မီးၵူၼ်းၸုမ်းၼိုင်ႈ ပႃးၵွင်ႈ ၶဝ်ႈၼႂ်းႁၢၼ်ႉၶၢႆ ၶဝ်ႈၽၵ်း သေ ယိုဝ်းသႂ်ႇၸဝ်ႈၶွင်ႁၢၼ်ႉ သွင်ၽူဝ်မေး လူႉတၢႆထင်တီႈ တီႈဝၢၼ်ႈသူၼ်ဢွႆႈ ၸႄႈဝဵင်း သီႇပေႃႉ – ဝႃႈၼႆ။
ဝၼ်းတီႈ 15/06/2018 ယၢမ်းၵၢင်ၶိုၼ်း မွၵ်ႈ 10 မူင်း မီး ၵူၼ်းသွင်ၵေႃႉ ပႃးၵွင်ႈ ၶဝ်ႈမႃးၼႂ်းႁၢၼ်ႉတၢင်းၶၢႆ ၶဝ်ႈၽၵ်းလုင်းၸၢႆးၸၢမ်ႇၺုၼ်ႇ တင်း ပႃးၼၢင်းသူၺ်ႇၵျီႇ ဢၼ်မီး တီႈတူၼ်ႈမႆႉၺွင်ႇ ဝၢၼ်ႈသူၼ်ဢွႆႈ ဢိူင်ႇၼမ်ႉ သိမ်ႇ ၸႄႈဝဵင်းသီႇပေႃႉ သေ ယိုဝ်းသႂ်ႇ ၶႃ 2 ၵေႃႉၽူဝ်မေး လူႉတၢႆထင်တီႈ ဝႃႈၼႆ။
ၽူႈမီးပုၼ်ႈၽွၼ်းၼႂ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဢၼ်မႃး ယိုဝ်းၶဝ် ပဵၼ်ၸုမ်းလႂ်၊ ပဵၼ်ၽႂ်ဢၼ်ဝႃႈၼၼ်ႉ ဢမ်ႇလႆႈႁူႉ။ လွင်ႈတၢင်းမၼ်းတႄႉမိူဝ်ႈၶမ်ႈဝႃး ၵၢင်ၶမ်ႈမွၵ်ႈ 10 မူင်းၼၼ်ႉ မီးၽူႈၸၢႆး 2 ၵေႃႉ ၶဝ်ႈမႃးၼင်ႈၵိၼ်ၶဝ်ႈ တီႈၼႂ်းႁၢၼ်ႉၶဝ်သေ ဢဝ်ၵွင်ႈယိုဝ်းသႂ်ႇ ၸဝ်ႈၶွင်ႁၢၼ်ႉ သွင် ၽူဝ်မေး။ လုၵ်ႈၼွင်ႉဢၼ်ၸွႆႈၶဝ်ၶၢႆၶဝ်ႈၽၵ်း တႄႉဢမ်ႇယိုဝ်းပႃး။ လုင်းၸၢမ်ႇၺုၼ်ႉ ၸဝ်ႈႁၢၼ်ႉ ၺႃးမၢၵ်ႇၵွင်ႈ လၢႆလၢႆၵမ်း။ ပႃႈၼၢင်းသူၺ်ႇၵျီႇ ၵေႃႉပဵၼ်မေး လုင်းၸၢမ်ႇၺုၼ်ႉ ၺႃးၵွင်ႈတီႈၼႃႈဢူၵ်းလုၵ်ႈၼိုင်ႈလႄႈ တီႈၶႅၼ် တီႈၼိုင်ႈ” ဝႃႈၼႆ။
လုင်းၸၢႆးၸၢမ်ႇၺၼ်ႉၼႆႉ မိူဝ်ႈဢွၼ်တၢင်း ယၢမ်ႈပဵၼ်ပူႇၵႄႇဝၢၼ်ႈသူၼ်ဢွႆႈ (ယၢမ်းလဵဝ် ပဵၼ်ႇၸိုဝ်ႈ ပဵၼ် ဝၢၼ်ႈၵျၢၼ်ႇၶိၼ်း) ဝႃႈၼႆ။
ပလိၵ်ႈမၢၼ်ႈ ဝဵင်းသီႇပေႃႉ ၵူတ်ႇထတ်း တူၺ်းလွင်ႈတၢင်း ႁဵတ်ႇပဵၼ် ႁဵတ်ႇတၢႆဝႆႉသေတႃႉ တေႃႇထိုင်မိူဝ်ႈလဵဝ်ပဵၼ် ၸုမ်းလႂ် ၽႂ်မႃးယိုဝ်းဢၼ်ဝႃႈၼၼ်ႉ ယင်းဢမ်ႇပႆႇႁူႉ ဝႃႈၼႆ။
ၸၢႆးပီးလူင် ၵူၼ်းသီႇပေႃႉလၢတ်ႈဝႃႈ “ ၼႂ်းၸႄႈဝဵင်းသီႇပေႃႉႁဝ်းၶႃႈၼႆႉ ဢမ်ႇမီးလွင်ႈႁူမ်ႇလူမ်ႈသင် ၶႂ်ႈဝႃႈ ၵူၼ်း မိူင်းလႆႈၺႃးႁဵတ်းႁၢႆႉယူႇတႃႇသေႇ။ မိူဝ်ႈပူၼ်ႉမႃး ပႆႇႁိုင်ၼၼ်ႉၵေႃႈ ၵူၼ်းမိူင်းလႆႈၺႃးယိုဝ်းမႃးလၢႆၵေႃႉယဝ်ႉ။ လိူဝ် ၼၼ်ႉ ၸဝ်ႈၵႃးၵေႃႈၺႃးယိုဝ်းသေတၢႆၵေႃႈမီး။ တေႃႈလဵဝ်ၼႂ်းမိူင်းႁဝ်းၶႃႈၼႆႉ ဢမ်ႇမီးလွင်ႈႁူမ်ႇလူမ်ႈ ၶႂ်ႈလီၵူဝ် မႃးၵူႈဝၼ်းယဝ်ႉ” ဝႃႈၼႆ။
တေႃႈလဵဝ်ၼႆႉ တူဝ်တၢႆ လုင်းၸၢႆးၸၢမ်ႇၺုၼ်ႇတင်း ပႃႈၼၢင်းသူၺ်ႇၵျီႇၼႆႉ ယူႇတီႈၸုမ်းၸွႆႈထႅမ်ၵူၼ်းထူပ်းၽေး ၸႄႈဝဵင်းသီႇပေႃႉ သေ ဢဝ်ၵႂႃႇဝႆႉတီႈႁူင်းယႃသီႇပေႃႉယဝ်ႉ ဝႃႈၼႆ။
ၼႂ်းၶၢဝ်းတၢင်း 5-6 လိူၼ်ၼႆႉၵူၺ်း ၵူၼ်းႁေႃႈၵႃး၊ ၵူၼ်းၵႃႉဝူဝ်း၊ ၵူၼ်းဝၢၼ်ႈ ၵူၼ်းမိူင်း ၼႂ်းၸေႈဝဵင်းသီႇပေႃႉ ၺႃးယိုဝ်းတၢႆ ဢမ်ႇယွမ်း 6 ၵေႃႉ ယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ