ၽွင်းတဵင်ႈၶိုၼ်းၸၢႆႉ ၶၢဝ်းလပ်းၶၢဝ်းၼွၼ်း ၽွင်းယၢမ်းမွၵ်ႈ 1 မူင်း တေႃႇထိုင် 2 မူင်း ၼႂ်းဝၼ်းမိူဝ်ႈၼႆႉ ဝၼ်းတီႈ 27/08/2024 သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇထပ်းၵၼ် တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူၼ်းမိူင်း လူႉတၢႆ 2 ၵေႃႉ။
သိုၵ်းမၢၼ်ႈဢဝ် ႁိူဝ်းမိၼ် Jet Fighter တပ်ႉၾၢႆႇတေႃႉသူင်ႇၵမ်ႉၸွႆႈ (ထောက်ပိုႉ) သႅၼ်း Y-12 မႃးပွႆႇ မၢၵ်ႇ 2 ၵမ်း တူၵ်းသႂ်ႇၼႂ်းပွၵ်ႉၼႂ်းယွမ်ႇလႄႈ ၼႂ်းဝၢင်းႁူင်းႁဵၼ်း ၸၼ်ႉငဝ်ႈမၢႆ 3 ဢၼ်မီးတီႈပွၵ်ႉဢူၵ်ႉၵျိၼ်း တိူဝ်ႉၵူၼ်းမိူင်းတၢႆ 2 ၵေႃႉ ပဵၼ်ၵူဝ်ႇဢွင်ႇၼၢႆႇလႄႈ ၵူဝ်ႇၽူဝ်းလူႇ။
ၵူၼ်းမိူင်းဝဵင်းသီႇပေႃႉ လၢတ်ႈၽူႈတွႆႇႁွၵ်ႈဝႃႈ -“ၶၢဝ်းပိူၼ်ႈၼွၼ်း သိုၵ်းမၢၼ်ႈ မႃးပွႆႇမၢၵ်ႇ၊ ပၢင်တိုၵ်းၵေႃႈ ဢမ်ႇပဵၼ်ၶၢဝ်းၼၼ်ႉ၊ ၶဝ်လႅပ်ႈ တေလၢမ်းဝႃႈ သိုၵ်းလွႆ မႃးယူႇၼႂ်းပွၵ်ႉၼႂ်းဝၢၼ်ႈၼႆသေ တိုၼ်းတင်ႈၸႂ် မႃးပွႆႇမၢၵ်ႇသႂ်ႇ တိူဝ်ႉၵူၼ်းမိူင်းတၢႆ 2 ၵေႃႉ။ တႃႇၵေႃႉၼိုင်ႈ မီးလူမ်းမၢၵ်ႇႁူဝ်ၸႂ်၊ လႅပ်ႈတူၵ်းၸႂ်သဵင်မၢၵ်ႇသေတၢႆ ”- ဝႃႈၼႆ။
မၢၵ်ႇလူင် သိုၵ်းမၢၼ်ႈ မႃးတူၵ်းသႂ်ႇ တီႈၸၢၵ်ႈၼမ်ႉသႅၼ်ႈသႂ် တူၵ်ႉထဝတီႇ၊ တီႈၵျွင်းၽြႃးၶရိတ်ႉယၼ်ႇ ဢေႊမႃႊ ၼူၺ်ႇလႃႉ၊ တီႈႁူင်းႁဵၼ်းၸၼ်ႉငဝ်ႈ ဢမၵ 3 ၸိူဝ်းၼႆႉ ႁိူၼ်းယေးလႄႈ ၵျွင်းၽြႃးလူႉၵွႆ။ တၢင်ႇတီႈတၢင်ႇပွၵ်ႉ ၼႂ်းဝဵင်းသီႇပေႃႉၵေႃႈ ၺႃးၸၢၵ်ႇမၢၵ်ႇလူင်သေ လူႉၵွႆၵေႃႈမီး။
ဢၼ်သိုၵ်းမၢၼ်ႈ ယိုဝ်းမၢၵ်ႇလူင် တီႈဝၢၼ်ႈၼႃးမၢၵ်ႇၶေႃ မိူဝ်ႈဝႃး ဝၼ်းတီႈ 26/08/2024 ၼၼ်ႉၵေႃႈ ဢွၼ်ႇၸၢႆး ဢႃယု 10 ၶူပ်ႇ ဢၼ်မၢတ်ႇၸဵပ်းၸၢၵ်ႇမၢၵ်ႇတီႈပဵမ်ႉၼၼ်ႉ တၢႆၵႂႃႇယဝ်ႉ ဝႃႈၼႆ။
ၵူၼ်းပိုၼ်ႉတီႈ လၢတ်ႈဝႃႈ – “သိုၵ်းမၢၼ်ႈပွႆႇမၢၵ်ႇ တီႈဝၢၼ်ႈၼႃးမၢၵ်ၶေႃ မိူဝ်ႈဝႃးၼႆႉ ဢၼ်ၸၢၵ်ႇမၢၵ်ႇ သဵၼ်တိူဝ်ႉသႂ်ႇပဵမ်ႉ ဢွၼ်ႇၸၢႆး ဢႃႇယု 10 ၶူပ်ႇ ဢၼ်မၢတ်ႇၸဵပ်းႁၢဝ်ႈႁႅင်းသေ သူင်ႇယူတ်းယႃတူဝ် ဝႆႉတီႈၼမ်ႉလၼ်ႈၼၼ်ႉ တၢႆၵႂႃႇယၢမ်းၵၢင်ၶမ်ႈ 8 မူင်းၶိုင်ႈ – ၽွင်းဢဝ်တူဝ်မၼ်းၸၢႆး လုၵ်ႉၼမ်ႉလၼ်ႈ သိုပ်ႇသူင်ႇၵႂႃႇ တူၼ်ႈတီးၼၼ်ႉ”- ဝႃႈၼႆ။
ယၢမ်းလဵဝ် တီႈဝဵင်းသီႇပေႃႉ သၢႆၾူၼ်းၶိုၼ်းလီပဵၼ်တီႈ၊ ၵူၺ်းၵႃႈ တိုၵ်ႉၵပ်းသိုပ်ႇတိတ်းတေႃႇယၢပ်ႇယူႇ – ၵူၼ်းပိုၼ်ႉတီႈလၢတ်ႈၼင်ႇၼႆ။
တီႈဝဵင်းသီႇပေႃႉၼႆႉ ယၢမ်းလဵဝ် ပဵၼ်ၽွင်းသႂ်ႇႁႅင်း ပိုတ်းယိုဝ်းၵၼ်၊ တပ်ႉသိုၵ်းမၢၼ်ႈ ၶလယ 23 ၊ ၶမယ 503 – 504 ပႆႇတူၵ်း၊ သိုၵ်း TNLA – PDF ၵေႃႈ သႂ်ႇႁႅင်းပိုတ်းယိုဝ်းယူႇ ႁၢဝ်ႈႁႅင်း၊ ႁဵတ်းႁႂ်ႈသိုၵ်းမၢၼ်ႈ ဢဝ်ၶိူင်ႈမိၼ် မႃးလၢမ်းလိမ်းပွႆႇမၢၵ်ႇ ထိုင်တီႈတုမ်ႉတိူဝ်ႉပႃးႁိူၼ်းယေး ၵူၼ်းမိူင်း။
ၵွပ်ႈၼႆလႄႈ ၵူၼ်းမိူင်းပိုၼ်ႉတီႈတႄႉ တုၵ်းယွၼ်းဝႃႈ ႁႂ်ႈၸုမ်းယိပ်းၵွင်ႈၵၢင်ႇ ၵႂႃႇပိုတ်းယိုဝ်းၵၼ် ၼွၵ်ႈဝၢၼ်ႈၼွၵ်ႈဝဵင်း တီႈဢၼ်ဢမ်ႇမီးႁိူၼ်းယေး ၵူၼ်းမိူင်းၼၼ်ႉ ဝႃႈၼႆ။
ၼႂ်းၶေႃႈလႆႈၸႂ်တူၵ်းလူင်း ၵျီႊၼီႊဝႃႊၶွၼ်ႊဝႅၼ်ႊသျိၼ်ႊၵေႃႈ ပႃးဝႆႉဝႃႈ ၸုမ်းယိပ်းၵွင်ႈၵၢင်ႇၼႆႉ ႁၢမ်ႈဢဝ်ႁိူၼ်းယေး ၵူၼ်းမိူင်းဝႆႉ ပဵၼ်ပဝ်ႉမၢႆၵၢၼ်သိုၵ်း၊ ႁၢမ်ႈပိုတ်းယိုဝ်းၵၼ် ၼႂ်းဝၢၼ်ႈသူၼ်ႁိူၼ်းယေးၵူၼ်းမိူင်း ဝႃႈၼႆဝႆႉသေတႃႉ – ၸုမ်းယိပ်းၵွင်ႈၵၢင်ႇ ဢမ်ႇၸွမ်းမၢႆမီႈၼႆႉသေၸုမ်း။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
