ပၢင်တိုၵ်း ၵိူတ်ႇပဵၼ်ယူႇၼႂ်းမိူင်းမၢၼ်ႈ ပတ်းပိုၼ်ႉၼႆႉ သိုၵ်းမၢၼ်ႈ သုမ်းသိုၵ်း သုမ်းၼႃႈတီႈ လႆႈထွႆထွၼ်ပၼ်တင်းၼမ် ယၢမ်းလဵဝ် သိုၵ်းမၢၼ်ႈ ၶိုင်ႁွင်ႉၵူၼ်းမိူင်း လဵၵ်ႉယႂ်ႇၼုမ်ႇထဝ်ႈ သၢမ်ပၢၼ်ၸဵတ်းသႅၼ်း ႁႂ်ႈၶဝ်ႈႁၢပ်ႇၵၢၼ်သိုၵ်း ဝႃႈ ၼႆ။

ဝၼ်းတီႈ 16/08/2024 ပူၼ်ႉမႃးၼၼ်ႉ သိုၵ်းမၢၼ်ႈ ၶွတ်ႇၽွတ်ႈ ၸုမ်းၾၢႆႇၵုမ်းၵမ်ငဝ်ႈငုၼ်း ၾၢႆႇႁူမ်ႇလူမ်ႈၵူၼ်းမိူင်းလႄႈ ၾၢႆႇၽဵဝ်ႈမူၺ်ႉၵၢၼ်ႁုၵ်ႉႁၢႆႉ၊ ဝၢႆးၼၼ်ႉ ၸွမ်းၼင်ႇသဵၼ်ႈတၢင်း၊ ပွၵ်ႉ၊ ဝၢၼ်ႈဢိူင်ႇသေ ထုၵ်ႇလီၶွတ်ႇၽွတ်ႈ ၸုမ်းႁူမ်ႇလူမ်ႈၵႂႃႇၼႆ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၵေႃႈ တိုၵ်းသူၼ်းၵႂႃႇ မိူဝ်ႈဝၼ်းတီႈ 25 ပူၼ်ႉမႃးၼႆႉ ၼင်ႇၼႆ။

လိူဝ်ၼၼ်ႉ တေႁွင်ႉဢဝ်ၶိုၼ်း ၵူၼ်းဢမ်ႇပူၼ်ႉ လွင်ႈၵူတ်ႇထတ်းယႃလႄႈ ၵူၼ်းၸိူဝ်းထုၵ်ႇယင်ႉၵိုတ်းဝႆ့ ၸွမ်းၼင်ႇပိူင် ၵဵပ်းသိုၵ်းၸိူဝ်းၼၼ်ႉသေ တေႁႂ်ႈပၼ်ႇပုတ်ႈဢဝ်ႁူမ်ႇလူမ်ႈၵႂႃႇၼႆ ၽူႈၶၢၼ်ပၢၵ်ႇသိုၵ်းမၢၼ်ႈ ၸွမ်ႁၢၼ် ၸေႃႇမိၼ်းထုၼ်း တွပ်ႇဝႆႉတီႈသိုဝ်ႇ BBC ၼင်ႇၼႆ။

ဢၼ်ယိူင်းဢၢၼ်းတႄႉပဵၼ် တႃႇပွၵ်ႉ၊ ဝၢၼ်ႈဢိူင်ႇလႄႈ ဝဵင်း ႁႂ်ႈမီးလွင်ႈၼိမ်သဝ်းၵတ်းယဵၼ်။ ၵူၼ်းမိူင်း ၸိူဝ်းဢႃယု တဵမ် 35 ပီယဝ်ႉသေတႃႉ သင်ဝႃႈ ပဵၼ်ၵူၼ်းတိုၵ်ႉပေႉႁၢပ်ႇၵၢၼ်ႁူမ်ႇလူမ်ႈ၊ တႃႇၵၢၼ်ငမ်း ယဵၼ်ၼိမ်တဵင်ႈၼႆ တေႁႂ်ႈ ႁၢပ်ႇၵၢၼ်ၵႂႃႇ၊ ပိူင်ယႂ်ႇ တေႁွင်ႉဢဝ်ၵူၼ်းၸၢႆးၵႂႃႇ။ တေပၼ်ပႃးၶိူင်ႈၵွင်ႈၵၢင်ႇ တႃႇၵႅတ်ႇၶႄၼႆ ၸွမ်ႁၢၼ် ၸေႃႇမိၼ်းထုၼ်း လၢတ်ႈၼင်ႇၼႆ။ တေပၼ်ယိပ်းၶိူင်ႈလၢၵ်ႈၼၢၵ်ႈ ၸိူင်ႉႁိုဝ် ဢၼ်ဝႃႈၼၼ်ႉတႄႉ ဢမ်ႇလၢတ်ႈပႃး။

ဢိင်ၼိူဝ်လွင်ႈၼႆႉသေ ဢူးတၢၼ်းၸူဝ်းၼၢႆႇ ၽူႈလဵပ်ႈႁဵၼ်းၵၢၼ်မိူင်း ထတ်းသၢင်ဝႆႉဝႃႈ – ပဵၼ်ၽႅၼ်ၵၢၼ် သိုၵ်းမၢၼ်ႈ ၶိုင်ဢဝ်ၵူၼ်းမိူင်းလဵၵ်ႉယႂ်ႇၼုမ်ႇထဝ်ႈ တင်းသဵင်ႈ ၸၼ်ၶဝ်ႈၼႂ်းၶွပ်ႇပိူင်သိုၵ်း၊ ၼႂ်းတပ်ႉသိုၵ်း၊ ယွၼ်ႉပိူဝ်ႈ တီႈပၢင်တိုၵ်း သိုၵ်းမၢၼ်ႈ သုမ်းႁႅင်းၵူၼ်းၼမ် သုမ်းသိုၵ်းဝႆႉ ဝႃႈၼႆ။

မိူဝ်ႈလိူၼ်ၾႅပ်ႊပိဝ်ႊရီႊ ႁူဝ်ပီ 2024 ၼႆႉ သိုၵ်းမၢၼ်ႈ ပိုၼ်ၽၢဝ်ႇ ပိူင်ႁၢပ်ႇၵၢၼ်သိုၵ်း ဢၼ်ပဵၼ်ၵူၼ်းၸၢႆး ဢႃယု 18 – 35 ပီ၊ ၵူၼ်းယိင်း 18 – 27 ပီ တေလႆႈၶဝ်ႈႁၢပ်ႇၵၢၼ်သိုၵ်း ၼႂ်းတပ်ႉမတေႃႇ၊ ဝၢႆးၼၼ်ႉ သိုၵ်းမၢၼ်ႈ ၵဵပ်းသိုၵ်းသေ ပိုတ်ႇပၢင်သွၼ်ၵၢၼ်သိုၵ်းမႃး 5 ၵမ်း ဢဵၼ်ႁႅင်းၵူၼ်းသိုၵ်းမႂ်ႇမွၵ်ႈ 25,000 ၵေႃႉ။ ၸိူဝ်းလူင်းပၢင်သွၼ်ၵၢၼ်သိုၵ်းၼၼ်ႉ သိုၵ်းမၢၼ်ႈ သူင်ႇၼႃႈသိုၵ်း ႁႂ်ႈၶဝ်ႈပၢင်တိုၵ်းသေ ႁဵတ်းႁႂ်ႈၵူၼ်းမိူင်းမၢတ်ႇၸဵပ်းလူႉတၢႆၼမ်ၼႆ – ၽူႈလဵပ်းႁဵၼ်းၵၢၼ်မိူင်း ထတ်းသၢင်လၢတ်ႈဝႆႉၼင်ႇၼႆ။