ၵူၼ်းၵိၼ်ယႃႈမဝ်းၵမ် ၵေႃႉၼိုင်ႈ ယူႇပွၵ်ႉ 2 ဝဵင်းမိူင်းသူႈ ၽဝ်ၶိုၼ်းႁိူၼ်းမၼ်း ၾႆးမႆႈလႄႈ ႁဵတ်းႁႂ်ႈၵူၼ်းၼႂ်းပွၵ်ႉ တူၵ်းၸႂ်။

ၼႂ်းဝၼ်းတီႈ 22 /08/2024 ယၢမ်းၵၢင်ၶမ်ႈ 9 မူင်း ၵူၼ်းမဝ်းယႃႈ ၵေႃႉၼိုင်ႈ ၽဝ်ၶိုၼ်းႁိူၼ်းၸဝ်ႈၵဝ်ႇ ၊ လွင်ႈမၢတ်ႇၸဵပ်းလူႉတၢႆတႄႉ ဢမ်ႇမီးသေတႃႉ ၵူၼ်းမိူင်းတူၵ်းၸႂ် လွင်ႈယႃႈမဝ်း ၵမ် လိူင်ႇၼမ်ဢမ်ႇမီး ဢမ်ႇၸၢင်ႈႁဵတ်းႁိုဝ် ႁၢမ်ႈ ႁႄႉၽဵဝ်ႈသိမ်း။ 

ၵဵဝ်ႇလူၺ်ႈလွင်ႈၼႆႉ ၵူၼ်းဝဵင်းမိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၵိၼ်ၸေးသေ ၸုတ်ႇၽဝ်ႁိူၼ်းမၼ်းၶိုၼ်း ဢေႃႈ။ လွင်ႈမၢတ်ႇၸဵပ်းတႄႉ ဢမ်ႇမီးၶႃႈ။ ၾႆးမႆႈႁိူၼ်းၶဝ်လၢႆ လၢႆၵူၺ်းဢေႃႈ။ တၢင်ႇႁိူၼ်းတႄႉ ၾႆးဢမ်ႇလၢမ်းထႅင်ႈ ၶႃႈ။ ၾူၼ်ၵေႃႈတူၵ်း တင်းဝၼ်းတင်း ၶိုၼ်းၶႃႈဢေႃႈ ႁိူၼ်းၶဝ်တႄႉၵေႃႈ မႆႈပႅတ်ႈသဵင်ႈၶႃႈဢေႃႈ”- ဝႃႈၼႆ။

ယွၼ်ႉၾႆးမႆႈၼႆႉသေ ႁိူၼ်းယေးသွင်ၸၼ်ႉ မၼ်းၸၢႆး မီးလွင်ႈလူႉသုမ်း တူၵ်းမႅၼ်ႈငိုၼ်း 12 သႅၼ်ပၢႆ။ ယၢမ်းလဵဝ် ၽူႈၸၢႆး ၵေႃႉဢၼ်ၸုတ်ႇၽဝ်ႁိူၼ်းမၼ်းၶိုၼ်းၼၼ်ႉ ပၢႆႈဝႆႉ။ ၸဝ်ႈၼႃႈ တီႈ ၽူႈမီးပုၼ်ႈၽွၼ်း တိုၵ်ႉႁႃတူဝ်မၼ်း ၸၢႆးဝႆႉယူႇ ဝႃႈၼႆ။ 

ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ႁဵတ်းႁႂ်ႈဝၢၼ်ႈမိူင်းသုၵ်ႉယုင်ႈ ၵူၼ်းမိူင်း ႁႃၵိၼ်လဵင်ႉတွင်ႉယၢပ်ႇ ၊ ပၢင်တေႃႇလွင်း လိူင်ႇၼမ်။ ယႃႈမဝ်းၵမ်ၵေႃႈ လိူင်ႇၼမ်။ သိုဝ်ႉၶၢႆၵၼ်ငၢႆႈ။ ဢမ်ႇမီးၸဝ်ႈၼႃႈတီႈ ၸုမ်းလႂ်မႃး ၽဵဝ်ႈမူၺ်ႉၵႂၢတ်ႇလၢင်ႉပၼ်။