ၼႂ်းလိူၼ်ၼႆႉ ၾူၼ်တူၵ်းထပ်းၵၼ် ႁၢဝ်ႈႁႅင်းၼႂ်းၸိုင်ႈထႆး ႁဵတ်းႁႂ်ႈၼမ်ႉၼွင်းလုပ်ႇထူမ်ႈ ၵူၼ်းမိူင်းလူႉတၢႆ 22 ၵေႃႉယဝ်ႉ ၽူႈမီးပုၼ်ႈၽွၼ်း ၾၢႆႇၽေးသၽႃႇဝ ပိုၼ်ၽၢဝ်ႇ ၼႂ်းဝၼ်းတီႈ 26/08/2024 ၼႆႉ ၼင်ႇၼႆ။

ၼႂ်းၶၢဝ်းတၢင်း 10 ဝၼ်းမႃးၼႆႉ ၾူၼ်တူၵ်းထပ်းၵၼ်လၢႆဝၼ်းလႄႈ ႁဵတ်းႁႂ်ႈၼမ်ႉၼွင်းလုပ်ႇထူမ်ႈ ၼႂ်းၸႄႈတွၼ်ႈ 31 တီႈ မုင်ႉႁေႃႁိူၼ်း 3 မိုၼ်ႇပၢႆ ထူပ်းၽေးၼမ်ႉ၊ ၼႂ်းၼၼ်ႉ မီးၵူၼ်းမၢတ်ႇၸဵပ်း 19 ၵေႃႉ။ မိူၼ်ၼင်ႇ တီႈဝဵင်းၽူးၵဵတ်ႇ ၼၼ်ႉ ယွၼ်ႉၾူၼ်တူၵ်းထပ်းၵၼ်သေ ပဵၼ်လွင်ႈလိၼ်ၵူၼ်ႇ ႁၢဝ်ႈႁႅင်း မီး ၵူၼ်းလူႉတၢႆ 13 ၵေႃႉ ၼႂ်းၼၼ်ႉ ပႃးႁႅင်း ၵၢၼ်မိူင်းမၢၼ်ႈ 9 ၵေႃႉၼႆ ၸဝ်ႈၼႃႈတီႈ ၼႂ်းပိုၼ်ႉတီႈ ပိုၼ်ၽၢဝ်ႇ ဝႆႉၼင်ႇၼႆ။

တီႈၸႄႈတွၼ်ႈ 31 ဢၼ် ၼႂ်းၸိုင်ႈထႆးပွတ်းႁွင်ႇလႄႈ ၸဵင်ႇႁွင်ႇဝၼ်းဢွၵ်ႇၼၼ်ႉ ၼမ်ႉတိုၵ်ႉၼွင်းထူမ်ႈ ယူႇလၢႆလၢႆတီႈ။ လိူဝ်ၼၼ်ႉ ၼႂ်းဝူင်ႈၼႆႉ ၾူၼ်ၸၢင်ႈတူၵ်းထပ်းၵၼ်ထႅင်ႈလႄႈ ႁႂ်ႈၾၢင်ႉလွင်ႈၼမ်ႉၼွင်း ထူမ်ႈလိၼ်ၵူၼ်ႇၼႆ ႁွင်ႈၵၢၼ်ၾၢႆႇၵႅတ်ႇၶႄ ၽေးသၽႃႇဝ မိူင်းထႆး ပိုၼ်ၽၢဝ်ႇ ပၼ်ၾၢင်ႉဝႆႉၼင်ႇၼႆ။

မိူၼ်ၼႆ ၼႂ်းမိူင်းတႆး လၢႆၸႄႈဝဵင်းၵေႃႈ ၼမ်ႉၼွင်းလုပ်ႇထူမ်ႈဝႆႉ တီႈဝဵင်းလၢင်းၶိူဝ်း၊ တႃႈၶီႈလဵၵ်း၊ ၵဵင်းတုင် ပၢင်လွင်း၊ မိူင်းၼၢႆး၊ ထုင်ႉပူင်း ၸိူဝ်းၼႆႉ ၼမ်ႉၼွင်းလုပ်ႇထူမ်ႈ ႁၢဝ်ႈႁႅင်း – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။