ဝၼ်းတီႈ 27/08/2024 ယၢမ်းၵၢင်ၼႂ်ၼႆႉ ၼမ်ႉသၢႆၼွင်းလူၼ်ႉၾင်ႇ ၶဝ်ႈထူမ်ႈ ၼႂ်းဝဵင်းတႃႈၶီႈလဵၵ်းထႅင်ႈ ႁၢဝ်ႈႁႅင်း တေႃႇထိုင်ယၢမ်းဝၢႆးဝၼ်း ၼမ်ႉယင်းပႆႇလူတ်းယွမ်းလူင်း ၾူၼ်ၵေႃႈ တိုၵ်ႉတူၵ်းယူႇပႆႇထၢတ်ႇ ဝႃႈၼႆ။

ၾူၼ်တူၵ်းထပ်းၵၼ်လၢႆဝၼ်းဢမ်ႇထၢတ်ႇလႄႈ ၼမ်ႉၵိုင်ႉၵၢင်ႉလူၼ်ႉၾင်ႇ ထူမ်ႈၶဝ်ႈၽွင်း ယၢမ်းၵၢင်ၼႂ် 2 မူင်းပၢႆ။ တေႃႇထိုင်ယၢမ်းလဵဝ် ၼမ်ႉတိုၵ်ႉထူမ်ႈၸွမ်း ပွၵ်ႉပုင်းထုၼ်၊ မၢၵ်ႇၵႃႇ ႁူဝ်ၶမ်း ၊ သၼ်သၢႆး၊ မႄႈၶၢဝ်လႄႈ ၵၢတ်ႇတႃႈလေႃႉ ၸိူဝ်းၼႆႉ။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉၼႆႉ တႄႇထူမ်ႈ မိူဝ်ႈၼႆႉ ၵၢင်ၼႂ်ၸဝ်ႉ တေႃႇထိုင်ယၢမ်းလဵဝ်ၵေႃႈ ပႆႇယွမ်း။ ပွၵ်ႈၼႆႉ လႆႈဝႃႈထူမ်ႈႁႅင်း ပဵၼ်ပွၵ်ႈၵမ်း 4 ယဝ်ႉ။ မိူဝ်ႈၼမ်ႉထူမ်ႈ ပွၵ်ႈၵမ်း 2 ၵမ်း 3 ၼၼ်ႉၵေႃႈ  ၽဵဝ်ႈၶီႈၵူမ်ႇၶီႈဢုင် ယင်းပႆႇယဝ်ႉ ၼမ်ႉပေႃးၶိုၼ်းထူမ်ႈထႅင်ႈ ႁဵတ်းၼႆယူႇၵူႈၵမ်း။ ၵမ်းၼႆႉၵေႃႈ မိူၼ် ၵၼ်”- ဝႃႈ ၼႆ။

ပေႃးၼမ်ႉထူမ်ႈမႃး ဢၼ်တုမ်ႉတိူဝ်ႉဢွၼ်တၢင်းသုတ်းပဵၼ် ႁၢၼ်ႉၶၢႆၶူဝ်းၶွင် ၸွမ်းၵၢတ်ႇတႃႈလေႃႉ၊ ၸိူဝ်းၶၢတ်ႈႁွင်ႈယူႇသဝ်း ၸွမ်းတီႈတႅမ်ႇတီႈယၢၼ်း၊ ၵုမ်ႇမိုင်ႉလႆႈၶၢႆႉၶူဝ်းပၢႆႈ၊ ၵုမ်ႇ မိုင်ႉလႆႈၽဵဝ်ႈၵူမ်ႇၵူၺ်းလႄႈ ဢမ်ႇၸၢင်ႇႁဵတ်းၵၢၼ် ႁႃၵိၼ်လဵင်ႉတွင်ႉလီလီ ၵူၼ်းမိူင်းတႃႈၶီႈလဵၵ်း ၵေႃႉၼိုင်ႈ လၢတ်ႈၼင်ႇၼႆ။

“ပီၼႆႉ ၼမ်ႉၵမ်းၵမ်းထူမ်ႈ။ ယွၼ်ႉၼမ်ႉထူမ်ႈသေ ႁဝ်းဢမ်ႇလႆႈႁဵတ်းၵၢၼ် မႃးၵေႃႈႁိုင်ယဝ်ႉၶႃႈ။ မိူဝ်ႈၼႆႉၵေႃႈ ၼမ်ႉထူမ်ႈထႅင်ႈ၊ တေၵႂႃႇသိုဝ်ႉၶူဝ်းၶွင်ၵိၼ်ယႅမ်ႉၵေႃႈ ယၢပ်ႇၽိုတ်ႇ၊ ၸိူဝ်းယူႇ တီႈတႅမ်ႇတီႈယၢၼ်း မၢင်တီႈၼမ်ႉထူမ်ႈပေႃးပဵင်းဢူၵ်းၼႆႉဢေႃႈ”- ဝႃႈၼႆ။ 

ၸုမ်းတူင်ႉၼိုင်ၸွႆႈထႅမ် တူင်ႇဝူင်းၵူၼ်း ၼႂ်းပိုၼ်ႉတီႈ ၸွႆႈထႅမ်ၶၢႆႉၶူဝ်းၶွင်၊ ၸႅၵ်ႇၶူဝ်းၶွင်ၵိၼ်ယႅမ်ႉပၼ် ၸိူဝ်းထူပ်း ၽေးၼမ်ႉထူမ်ႈယူႇ။ ၾၢႆႇၽွင်းငမ်းလႄႈ သိုၵ်းမၢၼ်ႈတႄႉဢမ်ႇႁၼ် ၸွႆႈထႅမ်တူင်ႉၼိုင်ထိုင်တီႈ။

မိူဝ်ႈၼႆႉ ယၢမ်းဝၢႆးဝၼ်း 4 မူင်း ၼမ်ႉသၢႆၼွင်းႁႅင်းထႅင်ႈ သုင်ထိုင်ပိုၼ်ႉၶူဝ်ၶၢမ်ႈလႅၼ်လိၼ် မၢႆ 1 ၼၼ်ႉယဝ်ႉ ဝႃႈၼႆ။

ၵဵဝ်ႇလူၺ်ႈ လွင်ႈၼမ်ႉထူမ်ႈ ဝဵင်းတႃႈၶီႈလဵၵ်းၼႆႉ ယူႇတီႈ ၾၢႆႇၽူႈၵွၼ်းၸႄႈဝဵင်းတႃႈၶီႈလဵၵ်းလႄႈ မႄႈသၢႆ တၢင်းသွင် ၾင်ႇ ယၢမ်ႈဢုပ်ႇၵုမ်ၵၼ် မႃးတႃႇသေၵေႃႈ ပႆႇၸၢင်ႈပူၵ်းပွင်ပိုၼ်ႉတီႈ၊ ပႆႇၸၢင်ႈႁဵတ်းပၼ် ၼင်ႇႁိုဝ် ၼမ်ႉတေဢမ်ႇထူမ်ႈ။

ၼႂ်းၶၢဝ်းတၢင်း 5 ပီမႃးၼႆႉ ပီၼႆႉ ၼမ်ႉၵမ်းၵမ်းထူမ်ႈ ထူမ်ႈၵမ်းထူၼ်ႈ 6 ယဝ်ႉသေတႃႉ ဢၼ်ထူမ်ႈႁၢဝ်ႉႁႅင်းၼႆႉ ပဵၼ် ၵမ်းထူၼ်ႈ 4 ၊ လႆႈဝႃႈၾူၼ်လိူင်ႇ ၼမ်ႉထူမ်ႈႁိုင်လိူဝ်ပိူၼ်ႈ – ၵူၼ်းတႃႈၶီႈလဵၵ်းလၢတ်ႈၼင်ႇၼႆ။