ၶၢဝ်းတၢင်း 2 လိူၼ်မႃးၼႆႉ ၼမ်ႉသၢႆ လုပ်ႇထူမ်ႈၼႂ်းဝဵင်းတႃႈၶီႈလဵၵ်းမႃးႁၢဝ်ႈႁႅင်း ဢမ်ႇယွမ်း 6 ပွၵ်ႈယဝ်ႉ ပွၵ်ႈၼႆႉ တီႈ ၵၢတ်ႇတႃႈလေႃႉ ၼမ်ႉထူမ်ႈလိုၵ်ႉပူၼ်ႉၸူဝ်ႈၵူၼ်း ဝႃႈၼႆ။

ဝၼ်းတီႈ 27/08/2024 တႄႇဢဝ်ယၢမ်းဝၢႆးဝၼ်း 4 မူင်းမႃး ၼမ်ႉသၢႆ လူၼ်ႉၾင်ႇ လုပ်ႇထူမ်ႈ ၸွမ်းပွၵ်ႉပုင်းထုၼ်၊ သၼ်သၢႆး၊ မၢၵ်ႇၵႃႇႁူဝ်ၶမ်း၊ မႄႈၶၢဝ်လႄႈ ၵၢတ်ႇတႃႈလေႃႉ ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ႁၢဝ်ႈႁႅင်းထႅင်ႈ ႁဵတ်းႁႂ်ႈၵူၼ်းမိူင်းတုၵ်ႉၶယၢပ်ႇၽိုတ်ႇ ၵိၼ်းၸႂ်ထႅင်ႈ။  

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉထူမ်ႈ ပွၵ်ႈၵမ်း 6 ၼႆႉ ဢမ်ႇလူဝ်ႇ လၢတ်ႈသင်ယဝ်ႉ ၼႃႇလိူဝ်ၵူႈပွၵ်ႈဢေႃႈ။ တီႈၵၢတ်ႇတႃႈလေႃႉၼၼ်ႉ လိုၵ်ႉပူၼ်ႉႁူဝ်ၵူၼ်းၶႃႈၼႃႇ။ ၵူၼ်းမိူင်း မၢင်ၸိူဝ်း ၼွၼ်းပေႃးဢမ်ႇလပ်းလႆႈယဝ်ႉ ၵူဝ်ၼမ်ႉထူမ်ႈႁႅင်း။ ပွၵ်ႈၼႆႉ ၼမ်ႉထူမ်ႈထိုင်ၶူဝ်မၢႆ 2 ပုၼ်ႉ ဢေႃႈ။ ၵူႈပွၵ်ႈဢမ်ႇထူမ်ႇလူး တီႈၶူဝ်မၢႆ 2 ၼၼ်ႉ”- ဝႃႈၼႆ။

ဢၼ်ၵူၼ်းမိူင်း တႃႈၶီႈလဵၵ်း လႆႈယၢပ်ႇၽိုတ်ႇၸွမ်း ၼမ်ႉထူမ်ႈယူႇ ယၢမ်းလဵဝ်ၼႆႉ ၵမ်ႈၼမ် တေႁိူဝ်ႉၸွမ်း ဝၢႆးၼမ်ႉယွမ်းလူင်း ယွၼ်ႉဝႃႈ ၶီႈၵူမ်ႇၶီႈငႂ်ႈ ၵိုတ်းၶင်ႉၼမ် လူဝ်ႇၽဵဝ်ႈလၢင်း ၼၼ်ႉယဝ်ႉ။

“ဢၼ်ႁဝ်းၶႃႈ ႁိူဝ်ႉႁႅင်းၼႆႉ ဝၢႆးၼမ်ႉထူမ်ႈယွမ်းလူင်းယဝ်ႉ ႁဝ်းၶႃႈ လူဝ်ႇပတ်းၽဵဝ်ႈလၢင်ႉၼႂ်းႁိူၼ်းယေး ၼၼ်ႉယဝ်ႉ။ ပေႃးလၢင်ႉယဝ်ႉမူတ်း ယူႇဢမ်ႇႁိုင် ၾူၼ်တူၵ်းထႅင်ႈ ဢဝ်ၼမ်ႉလုပ်ႇၼွင်းထူမ်ႈထႅင်ႈ ပေႃးယဝ်ႉ လႆႈပတ်းၽဵဝ်ႈထႅင်ႈ လႆႈႁိူဝ်ႉၸွမ်း ၸိူင်ႉၼႆၼႆႉ ပေႃးဢမ်ႇၶႂ်ႈလၢတ်ႈသင်ၸွမ်းယဝ်ႉ ယွၼ်ႉလႆႈပတ်း လႆႈၽဵဝ်ႈၶီႈၵူမ်ႇၶီႈငႂ်ႈၼၼ်ႉၶႃႈၼႃႇ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈၼမ်ႉသၢႆ လုပ်ႇထူမ်ႈ ဝဵင်းတႃႈၶီႈလဵၵ်းၼႆႉ ဢမ်ႇၸႂ်ႈပီၼႆႉၵူၺ်း ပေႃးၶၢဝ်းၾူၼ်ၼႆ ၵႆႉလုပ်ႇထူမ်ႈမႃးၵူႈပီ ယွၼ်ႉလူင်ပွင်ၸိုင်ႈ တင်းသွင်ၸိုင်ႈမိူင်း ဢမ်ႇယွမ်းၵႄႈလိတ်ႈပၼ်ႁႃ ပၼ်ၵူၼ်းမိူင်း ပွႆႇႁႂ်ႈႁွင်ႈၼမ်ႉသၢႆၵႅပ်ႈ၊ တိုၼ်ႈ၊ ယုၵ်းယၢၵ်းၶမ်ၼမ် ၼၼ်ႉယဝ်ႉ။

ၵူၼ်းၼုမ်ႇ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ပၼ်ႁႃမၼ်းၼႆႉ ပဵၼ်ၼႆ တင်းသွင်ၾင်ႇၼႆႉ ႁဵတ်းႁိူၼ်း ၶႂၢၵ်ႈၶဝ်ႈၼႂ်းၼမ်ႉသၢႆ ၼင်ႇၵၼ်။ ႁဵတ်းႁႂ်ႈႁွင်ႈၼမ်ႉသၢႆၵႅပ်ႈလူင်း၊ ယဝ်ႉၵေႃႈ ႁွင်ႈတိုၼ်ႈ ဢမ်ႇလၢင်း ႁဵတ်းလွင်ႈမူတ်းသႂ်ပၼ် ယဝ်ႉၵေႃႈ ပႅတ်ႈယုၵ်းယၢၵ်း တူၵ်းသႂ်ႇၼႂ်းၼမ်ႉသၢႆၵေႃႈၼမ်။ ၼမ်ႉ ၼႆႉ ဢမ်ႇၸႂ်ႈထူမ်ႈတၢင်း ၾင်ႇတႃႈၶီႈလဵၵ်းၼႆႉၵူၺ်း တၢင်းၾင်ႇမႄႈသၢႆၼၼ်ႉၵေႃႈ ထူမ်ႈႁႅင်းမိူၼ်ၵၼ်ယဝ်ႉ။ ပေႃးဝႃႈ လူင်ပွင်ၸိုင်ႈ တင်းသွင်ၾၢႆႇ ဢမ်ႇယွမ်းၵႄႈလိတ်ႈပၼ်ႁႃၼႆႉၸိုင် ထႅင်ႈ 2-3 ပီ တၢင်းၼႃႈၼၼ်ႉ တီႈတႃႈၶီႈလဵၵ်း – မႄႈသၢႆၼႆႉ တေပဵၼ်ၼွင်လူင် ၵႂႃႇပႅတ်ႈမူတ်းယဝ်ႉ”- ဝႃႈၼႆ။

ၼွၵ်ႈလိူဝ်သေ တီႈဝဵင်းတႃႈၶီႈလဵၵ်းၼႆႉယဝ်ႉ ၼႂ်းႁၢင်လိူၼ်ၼႆႉ တီႈဝဵင်းၵႃလီႉ၊ ၵုၼ်ႁဵင်၊ ၶူဝ်လမ်၊ မိူင်းၼၢႆး၊ ၵဵင်းတွင်းလႄႈ လၢင်းၶိူဝ်း ၸိူဝ်းၼႆႉၵေႃႈ ၾူၼ်တူၵ်းႁႅင်းသေ ႁဵတ်းႁႂ်ႈၼမ်ႉလုပ်ႇထူမ်ႈ ႁိူၼ်းယေးတူင်ႈႁႆႈ ၼႃးၵူၼ်းမိူင်းထႅင်ႈ တင်းၼမ်လၢႆ ၼႆယဝ်ႉ။