇႁူမ်ႈႁဵတ်းၵၢၼ်ၸွမ်းၵၼ်။ ၵူၺ်းၵႃႈ ဝၢႆးလုၵ်ႈ လၢင်းမေးၼၢင်းလႄႈ ၸေႃႇမိၼ်းဢူး ၺႃးၶႃႈတၢႆယဝ်ႉ ဢူၺ်းၵေႃႉ 2 ၵေႃႉၵေႃႈ ႁၢႆတူဝ်ၵႂႃႇဝႆႉလႄႈ လႅပ်ႈတေၵဵဝ်ႇတင်းလွင်ႈၼႆႉယူႇၼႆ ၸဝ်ႈၼႃႈတီႈထတ်းသၢင်ဝႆႉၼင်ႇၼႆ။
ၵူၼ်းႁူမ်ႈႁိူၼ်း ၸေႃႇမိၼ်းဢူးလႄႈ ဢူၺ်းၵေႃႉ 2 ၵေႃႉၼၼ်ႉ ပဵၼ်ၵူၼ်း ယူႇတီႈ ၸႄႈဝဵင်းမျဵတ်ႉ တိူင်းတၼၢဝ်းသီသေ ၵႂႃႇႁဵတ်းၵၢၼ်မိူင်းထႆးပွတ်းတူၵ်း တီႈၸႄႈဝဵင်းထပ်းသၵႄး – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
