ၶၢဝ်းတၢင်း 2 လိူၼ်မႃးၼႆႉ ၼမ်ႉသၢႆလုပ်ႇထူမ်ႈ ၼႂ်းဝဵင်းတႃႈၶီႈလဵၵ်း လႅၼ်လိၼ်တႆး – ထႆး ဢမ်ႇယွမ်း 5 ပွၵ်ႈယဝ်ႉ ႁဵတ်းႁႂ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇႁႅင်း။

ဝၼ်းတီႈ 22/08/2024 ယၢမ်းၵၢင်ၼႂ် ၼမ်ႉသၢႆ လူၼ်ႉၾင်ႇၼွင်းထူမ်ႈ ၸွမ်းၵၢတ်ႇတႃႈလေႃႉ၊ ပွၵ်ႉမၢၵ်ႇၵႃႇႁူဝ်ၶမ်း၊ ပွၵ်ႉသၼ်သၢႆး၊ ပွၵ်ႉပုင်းထုၼ်လႄႈ ပွၵ်ႉမႄႈၶၢဝ် ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇၶူင်း ယွၼ်ႉၾူၼ်တူၵ်းထပ်းၵၼ်မႃးလၢႆဝၼ်း ဝႃႈၼႆ။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈၽူႈတွႆႇႁွၵ်ႈဝႃႈ – “ပီၼႆႉ ၼမ်ႉထူမ်ႈႁႅင်းလိူဝ် ၵူႈပီ။ ၶၢဝ်းၾူၼ်ၼႆႉၵူၺ်း ၼမ်ႉထူမ်ႈတီႈတႃႈၶီႈလဵၵ်းၼႆႉ ဢမ်ႇယွမ်း 5 ပွၵ်ႈယဝ်ႉ။ တီႈၵၢတ်ႇတႃႈလေႃႉၼၼ်ႉ ၼမ်ႉလိုၵ်ႉပဵင်း ဢူၵ်းပဵင်းၶေႃးၼႆႉ။ တႄႇဢဝ် ဝတ်ႉသၢႆမိူင်းတေႃႇထိုင် ၵၢတ်ႇသၼ်သၢႆးၼၼ်ႉ ရူတ်ႉၶိူင်ႈ၊ ၵႃးဢွၼ်ႇ ၸိူဝ်းၼႆႉ ဢမ်ႇၸၢင်ႈၵႂႃႇမႃးလႆႈသေ ဢိတ်းၶႃႈ ယွၼ်ႉၼမ်ႉလိုၵ်ႉႁႅင်းဢေႃႈ”- ဝႃႈၼႆ။

ယွၼ်ႉၼမ်ႉသၢႆ လုပ်ႇထူမ်ႈႁၢဝ်ႈႁႅင်း ၼႂ်းဝဵင်းတႃႈၶီႈလဵၵ်းၼႆႉသေ ႁဵတ်းႁႂ်ႈ တုမ်ႉတိူဝ်ႉၵူၼ်းမိူင်း၊ ၵူၼ်းၶၢႆႁၢၼ်ႉ ၶွင် ၵိၼ်ယႅမ်ႉ/ ၶူဝ်းၼုင်ႈဝႂ် ၸိူဝ်းၼႆႉ ထူပ်းတၢင်းယၢပ်ႇၽိုတ်ႇႁႅင်း။

ၸဝ်ႈႁၢၼ်ႉၶၢႆ ၶွင်ၵိၼ်ယႅမ်ႉ ၵေႃႉၼိုင်ႈ တီႈတႃႈၶီႈလဵၵ်း လၢတ်ႈၽူႈတွႆႇႁွၵ်ႈဝႃႈ – “တႄႇဢဝ် ဝတ်ႉသၢႆမိူင်းၵႂႃႇ တေႃႇထိုင် ၵၢတ်ႇသၢၼ်သၢႆးၼၼ်ႉ လၢၼ်ႉၶၢႆၶူဝ်းၵုၼ်ႇ၊ ၶွင်ၵိၼ်ယႅမ်ႉ ၸွမ်းတၢင်းလူင်ၼၼ်ႉ ဢမ်ႇၸၢင်ႈပိုတ်ႇၶၢႆသေဢိတ်း။ ပွၵ်ႈၼႆႉ တေလႆႈဝႃႈ ၼမ်ႉထူမ်ႈႁႅင်းလိူဝ်ၵူႈပွၵ်ႈဢေႃႈ။ တေႃႇထိုင်ယၢမ်းလဵဝ် ၼမ်ႉပႆႇယွမ်းလူင်းၶႃႈ”- ဝႃႈၼႆ။

တႄႇဢဝ် ႁူဝ်လိူၼ်ၵျူႊလၢႆႊၼၼ်ႉမႃး ႁၢၼ်ႉတေႃႇထိုင် ႁၢင်လိူၼ်ဢေႃႊၵတ်ႊသ်ၼႆႉ ၼမ်ႉသၢႆလူၼ်ႉ ၾင်ႇၼွင်းထူမ်ႈ တီႈဝဵင်းတႃႈၶီႈလဵၵ်းၼႆႉ ဢမ်ႇယွမ်း 5 ပွၵ်ႈယဝ်ႉ။

“တီႈႁိူၼ်းၶႃႈၼႆႉ တိုၵ်ႉႁဵတ်းလွင်ႈမူတ်းသႂ် ယဝ်ႉၵႂႃႇလၢႆဝၼ်းၼႆႉၵူၺ်း မိူဝ်ႈဝႃးၼႆႉ ၺႃးၼမ်ႉထူမ်ႈထႅင်ႈ ဢမ်ႇႁူႉဝႃႈ တေလႆႈႁဵတ်းၸိူင်ႉႁိုဝ် ၵုမ်ႇလႆႈလၢင်ႉၽဵဝ်ႈၸွမ်း ၼမ်ႉထူမ်ႈၼႆႉ မီးမႃး 2-3 ပွၵ်ႈယဝ်ႉ ၵုမ်ႇလႆႈႁိူဝ်ႉၸွမ်းၼမ်ႉထူမ်ႈ ၼႆႉၵူၺ်း ၵၢၼ်ငၢၼ်းၵေႃႈ ဢမ်ႇပဵၼ်”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ ဢၼ်ၵူၼ်းမိူင်း ယၢပ်ႇၽိုတ်ႇလိူဝ်ႁႅင်းထႅင်ႈတႄႉ ၸိူဝ်းၵူၼ်းမိူင်း ႁႃၸဝ်ႉၵိၼ်ၶမ်ႈ လႆႈၵိုတ်းယင်ႉၵၢၼ်ငၢၼ်းမႃးသေ ဢမ်ႇမီးငိုၼ်းၶဝ်ႈ ယဝ်ႉၵေႃႈ ဢမ်ႇၸၢင်ႈဢွၵ်ႇႁႃသိုဝ်ႉ ၶွင်ၵိၼ်ယႅမ်ႉတၢင်းၼွၵ်ႈ ၸိူဝ်းၼႆႉ ယွၼ်ႉၼမ်ႉထူမ်ႈႁႅင်း။  

ဢိင်ၼိူဝ် လွင်ႈၼမ်ႉသၢႆ ၵႆႉလုပ်ႇထူမ်ႈ ၼႂ်းဝဵင်းတႃႈၶီႈလဵၵ်း ၸိူင်ႉၼႆၼႆႉ ယွၼ်ႉႁွင်ႈၼမ်ႉၵႅပ်ႈ၊ တိုၼ်ႈ၊ ယုၵ်းယၢၵ်းၶမ်ၼမ် ယူႇတီႈ လူင်ပွင်ၸိုင်ႈ တင်းသွင်ၾင်ႇၸိုင်ႈမိူင်းၵေႃႈ ဢမ်ႇၵႄႈလိတ်ႈပၼ်ႁႃသင် – ၵူၼ်းမိူင်းတႃႈၶီႈလဵၵ်းလၢတ်ႈ။