“တပ်ႉပူတ်းပွႆႇၸိူဝ်ႉၶိူဝ်းတဢၢင်း (TNLA) ၼႆႉ ၵိုတ်းတိုၵ်းၵမ်းလဵဝ်သေ ႁႂ်ႈထိင်းသိမ်းလွင်ႈၼိမ်တဵင်ႈ ၼႂ်းၼႃႈလႅၼ်လိၼ်တိတ်းၸပ်းမိူင်းၶႄႇ သင်ဢမ်ႇၼၼ် ၾၢႆႇမိူင်းၶႄႇၼႆႉ တေတိူဝ်းယုၵ်ႉၶဵင်ႈ လၢႆးသင်ႇသွၼ်ဢွၼ်ငႄႈလႄႈ မီးမႃးၽွၼ်းယွၼ်ႈ ၼင်ႇႁိုဝ်ၵေႃႈ တေၸႂ်ႉဢဝ်ပုၼ်ႈၽွၼ်းသဵင်ႈသဵင်ႈ” ၼႆ ၵေႃၵမ်ၵၢၼ် လိူင်ႈႁူမ်ႇလူမ်ႈမိူင်းၶႄႇ တီႈမိူင်းမၢဝ်း (ႁူၺ်ႈလီ) ႁဵတ်းလိၵ်ႈသူင်ႇထိုင်တီႈ TNLA မိူဝ်ႈဝၼ်းတီႈ 29 သေ လင်ၶၢဝ်ႇ ဢွၵ်ႇမႃး မိူဝ်ႈဝၼ်းတီႈ 30 ၼၼ်ႉ ပူၵ်းယွၼ်ႈထိုင် ၸုမ်းၸၢဝ်းလုၵ်ႉၽိုၼ်ႉၼႂ်းမိူင်းမၢၼ်ႈၵႂႃႇ ႁၢဝ်ႈႁၢဝ်ႈႁႅင်းႁႅင်းယဝ်ႉ။
လိၵ်ႈၼႆႉ ဢမ်ႇႁၼ်တွၵ်ႇဝႆႉၸုမ်ႈ၊ ဢမ်ႇမီးမိၵ်ႈမၢႆလုမ်း၊ ဢမ်ႇမီးၵေႃႉလူင်းလၢႆးမိုဝ်းလႄႈ ပဵၼ်ဢၼ်ၵဝ်းယုင်ႈ ၵၼ် ၵူၺ်း၊ တူၺ်းၸွမ်းၼမ်ႉလိၵ်ႈၵေႃႈ ဢမ်ႇၵႂႃႇၸွမ်း လၢႆးၵၢၼ်ၽွင်းၶဵဝ်သေ ၸႂ်ႉၶေႃႈသိုဝ်ႈလိူတ်းထိူတ်းလႄႈ မိူၼ်တင်ႈၸႂ်လူလၢႆၵၼ်ဝႆႉၼႆ ၸိူဝ်းၸမ်ၸႂ်ၾၢႆႇလုၵ်ႉၽိုၼ်ႉၶဝ် ၸီႉၸမ်ႈၵၼ်ၵေႃႈ ဢမ်ႇဢေႇ။ ၵူၺ်းၼၼ်သေတႃႉ ၽူႈ ၶၢၼ်ပၢၵ်ႇ ၶွင်ၸုမ်း TNLA တႄႉ ယွမ်းယိုၼ်ဝႃႈ ၶဝ်လႆႈႁပ်ႉဝႆႉသေ တေလႆႈသိုပ်ႇႁဵတ်း သင်တိုၵ်ႉဢုပ်ႇဢူဝ်းၵၼ်ယူႇ ဝႃႈၼႆယဝ်ႉ။
ၸင်ႇၼၼ် ၵမ်ႈၽွင်ႈ ၸင်ႇလၢမ်းႁၼ်ဝႃႈ လိၵ်ႈၼင်ႇၼႆ ၶႄးၸၢင်ႈသူင်ႇပႃးၸဵမ် AA လႄႈ MNDAA ဢၼ် ပဵၼ် ၸုမ်းဢူၺ်းလီသၢမ်ပီႈၼွင်ႉၼၼ်ႉယူႇ ၼႆယဝ်ႉ။
ၼႂ်းဝူင်ႈဝၢင်ႈၼႆႉ ၵဵဝ်ႇလိူင်ႈမိူင်းမၢၼ်ႈသေ လႆႈႁၼ်ၾၢႆႇမိူင်းၶႄႇ တူင်ႉၼိုင်ယၵ်းယႂ်ႉၼႃႇ၊ ဝၢႆးလင် ၶုၼ်ၽွင်းလူင် လိူင်ႈမိူင်းၼွၵ်ႈ ဝၢင်ယီႈ လၢတ်ႈဢွၵ်ႇမႃး ႁူဝ်ႉၶႅၼ်ႈလိူင်ႈမိူင်းမၢၼ်ႈသၢမ်ႁၢဝ်းၼၼ်ႉယဝ်ႉၼႆ တၢမ်တူဝ်မၼ်း ႁပ်ႉႁူပ်ႉၸွမ်း ၽူႈတႅၼ်း ၶွင်US ဝႃႇ၊ ႁွင်ႉထူပ်း ၽူႈတႅၼ်း ၶွင်UN ၵဵဝ်ႇလိူင်ႈမိူင်းမၢၼ်ႈဝႃႇ၊ တဵင်ႈသျီၸွၼ်း ႁူပ်ႉဢုပ်ႇၸွမ်း KIA ဝႃႇ၊ ၽွင်းတၢင်ၶဝ် မႃၵျႃး ႁူပ်ႉၸွမ်း ႁူဝ်ၼႃႈ (စကစ) ဢမ်ႇၵႃး ၼႂ်းၶၢဝ်းယၢမ်းသၢမ်ဝၼ်း ၶဝ်ႈဢုပ်ႇၸွမ်း ၶုၼ်ၽွင်းလူင် ၾၢႆႇ (စကစ) သီႇၵေႃႉဝႃႇ ၸိူဝ်းၼႆႉ ပဵၼ်လွင်ႈလၢၵ်ႇလၢႆဝႆႉ။
လိူဝ်ၼႆႉ ၸီႉသင်ႇႁႂ်ႈဢိုတ်းႁပ်းလၢၼ်ႇၽၵ်းတူႇၶဝ်ႈဢွၵ်ႇ ၸွမ်းလႅၼ်လိၼ် ဢၼ်မီးၼႂ်းၼႃႈလိၼ် ၵုမ်းၵမ် ၶွင် MNDAA ,UWSA ၸိူဝ်းၼႆႉ။ ပေႃးတူၺ်းၾၢႆႇ MNDAA ၼႆ မီးၶေႃႈဢၢင်ႈဝႃႈ မၢင်ႉၸွမ်းလွင်ႈတမ်းၵၢၼ် ဢုပ်ႉပိူင်ႇ ၼႂ်းလႃႈသဵဝ်ႈၼႆသေ ၵိုတ်းတိုၵ်းဝႆႉယူႇၵေႃႈ ၾၢင်ႁၢင်ႈလႄႈ ၶေႃႈသဵင် ဢမ်ႇပေႃးႁၢဝ်ႈႁႅင်းမိူၼ် မိူဝ်ႈ ၸင်ႇတႄႇပေႉပၢင်တိုၵ်းယဝ်ႉ။
တီႈလုမ်းတီႈၸႆးၵေႃႈ လႆႈႁၼ်ပူၵ်းပႃး ၶီႉတုင်းၸိုင်ႈမိူင်းမႃး၊ ၾၢႆႇၼိုင်ႈၵေႃႈ ၶတ်းၸႂ်တႅမ်ႈၸႂ်ႉပႃး လိၵ်ႈမၢၼ်ႈ ဢၼ်လူင်ပွင်ၸိုင်ႈၵူႈသိုပ်ႇ ၸႂ်ႉၸွမ်းလုမ်းၼၼ်ႉမႃးယဝ်ႉ။
ပေႃးတူၺ်း ၾၢႆႇ AA တပ်ႉရၶႅင်ႇၼႆ ႁူမ်ႈဝႃႈ ဢမ်ႇၶဝ်ႈပႃးၸွမ်း ၼႂ်းယၼ်ႇသိုၵ်းၽႅၼ်တိုၵ်း 1027 လွပ်ႈ သွင်သေတႃႉ တီႈမိူင်းပိုၼ်ႉတီႈၶဝ်တႄႉ ၽဵဝ်ႈတိုၵ်းပႅတ်ႈ တပ်ႉစကစ ထၢၼ်ႈပေႃးၸမ်တူဝ်ႈမိူင်းယဝ်ႉ။ ၵူၺ်း ၵႃႈ ၼႂ်းဝၼ်းတီႈ 30 ၼၼ်ႉ လႆႈႁၼ်ဢွၵ်ႇမႃး ငဝ်းႁၢင်ႈသဵင် ၸွမ်သိုၵ်း ထွၼ်းမရၢတ်ႉၼၢႆႇ၊ မၼ်းလၢတ်ႈဝႃႈ- “ဢဝ်ငဝ်းလၢႆးၼႃႈလိၼ်သိုၵ်းဝႃႈတႄႉ မီးသၢႆငၢႆၶိုၼ်ႈၼႃႈလႆႈထႅင်ႈယူႇ။ ၶႂၢၵ်ႈၼႃႈလိၼ် လႆႈၵႂၢင်ႈလိူဝ်ထႅင်ႈ ယူႇ၊ လိုပ်ႈပႅတ်ႈၽူႈၶဵၼ် ႁႂ်ႈထွႆႁူၼ်ၵႂႃႇလႆႈယူႇသေတႃႉ သေဝၼ်းဝၼ်းမႃး မၼ်းၵေႃႈ ၸၢင်ႈႁၢင်ႈႁႅၼ်းတိုၵ်း ၶိုၼ်းယူႇ။ ၸင်ႇၼၼ် ၽိူဝ်ႇတေတိူဝ်းၶႂၢၵ်ႈထႅင်ႈ ႁဝ်းၶႃႈတႄႉ ႁႃလၢႆးတေမီးၶေႃႈႁပ်ႉပၢၵ်ႇ တႃႇၵၢၼ်သိုၵ်း ၵၢၼ်မိူင်းၼၼ်ႉ ၵူၺ်းယဝ်ႉ ..” ၼႆလူး။ ၵဵပ်းတီႈပွင်ႇဝႃႈ AA တႄႉ တေဢမ်ႇၶႂၢၵ်ႈၼႃႈသိုၵ်း ပူၼ်ႉဢွၵ်ႇၶွပ်ႇ မိူင်းရၶႅင်ႇယဝ်ႉ ၼႆၵေႃႈ လႅပ်ႈတေဢမ်ႇ ၽိတ်းသႄႈ။
ၵမ်းၼႆႉ ၵိုတ်းလိူဝ် TNLA ၸုမ်းပလွင်ႈ ဢၼ်လဵဝ် သိုပ်ႇႁူမ်ႈမိုဝ်းၸွမ်း DPLA ၸုမ်းထၼုသေ လေႃႇတိုၵ်းတေႃႇ တပ်ႉၵွင်ႈတင်ႈ စကစ ၼႂ်းၵႄႈၼွင်ၶဵဝ် – ႁူဝ်ပၢင်ႇမေႇမဵဝ်ႉ ယူႇၼၼ်ႉလႂ်၊ ႁူမ်ႈတင်း MNDAA သေ ၸွႆႈထႅမ် PDF ၶဝ် လွမ်ႉတိုၵ်းၶွပ်ႇတိူင်းဝဵင်းလိူဝ်ႇ ယူႇလႂ် ၸိူဝ်းၼၼ်ႉ ၸွင်ႇတေၸၢင်ႈယိုဝ်ႈယိုတ်းၵႂႃႇ ႁိုဝ်ၼႆ ပဵၼ်တီႈလီပၵ်းတႃတူၺ်း ၸွမ်းမႃးယဝ်ႉ။
BPLA, PLA လႄႈ PDF ဝဵင်းလိူဝ်ႇ ၸဵမ်ၸိူဝ်းၼႆႉ ၵိူဝ်းလႆႈလွင်ႈၸွႆႈထႅမ် ၵွင်ႈၵၢင်ႇမၢၵ်ႇမိုဝ်ႈၸိုၼ်းယၢမ်းလႄႈ ႁူမ်ႈမိုဝ်း ၸွမ်း 3BH ၶဝ်သေ ၸွႆႈတိုၵ်းလႆႈမိူင်းတႆးပွတ်းႁွင်ႇယဝ်ႉ။ ငဝ်ႈငုၼ်းတိူင်းသိုၵ်းလႃႈသဵဝ်ႈၵေႃႈ ၵူၼ်ႇယဝ်ႉ။ ထိုင်ၵမ်းလူဝ်ႇ လူင်းတိုၵ်းၸွႆႈမိူင်းမၢၼ်ႈပွတ်းၵၢင်မႃး 3BH ၶဝ် တေဢဝ်ၶေႃႈဢၢင်ႈဝႃႈ မိူင်းၶႄႇမိပ်ႇငႅၼ်းၼႆသေ ဢိူဝ်းၶီႇဢိူဝ်းၶႃႇတေႃႇၵၼ်တႄႉ တေၸၢင်ႈႁဵတ်းႁႂ်ႈလွင်ႈမၼ်ႈၸႂ် လိူင်ႈလုၵ်ႉၽိုၼ်ႉ ယူတ်ႇယၢႆႈပႅတ်ႈယူႇယဝ်ႉ။
ၵၢၼ်ပိုတ်းတိုၵ်း မိူင်းတႆးပွတ်းႁွင်ႇၼႆႉ တိုၼ်းပဵၼ်ပၵ်းလဵဝ်ပိုၼ်ႉလဵဝ်ၵၼ်တင်း လိူင်ႈလုၵ်ႉၽိုၼ်ႉၶၢဝ်းႁွင် မိူင်းမၢၼ်ႈ (Myanmar Spring Revolution) ဢၼ်ဝႃႈၼၼ်ႉ တေလႆႈလူႉပင်း လူၺ်ႈၶေႃႈပူင်ၼၵ်း လုၵ်ႉ ႁူၺ်ႈလီယိုၼ်ႈသူင်ႇမႃး ၼၼ်ႉယဝ်ႉႁိုဝ်ၼႆ တၵ်းလႆႈပႂ်ႉတူၺ်းယူႇယဝ်ႉ။
မိူင်းၶႄႇၼႆႉ ၵဵဝ်ႇလိူင်ႈမိူင်းမၢၼ်ႈမႃး ၵူၺ်းတေပၵ်းၸႂ်ၼိူဝ်လွင်ႈၼိမ်တဵင်ႈၸွမ်းလႅၼ်လိၼ်လႄႈ လွင်ႈႁူမ်ႇလူမ်ႈ ၽွၼ်းပၢင်ႈမၢၵ်ႈမီးမၼ်းၼႂ်းမိူင်းမၢၼ်ႈ ဢိၵ်ႇပႃး ၽႅၼ်ၵၢၼ်မၢၵ်ႈမီးၵွတ်ႇလူၵ်ႈမၼ်းၼၼ်ႉ ပဵၼ်ထီႉၼိုင်ႈသေ ၶဝ်ႈၵႅဝ်ယုင်ႈသုမ်ႇငုမ်းၸွမ်းယူႇဢမ်ႇႁၢင်ႉၼႆ လၢတ်ႈလႆႈယူႇၶၢဝ်ႉၶၢဝ်ႉသေတႃႉ၊ ထႅင်ႈၾၢႆႇၼိုင်ႈၵေႃႈ ယူႇတီႈဢမေႊရိၵၼ်ႊလႄႈ ၸုမ်းမိူင်းဝၼ်းတူၵ်းၶဝ် တေငမ်ယႅဝ် NUG လႄႈ ၸုမ်းလုၵ်ႉၽိုၼ်ႉ ၾၢႆႇတၢင်းၸၢၼ်းၶဝ် လေႃႇႁူဝ်သႂ်ႇ စကစ ၼၼ်ႉတႄႉၵေႃႈ မိူင်းၶႄႇၼႆႉ လႅပ်ႈတေဢမ်ႇယွမ်းႁပ်ႉလႆႈ။ ဢေႃးၸႃႇ ၾၢႆႇဝၼ်းတူၵ်းသုမ်ႇငုမ်းမႃး ၼိူဝ်မိူင်းမၢၼ်ႈ ၼႆႉ ပဵၼ်လိူင်ႈလွၵ်ႇငိုတ်ႈတေႃႇ ၵၢၼ်ၼိမ်တဵင်ႈ ၼႂ်းမိူင်းမၼ်း ၵမ်းသိုဝ်ႈယဝ်ႉလူး။
ၸင်ႇၼၼ် ၼႂ်းၵႄႈမိူင်းၶႄႇတင်းဢမေႊရိၵၼ်ႊ ဢဝ်မိူင်းႁဝ်းႁဵတ်းမၢၵ်ႇၵွၼ်းသေ လဵၼ်ႈၸိူင်းၵုမ်းမိူင်း Super Power တေႃႇၵၼ်ၼၼ်ႉ ၸၢမ်းႁႂ်ႈၽႂ်ပႅၼ်ပႄႈၵေႃႈ တၵ်းၺႃးတၢၵ်ႈတႃးၽတ်ႉၼႃႈၽၢၵ်ႇယူႇၼၼ်ႉ ယဝ်ႉ။
လိူင်ႈယိပ်းၵွင်ႈၵၢင်ႇလုၵ်ႉၽိုၼ်ႉၼႆႉ ငဝ်ႈႁၢၵ်ႈ ပဵၼ်တႃႇပူတ်းၵူၼ်ႇၸဝ်ႈဢႃႇၼႃႇ ဝႃႈၼႆသေၵေႃႈယႃႇ ဝၢႆးပၢင်တိုၵ်း ၼၼ်ႉလႄႈသင်၊ ၽွင်းတိုၵ်ႉတိုၵ်းၼၼ်ႉလႄႈသင် ပေႃးလိုမ်းတူၺ်းတေႃႇၽွၼ်းပၢင်ႈ ၵူၼ်းမိူင်းတင်း လၢႆ ၵူႈၸၢဝ်းၶိူဝ်းၼၼ်ႉၸိုင် ၶႄးတေဢမ်ႇၸၢင်ႈၶိုၼ်ႈထိုင်လႆႈ ပၢင်ဢုပ်ႇဢူဝ်းၵၢၼ်မိူင်းသေ ပၼ်ႇတူင်ႇ ထူင်ႇထူၺ်ႈယူႇၼႂ်းသမ်ႇသရႃႇ သိုၵ်းၵၢင်မိူင်းၵူၺ်းႁိုဝ်ၼႆၵေႃႈ ႁႂ်ႈလႆႈၾၢင်ႉထိုင်ၵၼ်ၵႂႃႇၸင်ႇ တေဢဝ်ႁႅင်း ၵူၼ်းမိူင်းၶၢမ်ႈပူၼ်ႉလႆႈ လွင်ႈလွၵ်ႇငိုတ်ႈသုမ်ႇငုမ်းၶွင် ၸိုင်ႈမိူင်းႁိမ်းႁွမ်းၶဝ်ယဝ်ႉဢေႃႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ