ၸုမ်းဢူၺ်းလီပွတ်းႁွင်ႇ 3 ၸုမ်း လေႃႇတိုၵ်း တပ်ႉသိုၵ်းမၢၼ်ႈမႃး ၸဵမ်မိူဝ်ႈႁၢင်ပီ 2023 တေႃႇထိုင် ယၢမ်းလဵဝ် သိုၵ်းမၢၼ်ႈ သုမ်းတပ်ႉၵွင်၊ တပ်ႉၸုမ်း ပႃးၸဵမ်ပိုၼ်ႉတီႈ ဢၼ်မီးငိုၼ်းၶဝ်ႈတင်းၼမ်။ တေႃႈၼင်ႇ ၶူင်ႇႁိူဝ်းမိၼ် ဝဵင်းလႃႈသဵဝ်ႈ ဢၼ်သိုၵ်းမၢၼ်ႈ ယၢမ်ႈတေႃႉသူင်ႇၶိူင်ႈၶူဝ်းသိုၵ်း ၵူၼ်းသိုၵ်း ၶဝ်ၼၼ်ႉၵေႃႈ ယၢမ်းလဵဝ် ၺႃးသိုၵ်းၵဝ်ႈၵၢင်ႉ ယိုဝ်းပေႉၵုမ်းလႆႈမူတ်းယဝ်ႉ။

တွၼ်ႈတႃႇ တေႃႉသူင်ႇ ၶူဝ်းၶွင်လႄႈ ၵူၼ်းသိုၵ်းၼၼ်ႉ ယၢမ်းလဵဝ် သိုၵ်းမၢၼ်ႈ လႆႈၸႂ်ႉၶူင်ႇႁိူဝ်းမိၼ် တီႈဝဵင်းၼမ်ႉၸၢင်ႈ ၸိုင်ႈတႆး ပွတ်းၸၢၼ်း။ ၶိူင်ႈမိၼ် လမ်းၵဝ်ႇလမ်းမႂ်ႇ လၢႆသႅၼ်းၶိုၼ်ႈလူင်းသုတ်းဝၼ်း၊ သဵင်ၶိူင်ႈမိၼ် မၢၼ်ႈဢူၼ်မေႃးၼၼ်ႈၵူႈဝၼ်းလႄႈ ၵူၼ်းမိူင်းတူၵ်းၸႂ်မႆႈၸႂ်ၵူဝ်ႁႄ ၵူဝ်ပၢင် တိုၵ်းပွတ်းႁွင်ႇ လၢမ်းထိုင်မိူင်းတႆးပွတ်းၸၢၼ်း ဝႃႈ ၼႆ။

ဝၢႆးသေ သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇ ယိုတ်းလႆႈ ငဝ်ႈငုၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ ယမၶ တီႈဝဵင်းလႃႈသဵဝ်ႈ ႁူဝ်လိူၼ်ဢေႃႊၵတ်ႊသ်ၼႆႉယဝ်ႉသေ သိုၵ်းမၢၼ်ႈ ဢၼ်တိုၵ်ႉၵိုတ်းဝႆႉ ၼႂ်းလၢႆၸႄႈဝဵင်း မိူင်းတႆးပွတ်းဢွၵ်ႇ၊ ပွတ်းၸၢၼ်း ၶိုင်ပွင်ထႅမ်ႁႅင်းသိုၵ်းဝႆႉ၊ ၾၢႆႇသိုၵ်းၸၢဝ်းၶိူဝ်း လၢတ်ႈဝႃႈ သိုၵ်းမၢၼ်ႈ ႁၢင်ႈႁႅၼ်း တႃႇၵုမ်းလႆႈၶိုၼ်း ဝဵင်းလႃႈသဵဝ်ႈ ဝႃႈၼႆ။

ၵူၺ်းၵႃႈ ၸုမ်းသိုၵ်းၸၢဝ်းၶိူဝ်းလႄႈ ၸုမ်းၵႅတ်ႇၶႄၵူၼ်းမိူင်းၵေႃႈ ႁႅၼ်းသိုၵ်းလေႃႇတိုၵ်းသိုၵ်းမၢၼ်ႈ ယူႇၵူႈတီႈလႄႈ သိုၵ်းမၢၼ်ႈ ဢမ်ႇၸၢင်ႈၶွၼ်ႈတုမ်ၵၼ် လီလီ။

သိုၵ်းမၢၼ်ႈ ၼႂ်းမိူင်းတႆးၼႆႉ မိူဝ်ႈဢွၼ်တၢင်း ၵမ်ႈၼမ် သင်လူဝ်ႇတေႃႉလုၵ်ႈသိုၵ်းလႄႈသင် မၢၵ်ႇမိုဝ်ႉၸိုၼ်းယၢမ်းလႄႈ ၶဝ်ႈၼမ်ႉတၢင်းၵိၼ် တႃႇသိုၵ်းၶဝ်လႄႈသင် ၸိူဝ်းၼႆႉ ၵႆႉၸႂ်ႉတိုဝ်း ၶူင်ႇႁိူဝ်းမိၼ် လႃႈသဵဝ်ႈ ပဵၼ်လၵ်းသေ ၶိုၼ်ႈလူင်းယူႇတႃႇသေႇ။ ဝၢႆးသေ သိုၵ်းၵဝ်ႈၵၢင်ႉ ၵုမ်းလႃႈသဵဝ်ႈလႆႈယဝ်ႉတႄႉ သိုၵ်းမၢၼ်ႈ ဢမ်ႇမီးသုၼ်ႇၶိုၼ်ႈလူင်းယဝ်ႉလႄႈ ယၢမ်းလဵဝ် လႆႈၸႂ်ႉၶူင်ႇႁိူဝ်းမိၼ် တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ပဵၼ်ပိူင်ယႂ်ႇ။

ၶိူင်ႈမိၼ် ဢၼ်ၶဝ်မႃးလူင်းယူႇၵူႈဝၼ်းၼႆႉ မီးလၢႆသႅၼ်း ၶိူင်ႈမိၼ်မႅင်းမီႈ ၊ Jet Fighter ၸဵမ်ဢဝ် ၶိူင်ႈမိၼ် ဢၼ်ၸႂ်ႉ ၼႂ်းၵၢၼ်သိုၵ်းလၢႆသႅၼ်း မႃးလူင်းတီႈၼႆႈမူတ်း။ ဢၼ်ၶဝ်ၶိုၼ်ႈလူင်းယူႇၼႆႉ ပဵၼ်ဢၼ်ၶဝ်တေႃႉၶိူင်ႈၵွင်ႈၵၢင်ႇ မၢၵ်ႇမိုဝ်ႉၸိုၼ်းယၢမ်းၶဝ်ၵူၺ်း ပဵၼ်ၶိူင်ႈမိၼ်တိုၵ်း ၶိူင်ႈမိၼ်ပွႆႇမၢၵ်ႇ လၢႆလၢႆၼႆ ၵူၼ်းၼမ်ႉၸၢင် ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“သဵင်ႁိူဝ်းမိၼ်တႄႉ ထူၼ်ႈယဝ်ႉ။ ၶိုၼ်ႈၶိုၼ်ႈလူင်းလူင်းယူႇတင်းဝၼ်းၼၼ်ႉယဝ်ႉ။ ႁိူဝ်းမိၼ် ဢၼ်ၸႂ်ႉၼႂ်းၵၢၼ်သိုၵ်းမၢၼ်ႈၼႆႉ မႃးလူင်းတီႈၼႆႈၵမ်ႈၼမ်ယဝ်ႉ။ မၢင်လမ်းႁၼ်ပဵၼ်လမ်းသီသွမ်ႇဝႆႉ။ လႅပ်ႈတေပဵၼ်ဢၼ်ၶဝ်သိုဝ်ႉမႃးတၢင်းမိူင်းရတ်ႊသျႃႊႁိုဝ်ဢမ်ႇႁူႉ။ ၼိုင်ႈဝၼ်းၼႆႉ ပေႃးပဵၼ်ႁိူဝ်းမိၼ် မႅင်းမီႈၼၼ်ႉ ၶိုၼ်ႈလူင်းမွၵ်ႈ 7 ပွၵ်ႈၼႆႉ။ ၶဝ်ၶိုၼ်ႈလူင်းတၢင်းၼမ်ႉၸၢင်ၼႆႉ တေလႆႈၼမ်တိူဝ်းလိူဝ် ၵူႈပွၵ်ႈမႃးတႄႉတႄႉဢေႃႈ”- ဝႃႈၼႆ။

ဝၢႆးလင်ပၢင်တိုၵ်း 1027 ႁၢင်ပီ 2023 – ထိုင်မႃးႁူဝ်ပီ 2024 တေႃႇထိုင်ယၢမ်းလဵဝ် သိုၵ်းမၢၼ်ႈ ၸႂ်ႉၶိူင်ႈ မိၼ်သိုၵ်း တီႈၶူင်ႇႁိူဝ်းမိၼ်ၼမ်ႉၸၢင် မိၼ်ၶိုၼ်ႈလူင်းၵႂႃႇမႃးတင်းၶိုၼ်းတင်းဝၼ်း။ ၼိုင်ႈဝၼ်းလႂ် ၶိုၼ်ႈလူင်းဢမ်ႇယွမ်း 6 ပွၵ်ႈ၊ ၶိူင်ႈမိၼ်သမ်ႉ မိၼ်တႅမ်ႇႁႅင်းၼႃႇလႄႈ ႁဵတ်းႁႂ်ႈသုၵ်ႉသၵ်ႉၸႂ်ၵူၼ်းမိူင်း၊ ဢမ်ႇၸၢင်ႈၼွၼ်းလပ်းၵိၼ်လီ၊ ၵူၼ်းထဝ်ႈလႄႈ ၵူၼ်းမီးတၢင်းပဵၼ်ၸပ်းတူဝ် ပဵၼ်ဢၼ်တူၵ်းၸႂ် လိူဝ်ႁႅင်း ၵူၼ်းပိုၼ်ႉတီႈလၢတ်ႈၼင်ႇၼႆ။

တပ်ႉသိုၵ်းမၢၼ်ႈ ဢၼ်ပၵ်းဝႆႉတၢင်းပွတ်းၼမ်ႉၸၢင်ၼႆႉ မီးဝႆႉ တပ်ႉၶမယ 516 ၊ ၶလယ 66 ၊ တပ်ႉၵွင်ၾၢႆႇၵမ်ႉၵႅမ် 931 ၊ ၶလယ 278 ၸဵမ်ၸိူဝ်းၼႆႉ။

ယၢမ်းလဵဝ် သိုၵ်းမၢၼ်ႈ ၸိူဝ်းယၢမ်ႈပႂ်ႉဢဝ်လွင်ႈႁူမ်ႇလူမ်ႈ ပွတ်းတၢင်းၼမ်ႉၸၢင်ၼႆႉ ႁၢႆၵႂႃႇသေ မီး သိုၵ်းမၢၼ်ႈ ၸိူဝ်းဢမ်ႇယၢမ်ႈႁၼ်ၼၼ်ႉ မႃးယူႇတႅၼ်း။ ၵူၼ်းၼမ်ႉၸၢင် သိုပ်ႇလၢတ်ႈၼႄၼင်ႇၼႆ –

“သိုၵ်းမၢၼ်ႈၶဝ် ဢၼ်ယၢမ်ႈပႂ်ႉၵိၼ်း ပႂ်ႉဢဝ်လွင်ႈႁူမ်ႇလူမ်ႈ ၸွမ်းပွၵ်ႉၸွမ်းယွမ်ႇ ၸိူဝ်းၼႆႉၵေႃႈ ဢမ်ႇ ပေႃးမီးယဝ်ႉ မီးၵေႃႈ ဢမ်ႇၸႂ်ႉၸုမ်းလဵဝ်ၵၼ်ယဝ်ႉ ၶဝ်လၢႆႈဢွင်ႈတီႈၵၼ်ၶႃႈယူဝ်ႉ။ မိူဝ်ႈၼႃႈပိူၼ်ႈတေ သိမ်းလႃႈသဵဝ်ႈၼၼ်ႉတႄႉ ႁၼ်သိုၵ်းမၢၼ်ႈၶဝ် ထႅမ်ႁႅင်းသိုၵ်း မႃးတၢင်းၼႆႉ”- ဝႃႈၼႆ။

ၶိူင်ႈမိၼ် သိုၵ်းမၢၼ်ႈ ဢၼ်ၶိုၼ်ႈလူင်းတီႈၼမ်ႉၸၢင်ၼႆႉ – ၵမ်ႈၼမ် မုင်ႈၼႃႈ ၵႂႃႇတၢင်းၸိုင်ႈတႆး ပွတ်းႁွင်ႇ၊ လႅပ်ႈတေ ၵႂႃႇတၢင်းသီႇပေႃႉ၊ ၵျွၵ်ႉမႄး၊ ၼွင်ၶဵဝ်၊ မိူင်းမိတ်ႈ ၸိူဝ်းၼၼ်ႉၼႆ – ၵူၼ်းပိုၼ်ႉတီႈ လၢတ်ႈၼင်ႇၼႆ။