တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉ ဢမ်ႇမီးပၢင်တိုၵ်းသိုၵ်းသိူဝ်သေတႃႉ ၵူၼ်းမိူင်းလႆႈၵူဝ် ၽူႈလၵ်ႉၸၵ်ႉၶုတ်ႈ၊ ၽွင်းသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၵူၼ်းၸူၼ်ႁၢႆႉလိူင်ႇ ၶဝ်ႈၸူၼ် ထိုင်ၼႂ်းဝၢၼ်ႈၼႂ်းပွၵ်ႉ။ ႁဵတ်း ႁၢႆႉၶႃႈႁႅမ်ၸဝ်ႈႁိူၼ်း၊ ဢမ်ႇမီးၽႂ်ၸုမ်းလႂ် ၵႅတ်ႇၶႄႁႄႉၵင်ႈပၼ်၊ ဢမ်ႇမီး ၽႂ်ၽဵဝ်ႈမူၺ်ႉပၼ်။
ၽွင်းၵူၼ်းၼႂ်းဝဵင်း ၺႃးၽေးၼမ်ႉထူမ်ႈယူႇၼႆႉ ၵူၼ်းတၢင်းဝၢၼ်ႈပႃႇလႅင်သမ်ႉ ၺႃးၸူၼ်ၶဝ်ႈဝၢၼ်ႈ ပၢတ်ႇၶေႃးၶႃႈႁႅမ် ၵူၼ်းၼႂ်းဝၢၼ်ႈ မၢတ်ႇၸဵပ်းႁၢဝ်ႈႁႅင်းၸမ်တၢႆ ၵေႃႉၼိုင်ႈ။
ၽွင်းငဝ်းလၢႆး ဝၢၼ်ႈမိူင်းဢမ်ႇၼိမ် ပၢႆးမၢၵ်ႈမီးဢမ်ႇလီၼႆႉ တႃႇၵႄႈလိတ်ႈပၼ်ႁႃ တႃႇႁႃၵိၼ်လဵင်ႉတွင်ႉၼၼ်ႉ ဢွၼ် ၵၼ် ၶၢႆႉယၢၼ်တီႈယူႇတၼ်းသဝ်းၸဝ်ႈၵဝ်ႇသေ ၵႂႃႇယူႇသဝ်းႁႃ ၵိၼ်လဵင်ႉတွင်ႉ တၢင်ႇတီႈတၢင်ႇဝဵင်း။
တီႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼႆႉၵေႃႈ ၼႂ်းၶၢဝ်းတၢင်း 3 ပီမႃးၼႆႉ ၵိုင်ႉၵၢင်ႉယဵၼ်းပဵၼ် ပိုၼ်ႉတီႈၵူၼ်း ၵိုၼ်းငိုၼ်းၶွၼ်ႈ။ ၵူၼ်းမိူင်းမၢၼ်ႈတူင်ႈပဵင်း ပႃးၸဵမ်တၢင်ႇၸႄႈမိူင်းလႄႈ တိူင်း ဢွၼ် ၵၼ်ပၢႆႈမႃးသေႃႉ ယူႇသဝ်းႁႃ ၵိၼ်လဵင်ႉတွင်ႉ။ ၸိူဝ်းမႃးယူႇ တႃႈၶီႈလဵၵ်းသေ မၢၵ်ႈမီးလီပဵၼ်ၵေႃႈမီး ၸိူဝ်းမႃးဢမ်ႇသၢင်ႇထုၵ်ႇသေ လႆႈတုၵ်ႉလႆႈယၢၵ်ႈၵေႃႈၼမ်။ ၸိူဝ်းၺႃးၸူၼ်ၺႃးလၵ်ႉၵေႃႈ ဢမ်ႇဢေႇ။
မိူၼ်ၼင်ႇ မိူဝ်ႈၼႆႉ ဝၼ်းတီႈ 27/08/2024 ယၢမ်းႁူဝ်ၼႂ်ၸဝ်ႉ 2 မူင်းၶိုင်ႈၼၼ်ႉ ၵူဝ်ႇဝၼ်ႇၼ ၵူၼ်းမိူင်းရၶႅင်ႇ ဢႃယု 30 ပီ ဢၼ်မႃးယူႇတီႈ ပွၵ်ႉပႃႇလႅင် 2 ၸႄႈဝဵင်းတႃႈၶီႈလဵၵ်းၼၼ်ႉ ၵႂႃႇၸွမ်းဢူၺ်းၵေႃႉသေ ပွၵ်ႈၶိုၼ်းႁွင်ႈသဝ်း မၼ်း ၸၢႆး၊ ၺႃးၸူၼ်ပႂ်ႉႁူဝ်ၵိဝ်ႇတၢင်းၶဝ်ႈ မိူဝ်းၸူးႁွင်ႈမၼ်းၼၼ်ႉသေ တီႉၺွပ်း ဢဝ်မိတ်ႈတႅင်း ၊ ထိူဝ်ထိုင်တီႈမၢတ်ႇၸဵပ်း ႁၢဝ်ႈႁႅင်း သုမ်းငိုၼ်းတွင်းလႄႈ ၶိူင်ႈၶူဝ်းၵိုၵ်းတူဝ်။ ဝၢႆးသေ ၸူၼ်လႆႈၶူဝ်းၶွင်ငိုၼ်းၶမ်းတီႈတူဝ် မၼ်းၸၢႆးယဝ်ႉ ၸင်ႇပွႆႇမၼ်းၸၢႆးသေ လႅၼ်ႈပၢႆႈ။ မၼ်းၸၢႆး မၢတ်ႇၸဵပ်းႁၢဝ်ႈႁႅင်း ၵူၺ်းၵႃႈ ဢမ်ႇထိုင်တီႈတၢႆ ၽူႈၸမ်ၸႂ်ၵေႃႉ ဢၼ်ၺႃး ၸူၼ်ၵႂႃႇၼၼ်ႉ လၢတ်ႈတီႈၽူႈတွႆႇႁွၵ်ႈၼင်ႇၼႆ –
“မၼ်းၵႂႃႇလႄႇသေ ၽွင်းမိူဝ်ႈမၼ်းပွၵ်ႈၶိုၼ်းၼၼ်ႉ မၼ်းသမ်ႉပွၵ်ႈၶိုၼ်းၵေႃႉလဵဝ်။ ဢူၺ်းၵေႃႉမၼ်း မႃးသူင်ႇယူႇ ၵူၺ်းၵႃႈ မႃးသူင်ႇထိုင်ၼႃႈၵိဝ်ႇၼၼ်ႉၵူၺ်း။ ဢမ်ႇလႆႈသူင်ႇထိုင်ႁိူၼ်း။ မိူဝ်ႈမၼ်းပႆ လတ်းၶဝ်ႈမိူဝ်းၼႂ်းၵိဝ်ႇၼၼ်ႉ ၸင်ႇၺႃးၸူၼ်ၸိူဝ်းၼၼ်ႉ လမ်းၸွမ်းလင်မၼ်းသေ ၵေႃႉၼိုင်ႈ မႃးၺွပ်းမၼ်းယဝ်ႉ ဢဝ်မိတ်ႈငႃမၼ်းဝႆႉ။ ၵေႃႉၼိုင်ႈသမ်ႉ ၸူၵ်းၶိူင်ႈၶူဝ်းၸပ်းတူဝ်မၼ်း။ မၼ်းၵူဝ်သေ တဵၼ်ႈလႄႈ ၺႃးတႅင်းၸွမ်းၶၢင်ႈပုမ်မၼ်း ၸိူဝ်းၼႆႉ မွၵ်ႈ 3 ႁွႆးလႄႈ ၺႃးထိူဝ်ၶေႃးမၼ်းဢေႃႈ။ တီႈၶေႃးတႄႉ ၵတ်းၵႃႈလႃႈဢမ်ႇၶဝ်ႈလိုၵ်ႉ ၸွမ်းမိုဝ်းၸိူဝ်းၼႆႉၵေႃႈ မၢတ်ႇၸဵပ်း”- ဝႃႈၼႆ။
ၵူဝ်ႇဝၼ်ႇၼ ဢႃယု 30 ပီၼႆႉ ပဵၼ်ၵူၼ်းမိူင်းရၶႅင်ႇ တိုၵ်ႉမႃးပိုတ်ႇႁၢၼ်ႉၵႅတ်းၶူၼ်ႁူဝ် တီႈဝဵင်းတႃႈၶီႈလဵၵ်း ၶၢဝ်းတၢင်း ၸမ် 2 ပီ။ ၺႃးၸူၼ်ၵႂႃႇ ငိုၼ်းထႆး 3 ႁဵင်ပၢႆ ၊ ၾူၼ်း 1 လုၵ်ႈလႄႈ ၸွပ်ႇမိုဝ်းၶမ်း 1 သဵၼ်ႈ ယၢမ်းလဵဝ် ဢဝ်တူဝ်ၵူဝ်ႇဝၼ်ႇၼၼႆႉ ယူတ်းယႃတူဝ်ဝႆႉ တီႈႁူင်းယႃလူင်တႃႈၶီႈလဵၵ်းၼႆ ၵူၼ်းၸမ်ၸႂ် မၼ်းၸၢႆး လၢတ်ႈၼႄၼင်ႇၼႆ။
တီႈဝဵင်းတႃႈၶီႈလဵၵ်းၼႆႉ ၵူၼ်းၸိူဝ်းလႄႇႁႃလၵ်ႉႁႃၸူၼ်ပိူၼ်ႈ မီးၵူႈလိူၼ်။ ၼႂ်းလိူၼ်ၵျုၼ်ႊပူၼ်ႉမႃး ၼၼ်ႉၵေႃႈ မီးၸုမ်းဢမ်ႇႁူႉၾၢႆႇ ၶဝ်ႈၸူၼ်ႁၢၼ်ႉၵႅတ်းၶူၼ်ႁူဝ် တီႈၼႂ်းပွၵ်ႉမႄႈၶၢဝ်ၼၼ်ႉၵႂႃႇ သုမ်းငိုၼ်းထႆး ဢမ်ႇယွမ်း 2 သႅၼ်ဝၢတ်ႇ။
ဝၼ်းတီႈ 05/04/2023 ၼၼ်ႉၵေႃႈ ၵူၼ်းၸၢႆး ၵေႃႉၼိုင်ႈ ယူႇပွၵ်ႉပႃႇလႅင် ဝဵင်းတႃႈၶီႈလဵၵ်း ၺႃးၵူၼ်းၸုမ်းၼိုင်ႈ ႁႄႉ ၸူၼ်ရူတ်ႉ တီႈႁိမ်းလုမ်းၵွၼ်းပွၵ်ႉ ၼႂ်းပွၵ်ႉပႃႇလႅင်ၼၼ်ႉၶိုၼ်း။ ၸိူဝ်းၺႃးၸူၼ်သေ ၵူၼ်းတင်းၼမ် ဢမ်ႇႁူႉၸွမ်း ၵေႃႈ မီးတင်းၼမ်တင်းလၢႆ။ ပေႃးၵႂႃႇလႂ်ပႆလႂ် ၵၢင်ၶမ်ႈၵၢၼ်ၶိုၼ်းၸိုင် တၵ်းလႆႈၾၢင်ႉၼၵ်းၼႃ။ သင်ပဵၼ်လႆႈ ပေႃးၵႂႃႇတၢင်းၼွၵ်ႈ ႁႂ်ႈပႃးၵေႃႉပႃးသႄႈသေၵႂႃႇ ၸင်ႇၸၢင်ႈ လွတ်ႈၽေး။ တႃႈၶီႈလဵၵ်းၼႆႉ ၵူၼ်းမိူၵ်ႈၵူၼ်းလိူင်းၼမ်ၼႃႇယဝ်ႉ ၼႆ ၵူၼ်းၼုမ်ႇ တႃႈၶီႈလဵၵ်း ၵေႃႉၼိုင်ႈ လၢတ်ႈၼင်ႇၼႆ –
“ယူႇတႃႈၶီႈလဵၵ်းၼႆႉ တေၵႂႃႇလႂ်ၵေႃႈ ႁႂ်ႈၾၢင်ႉၵၼ်ၼၵ်းၼၵ်းၼႃၼႃၶႃႈ။ သင်ပဵၼ်လႆႈတႄႉ ယႃႇပေၵႂႃႇၵေႃႉလဵဝ် ၸူၼ်ဝႃႈ ၵူၼ်းမိူၵ်ႈၵူၼ်းလိူင်းလိူင်ႇၼႃႇ။ ၸွမ်းပွၵ်ႉၸွမ်းယွမ်ႇ ၸိူဝ်းလႂ်သေဢမ်ႇဝႃႈ လိူင်ႇၼႃႇ” – ဝႃႈၼႆ။
ၶၢဝ်းတၢင်း သိုၵ်းမၢၼ်ႈ ယိုတ်းမိူင်းမႃးၼႆႉ ယွၼ်ႉၵၢၼ်ႁႃၵိၼ်လဵင်ႉတွင်ႉ ယၢပ်ႇၽိုတ်ႇလႄႈ ၵူၼ်းၸိူဝ်း ၶႂ်ႈႁႃငိုၼ်းတၢင်းလတ်းၵေႃႈၼမ်၊ ၵမ်ႈၼမ် ၶႂ်ႈၸူးငၢႆႈလႄႈ ၽူႈလၵ်ႉၸၵ်ႉၶုတ်ႈၵေႃႈ လိူင်ႇၼမ်မႃး။ မိူၼ်ၼင်ႇ တီႈတႃႈၶီႈလဵၵ်းၼႆႉ မီးၵူၼ်းၽွတ်ႈပဵၼ်ၸုမ်းသေ လႄႇႁႃလၵ်ႉရူတ်ႉၶိူင်ႈ ၵူၼ်းမိူင်းၵေႃႈမီး ၵူႈလိူၼ်။ ၼိုင်ႈလိူၼ်လႂ် ၺႃးလၵ်ႉဢမ်ႇယွမ်း 20 လမ်း ထိုင်မိူဝ်ႈလဵဝ်ၵေႃႈ ဢမ်ႇမီးၸုမ်းလႂ် ဢဝ်ပုၼ်ႈ ၽွၼ်းပၼ်။
ၼႂ်းဝဵင်းတႃႈၶီႈလဵၵ်းၼႆႉ ဢမ်ႇၵွမ်ႉမီးၽူႈလၵ်ႉၸၵ်ႉၶုတ်ႈၵူၺ်း ၸဵမ်ဢဝ်ၵၢၼ်သိုဝ်ႉၶၢႆ ယႃႈမဝ်းၵေႃႈမီး ၊ ၵၢၼ်ႁႃငိုၼ်းတၢင်းဢွၼ်ႊလၢႆႊ ၵျႃးၽႅၼ်ႉၵေႃႈမီး တေႃႈၼင်ႇ ပလိၵ်ႈမၢၼ်ႈ ၵႂၢတ်ႇလၢင်ႉလိုပ်ႇ ဢွၵ်ႇလၢႆၵမ်းၵေႃႈ တိုၵ်ႉပၼ်ႇၵၢၼ် မိူၼ်ၵဝ်ႇယူႇ။ ၵမ်ႈၼမ်တႄႉ ဢဝ်ငိုၼ်းမွၼ်ပလိၵ်ႈမၢၼ်ႈသေ သိုပ်ႇၶၢတ်ႈႁွင်ႈၶၢတ်ႈႁိူၼ်း တူင်ႉၼိုင်ႈမိူၼ်မိူဝ်ႈဢွၼ်တၢင်းၼႆ – ၵူၼ်းၼုမ်ႇ တႃႈၶီႈလဵၵ်း ၵေႃႉၼိုင်ႈလၢတ်ႈ။
