မၢၵ်ႇၶိူဝ်သူမ်ႈ ဢၼ်ဢွၵ်ႇတီႈ ၼႂ်းၸႄႈဝဵင်းပၢင်လွင်း ၼွင်တရႃး သီႇၵိပ်ႇလႄႈ ၼႂ်းၸႄႈဝဵင်းယွင်ႁူၺ်ႈ ထုင်ႉၼွင်ႁၢႆးယႃႈ ၸိုင်ႈတႆးပွတ်းၸၢၼ်းၼႆႉ ယွၼ်ႉၵႃႈၶၼ်တူၵ်းႁႅင်း ႁဵတ်းႁႂ်ႈၸဝ်ႈသူၼ်သုမ်းၼမ် ဝႃႈၼႆ။

မိူဝ်ႈႁၢင်လိူၼ်ၵျူႊလၢႆႊၼႆႉ မၢၵ်ႇၶိူဝ်သူမ်ႈ ၼိုင်ႈၸွႆႉလႂ် လႆႈၶၢႆ 2,000 – 2,500 ပျႃး၊ ယၢမ်းလဵဝ် ၼႂ်းႁၢင်လိူၼ်ဢေႃႊၵတ်ႊသ်ၼႆႉ ၼိုင်ႈၸွႆႈလႂ် လႆႈၶၢႆ မွၵ်ႈ 300 ပျႃး၊ သင်ၾၢႆႇၸဝ်ႈသူၼ် ဢမ်ႇယွမ်းၶၢႆ ၵူၼ်းၵႃႉၶဝ် ဢမ်ႇသိုဝ်ႉဢမ်ႇဢဝ်ယဝ်ႉလႄႈ ပဵၼ်ဢၼ်သုမ်းၼမ်တႄႉတႄႉ ၸဝ်ႈသူၼ်မၢၵ်ႇၶိူဝ်သူမ်ႈ ၼႂ်းထုင်ႉပၢင်လွင်း ၵေႃႉၼိုင်ႈလၢတ်ႈ။

ၼႂ်းၸႄႈဝဵင်းပၢင်လွင်းၼႆႉ ယွၼ်ႉၾူၼ်တူၵ်းထပ်းၵၼ်လၢႆလၢႆဝၼ်း ၼမ်ႉၼွင်းလုပ်ႇထူမ်ႈသေ သူၼ်မၢၵ်ႇၶိူဝ်သူမ်ႈ လူႉၵွႆၸွမ်းတင်းၼမ်ထႅင်ႈ။

လိူဝ်ၼၼ်ႉ ၼႂ်းထုင်ႉၼွင်ႁၢႆးယႃႈ မိူၼ်ၼင်ႇ တၢင်းဝၢၼ်ႈၵေႇလႃႇလႄႈ ဝၢၼ်ႈၵျေးသႃး ၸိူဝ်းၼႆႉၵေႃႈ မီးၵူၼ်းၽုၵ်ႇမၢၵ်ႇၶိူဝ်သူမ်ႈၼမ် ႁႅင်းဢွၵ်ႇၵေႃႈလီယူႇသေတႃႉ ယွၼ်ႉလႆႈၶၢႆ ၼိုင်ႈၸွႆႉလႂ် 400 – 500 ပျႃးၵူၺ်းလႄႈ တိုၼ်းလၢင်း ၵေႃႈ ဢမ်ႇလႆႈၶိုၼ်းၼႆ – ၼၢင်းယိင်း ၸဝ်ႈသူၼ်ၵေႃႉၼိုင်ႈ လၢတ်ႈၼင်ႇၼႆ။

မၢၵ်ႇၶိူဝ်သူမ်ႈ ဢၼ်ဢွၵ်ႇတၢင်း ထုင်ႉပၢင်လွင်း၊ သီႇၵိပ်ႇ၊ ၼွင်တရႃး ၸိူဝ်းၼႆႉ သူင်ႇၶၢႆတီႈဝဵင်းဢွင်ႇပၢၼ်း ၊ ယူႇတီႈ ဝဵင်းဢွင်ႇပၢၼ်း ၶိုၼ်းသူင်ႇၵႃႉၶၢႆ တၢင်းဝဵင်းတႃႈၵုင်ႈ၊ ဝဵင်းလိူဝ်ႇ၊ မျႃႉဝတီႇ၊ မူႇၸေႊ၊ ယၢမ်းလဵဝ် မၢင်တီႈ သဵၼ်ႈတၢင်းပိၵ်ႉဢိုတ်းဝႆႉလႄႈ ဢမ်ႇၸၢင်ႈတေႃႉသူင်ႇၵႃႉၶၢႆတေႃႇၵၼ် ႁဵတ်းႁႂ်ႈၵႃႈၶၼ် တူၵ်းႁႅင်း ဝႃႈၼႆ။

ၵူၺ်းၵႃႈ ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇ တၢင်းဝဵင်းမူႇၸေႊ၊ ၼမ်ႉၶမ်း လႅၼ်လိၼ်တႆး – ၶႄႇသမ်ႉ ၶၼ်မၢၵ်ႇၶိူဝ်သူမ်ႈ သုင်ႁႅင်း၊ လႆႈသိုဝ်ႉၵိၼ် ၼိုင်ႈၸွႆႉလႂ် မွၵ်ႈၼိုင်ႈမိုၼ်ႇၵေႃႈမီး ၼႆယဝ်ႉ။