တၢင်းပဵၼ်မႁဵင်းလိင်း (Monkey Pox) ဢၼ်ၸုမ်းပၢႆးယူႇလီလုမ်ႈၾႃႉ (WHO) ပိုၼ်ၽၢဝ်ႇဝႆႉ ပဵၼ်ငဝ်းလၢႆးပၢႆးယူႇလီ ၶိုၵ်ႉၶၵ်ႉ ၼႂ်းလုမ်ႈၾႃႉၼႆႉ တီႈမိူင်းထႆးၵေႃႈ ထူပ်းႁၼ် ၵူၼ်းတိတ်းၸပ်းတၢင်းပဵၼ် ၵေႃႉဢွၼ် တၢင်းသုတ်းယဝ်ႉၼႆ ယူႇတီႈသိုဝ်ႇၼႂ်းမိူင်း ပိုၼ်ၽၢဝ်ႇၵႂႃႇ ၼႂ်းဝၼ်းတီႈ 21/08/2024 ၼင်ႇၼႆ ။

သိုဝ်ႇၶၢဝ်ႇ Bangkok Post ႁၢႆးငၢၼ်းၵႂႃႇဝႃႈ ထူပ်းႁၼ်ၾၢင်ႁၢင်ႈတၢင်းပဵၼ် မႁဵင်းလိင်း တီႈၼၢင်းယိင်း ဢႃယု 66 ပီ ဢၼ်လုၵ်ႉတီႈၵုၼ်ဢႅပ်ႊၾရိၵသေ ပွၵ်ႈမႃးတီႈၵုင်းထဵပ်ႈ ၼႂ်းဝၼ်းတီႈ 14 လိူၼ်ၼႆႉလႄႈ လႆႈသူင်ႇတူဝ်ဝႆႉတီႈႁူင်းယႃ ၊ တိုၵ်ႉပဵၼ်ၽွင်းၵူတ်ႇထတ်းတူၺ်း ၸိူဝ်ႉမႅင်းတၢင်းပဵၼ်ၼႆသေတႃႉ ၽူႈမီးပုၼ်ႈၽွၼ်းၶဝ်တႄႉ လၢမ်းၶၢတ်ႈဝႃႈ ထူပ်းႁၼ်ၸိူဝ်ႉမႅင်းတၢင်းပဵၼ် မႁဵင်းလိင်း clade 1 – ဝႃႈၼႆ။

ယၢမ်းလဵဝ် လႆႈယႅၵ်ႈဝႆႉမၼ်းၼၢင်း ႁင်းၵူၺ်းတီႈၼိုင်ႈ တေလႆႈပႂ်ႉထႅင်ႈ 2 ဝၼ်း ၸင်ႇတေလႆႈႁူႉၶေႃႈတွပ်ႇ ၊ လိူဝ် ၼၼ်ႉ ၵူၼ်း 42 ၵေႃႉ ဢၼ်ယူႇႁိမ်းၸမ်ၵၼ် တၢင်းၵူၼ်းပဵၼ်ၼၼ်ႉၵေႃႈ တိုၵ်ႉပႂ်ႉတူၺ်းငဝ်းလၢႆး ဝႆႉယူႇ – ဝႃႈၼႆ။

ယွၼ်ႉတၢင်းပဵၼ်မႁဵင်းလိင်း Mpox ၼႆႉသေ တီႈၵုၼ်ဢႅပ်ႊၾရိၵ မီးၵူၼ်းလူႉတၢႆၵႂႃႇတင်းၼမ်။ မိူၼ်ၼင်ႇ တီႈမိူင်း ၵုၼ်ႊၵူဝ်ႊ ၊ ပရွၼ်ႊတီႊ ၊ ရဝမ်ႊတႃႊလႄႈ ယူႊၵၼ်ႊတႃႊ ၸိူဝ်းၼႆႉ  တႄႇပဵၼ်မႃးၸဵမ် မိူဝ်ႈၼႂ်းလိူၼ်ၵျူႊလၢႆႊ။

တၢင်းပဵၼ်မႁဵင်းလိင်းၼႆႉ လုၵ်ႉတီႈတူဝ်သတ်းသေ တိတ်းၸပ်းလၢမ်းၽႄႈၸူးၵူၼ်းၼႆသေတႃႉ သင်ယူႇၸမ်ၵူၼ်းပဵၼ်ၵေႃႈ ၸၢင်ႈတိတ်းၸပ်းလႆႈ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။