ၸုမ်းဢမ်ႇႁူႉၾၢႆႇ 3 ၵေႃႉ ဢဝ်ၵွင်ႈငႃ ၸဝ်ႈၶွင်ၵႃးသေ ၸူၼ်ဢဝ်ၵႃးၵႂႃႇ လမ်းၼိုင်ႈ တီႈၵၢင်ဝဵင်းမူႇၸေႊ။

ဝၼ်းတီႈ 23/08/2024 ယၢမ်းၵၢင်ၶမ်ႈမွၵ်ႈ 8:21 မူင်း ၸုမ်းဢမ်ႇႁူႉၾၢႆႇ 3 ၵေႃႉ ယိုဝ်းၵွင်ႈလွၵ်ႇငိုတ်ႈသေ ဢဝ်ၵွင်ႈငႃ ၸဝ်ႈၶွင်ရူတ်ႉၵႃး တီႈၼႃႈႁၢၼ်ႉ T Nail House တီႈပွၵ်ႉၵၢတ်ႇ ႁိမ်းၵွင်းမူးၶမ်း ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၸူၼ်ဢဝ်ၵႂႃႇ ၵႃးလမ်းၼိုင်ႈ ၼႆယဝ်ႉ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းႁၢႆႉၼၼ်ႉ မႃးၸွမ်းၵၼ် 3 ၵေႃႉ ယိပ်းၵွင်ႈ သေ ယိုဝ်းၶိုၼ်ႈၾႃႉ လွၵ်ႇငိုတ်ႈၵမ်းၼိုင်ႈ။ ယဝ်ႉၵေႃႈ ဢဝ်ၵွင်ႈငႃ ၸဝ်ႈၶွင်ႁၢၼ်ႉ T Nail House ၽွင်း တိုၵ်ႉၵဵပ်းသႅင်ႇယူႇ ၼၼ်ႉ ၵူၼ်းႁၢႆႉၼၼ်ႉ ၸူၼ်ႁိမ်ဢဝ်ၵႃးၵႂႃႇ ဢၼ်ၵိုတ်းဝႆႉတီႈၼႃႈသႅင်ႇၼၼ်ႉ။ သႅင်ႇ T Nail House ၼႆႉ ပဵၼ်သႅင်ႇႁၢင်ႈၶိူင်ႈ ၵၢပ်ႇၼဵပ်ႉမိုဝ်း/ ၼဵပ်ႉတိၼ် ၼၢင်းယိင်း”- ဝႃႈၼႆ။

ဢိင်ၼိူဝ် လွင်ႈၼႆႉ ၸုမ်းဢမ်ႇႁူႉၾၢႆႇ 3 ၵေႃႉၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ်ႁဵတ်း ဢၼ်ဝႃႈၼၼ်ႉ ပႆႇႁူႉ။ မိူဝ်ႈၽွင်းမႃးၸူၼ်ၼၼ်ႉ ပဵၼ်ၽူႈၸၢႆး 3 ၵေႃႉ ၶီႇၵႃးမႃးလမ်းၼိုင်ႈ။ ယဝ်ႉၵေႃႈ ယိပ်းပႃးၵွင်ႈ။ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။

“ဢွင်ႈတီႈ ပိူင်ပဵၼ်ၼၼ်ႉ ၸမ်ၵၼ်တင်း ၸုမ်းပျီႇတူႉၸိတ်ႉလႄႈ သိုၵ်းမၢၼ်ႈ ဢၼ်ပႂ်ႉဢဝ်ႁူမ်ႇလူမ်ႈဝႆႉ ၼိူဝ်ၵွင်းႁိမ်း ၼၼ်ႉ ပေႃးမုင်ႈႁၼ်ၵၼ်ယဝ်ႉဢေႃႈ ၼၼ်ႉၵေႃႈ ဢမ်ႇႁူႉသင်ၸွမ်းတႄႉ ဢမ်ႇထုၵ်ႇလီပဵၼ်သႄႈ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ၼႂ်းလိူၼ်ဢေႃႊၵတ်ႊသ်ၼႆႉၵူၺ်း ၵူၼ်းမူႇၸေႊ ၺႃးၸူၼ် ၸိူင်ႉၼႆၼႆႉ ဢမ်ႇယွမ်း 3-4 ပွၵ်ႈယဝ်ႉ။ ပူၼ်ႉမႃးမွၵ်ႈဝူင်ႈၼႆႉ ယၢမ်းၵၢင်ၼႂ်မွၵ်ႈ 7 မူင်းၶိုင်ႈ ၵူၼ်းၶၢႆၼိူဝ်ႉမူတူမ်ႈ ၺႃးၸူၼ် တီႈႁိမ်းလုမ်းၾၢႆႇပႃႇမႆႉ ပွၵ်ႈၼိူဝ် ၼၼ်ႉၵေႃႈ ၸူၼ်ႁိမ်ငိုၼ်းၵႂႃႇ။

မိူဝ်ႈဝၼ်းတီႈ 13 ယၢမ်းၵၢင်ၼႂ်ၸဝ်ႉ 4 မူင်းၶိုင်ႈ ၽူႈၸၢႆး ဢႃယု 50 ပၢႆ ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ 4 ၵေႃႉ လမ်း ၽၼ်းၸူၼ်ဢဝ်ရူတ်ႉၶိူင်ႈ မၼ်းၸၢႆးၵႂႃႇ တီႈႁေႃၼႃႇလီႇ ၵၢင်ဝဵင်းမူႇၸေႊ လႆႈတိူဝ်ႉမၢတ်ႇၸဵပ်းၸွမ်းမိုဝ်းၸွမ်းၶႃ ၼႆယဝ်ႉ။