ၽွင်းၵၢင်ၶိုၼ်းလိုၵ်း တီႈဝဵင်းမူႇၸေႊ မီးလွင်ႈလမ်းယိုဝ်းတၢႆ ၽူႈၸၢႆးၵေႃႉၼိုင်ႈ လူႉတၢႆထင်တီႈ ၵိုၵ်းၵႃး ၼႆယဝ်ႉ။
ဝၼ်းတီႈ 29/08/2024 ယၢမ်းၵၢင်ၶိုၼ်းလိုၵ်းမွၵ်ႈ 11 မူင်းၶိုင်ႈ ၽူႈၸၢႆးၵေႃႉၼိုင်ႈ ၺႃးယိုဝ်းတၢႆ ၵိုၵ်းၵႃး တီႈၼိူဝ်သဵၼ်ႈတၢင်းပူဝ်ႇတႄး ၼႂ်းၵႄႈပွၵ်ႉၵွင်းၼွင် – ပွၵ်ႉၶရိတ်ႉယၼ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ ၵေႃႉၺႃးယိုဝ်းတၢႆၼၼ်ႉ ပဵၼ်ၸၢဝ်းၶႄႇ မၼ်း ၸၢႆးၺႃးလမ်းယိုဝ်းမႃး လုၵ်ႉတီႈပွၵ်ႉၵွင်းၼွင် ပၼ်ႇၶိုၼ်ႈမႃးတၢင်းႁေႃၼႃႇလီၵၢင်ဝဵင်း သေ ပၼ်ႇၵႂႃႇတၢင်းၾၢႆႇၸၢၼ်း ဢွၵ်ႇၵႂႃႇသဵၼ်ႈတၢင်းလူင် ပွၵ်ႉၼိူဝ်သေ ၺႃးယိုဝ်းတၢႆ ၼႂ်းၵႄႈပွၵ်ႉၵွင်းၼွင် – ပွၵ်ႉၶရိတ်ႉယၼ်ႇ။ ၵူၼ်းမႃးၸွမ်းၼႂ်း ၵႃးတႄႉ ဢမ်ႇပဵၼ်သင်ၶႃႈ ၵူၼ်းႁေႃႈၵႃးၼၼ်ႉၵူၺ်း ၺႃး ယိုဝ်းတၢႆ”- ဝႃႈၼႆ။
ၸုမ်းဢၼ်မႃးလၢမ်းယိုဝ်းၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ်ယိုဝ်းတႄႉ ဢမ်ႇလႆႈႁူႉၸွမ်း ဝႃႈၼႆ။
“လႆႈႁူႉဝႃႈ ပဵၼ်ၸၢဝ်းၶႄႇ ယူႇပွၵ်ႉၵွင်းၼွင် လုၵ်ႈၶဝ်ဢမ်ႇယူႇလီၼႆသေ တေဢဝ်ၵႂႃႇႁူင်းယႃ ၼႂ်းၵႃးၼၼ်ႉ ပႃးမႄႈလုၵ်ႈဢွၼ်ႇလႄႈ ၼၢင်းယိင်းထႅင်ႈ ၵေႃႉၼိုင်ႈ ယဝ်ႉၵေႃႈ လုၵ်ႈဢွၼ်ႇ ၵေႃႉၼိုင်ႈ။ ၼၼ်ႉတႄႉ ဢမ်ႇတိူဝ်ႉမၢတ်ႇၸဵပ်းသင်ၶႃႈ။ ယူႇတီႈ ႁဝ်းၶႃႈထၢင်ႇတႄႉ တေၵဵဝ်ႇၶွင်ႈၸွမ်း ၸုမ်းယိပ်းၵွင်ႈၵၢင်ႇသေ ၸုမ်းၸုမ်းယူႇ ထိုင်တီႈပေႃးလႆႈလၢမ်းယိုဝ်းၵၼ်တၢႆ ၸိူင်ႉၼႆ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။
ၽူႈၸၢႆး ဢၼ်ၺႃးယိုဝ်းတၢႆၼၼ်ႉ တိူဝ်ႉၺႃး ဢမ်ႇၵွင်း ဢမ်ႇယွမ်း 10 လုၵ်ႈ။ ၼႂ်းၵႃးၼၼ်ႉ ပႃးမႃးလုၵ်ႈဢွၼ်ႇ 1 ၵေႃႉ၊ ၼၢင်းယိင်း 2 ၵေႃႉ ၼၼ်ႉတႄႉ ဢမ်ႇလႆႈတိူဝ်ႉမၢတ်ႇၸဵပ်းၸွမ်းသင် ၼႆယဝ်ႉ။
ၼႂ်းဝၼ်းတီႈ 29 ယၢမ်းၵၢင်ၶိုၼ်းလိုၵ်း 11 မူင်းၼႆႉ တီႈပွၵ်ႉႁူဝ်ၼႃးၵေႃႈ မီးလွင်ႈလၢမ်းယိုဝ်းၵၼ်ထႅင်ႈ ပဵၼ်ၵႃးသွင်လမ်း သႅၼ်း Crown ၼၼ်ႉတႄႉ ပႆႇလႆႈႁူႉႁူဝ်ယွႆႈမၼ်း ယွၼ်ႉသင်လႄႈ လၢမ်းယိုဝ်းၵၼ် ဢၼ်ဝႃႈၼၼ်ႉ ဝႃႈၼႆ။
ယဝ်ႉၵေႃႈ ၼႂ်းလိူၼ်ဢေႃႊၵတ်ႊသ်ၼႆႉၵူၺ်း ၵူၼ်းမူႇၸေႊ ၺႃးၸူၼ် ဢမ်ႇယွမ်း 3-4 ပွၵ်ႈယဝ်ႉ။ မိူဝ်ႈဝၼ်းတီႈ 23 ယၢမ်းၵၢင်ၶမ်ႈမွၵ်ႈ 8 မူင်းၶိုင်ႈ ၼၼ်ႉၵေႃႈ ၺႃးၸုမ်းဢမ်ႇႁူႉၾၢႆႇ 3 ၵေႃႉ ယိုဝ်းၵွင်ႈ လွၵ်ႇငိုတ်ႈသေ ၸူၼ်ႁႃဢဝ်ၵႃး ၵူၼ်းမိူင်းၵႂႃႇလမ်းၼိုင်ႈ တီႈၼႃႈႁၢၼ်ႉ T Nail House ပွၵ်ႉၵၢတ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ