ၵူၼ်းမိူင်းဝဵင်းလႃႈသဵဝ်ႈ တၢႆယွၼ်ႉပၢင်တိုၵ်း သိုၵ်းမၢၼ်ႈလႄႈ MNDAA ယိုဝ်းၵၼ်ၼၼ်ႉ မီး 300 ပၢႆ ၶၢပ်ႈတူဝ်ၸိူဝ်းပႆႇလႆႈၵဵပ်းၵေႃႈ ယင်းတိုၵ်ႉမီး ဝႃႈၼႆ။

ၶၢဝ်းတၢင်း ပၢင်တိုၵ်းႁၢဝ်ႈႁႅင်း မွၵ်ႈၼိုင်ႈလိူၼ် တႄႇႁူဝ်လိူၼ်ၵျူႊလၢႆႊ မႃး တေႃႇထိုင် ႁူဝ်လိူၼ်ဢေႃႊၵတ်ႊသ်ၼႆႉ ၵူၼ်းမိူင်းဝဵင်းလႃႈသဵဝ်ႈ ၺႃးၸၢၵ်ႇမၢၵ်ႇ ၺႃးယိုဝ်းသေ တၢႆၼႂ်းဝဵင်းၼွၵ်ႈဝဵင်း တင်းမူတ်းမီး 300 ပၢႆၼႆ ၸုမ်းၸွႆႈထႅမ် ၵူၼ်းမၢတ်ႇၸဵပ်းလူႉတၢႆ FYV (Freedom Youth Volunteers) လၢတ်ႈတီႈၽူႈတွႆႇႁွၵ်ႈၼင်ႇၼႆ။

“ၵူၼ်းပိုၼ်ႉတီႈတၢႆ ၼႂ်းပၢင်တိုၵ်း မီးၸမ် 300 ပၢႆ ၊ ဢၼ်ၸုမ်းႁဝ်းၶႃႈ လႆႈၵဵပ်းသၢင်းၵဵဝ်ႇပၼ်တႄႉ မီး 86 ၵေႃႉယဝ်ႉ။ ဢၼ်ႁဝ်းၶႃႈ ပႆႇလႆႈၵဵပ်းၵေႃႈ တေမီးတင်းၼမ် ၊ ၵူၼ်းပၢႆႈၽေးသိုၵ်းၵေႃႈ ၵမ်ႈၽွင်ႈပွၵ်ႈမႃး ႁိူၼ်းၶိုၼ်းယဝ်ႉ။ ၵႃႈၶၼ် ၵုၼ်ႇၶိုၼ်ႈသေ ၵူၼ်းပိုၼ်ႉတီႈ မီးလွင်ႈယၢပ်ႇတႃႇႁႃၵိၼ်လဵင်ႉတွင်ႉ”- ဝႃႈၼႆ။

ၶၢပ်ႈတူဝ်တၢႆ ၸိူဝ်းၼႆႉ ပဵၼ်ၸိူဝ်းဢၼ်တၢႆဝႆႉ ၸဵမ်မိူဝ်ႈပၢင်တိုၵ်းႁၢဝ်ႈႁႅင်းၼႂ်းၵၢင်ဝဵင်း၊ ၵမ်ႈၼမ် ပဵၼ်တၢင်းၶွၵ်ႈလူင်၊ ၵမ်ႈၽွင်ႈ ပဵၼ်ၼႂ်းပွၵ်ႉၼႂ်းယွမ်ႇ။ ၵူၼ်းဝဵင်းလႃႈသဵဝ်ႈ ဢွၼ်ၵၼ်ပၢႆႈၽေးသိုၵ်း ၶႂ်ႈဝႃႈတင်းဝဵင်း။ ၸိူဝ်းၵိုတ်းဝႆႉ ၼႂ်းဝဵင်းၵေႃႈ ဢမ်ႇၸၢင်ႈဢွၵ်ႇ ဢမ်ႇႁတ်းဢွၵ်ႇ ၵႂႃႇၵဵပ်းၽဵဝ်ႈ။

ယၢမ်းလဵဝ်တႄႉ တူဝ်တၢႆၸိူဝ်းၼၼ်ႉ ၵိုတ်းၶူင်းလုပ်ႇမၼ်းၵူၺ်းယဝ်ႉ ၸုမ်းပရႁိတ ၊ သိုၵ်းၵဝ်ႈၵၢင်ႉၶဝ် မႃးၽဵဝ်ႈ မႃးၵဵပ်းဢဝ်ၵႂႃႇၽဝ်ပၼ်။ ဢမ်ႇႁူႉဝႃႈ တၢႆဝႆႉ မီးတီႈလႂ်လၢႆလၢႆလႄႈ ပေႃးငိၼ်းဢၢႆတူႇဢၢႆၼဝ်ႈ ၸင်ႇၸၢင်ႈၵႂႃႇ ၽဵဝ်ႈပၼ်။

ယၢမ်းလဵဝ် ၵူၼ်းပၢႆႈၽေးသိုၵ်း ၸိူဝ်းပွၵ်ႈၶိုၼ်းဝဵင်းလႃႈသဵဝ်ႈ တိုၵ်ႉမီး 3 ပုၼ်ႈ 2 ပုၼ်ႈ။ ၵမ်ႈၽွင်ႈ ယင်းပႆႇႁတ်းပွၵ်ႈ ၶိုၼ်း။ တီႈဝဵင်းလႃႈသဵဝ်ႈၼႆႉ လႅင်းၾူင်း Mytel  တႄႉ လႆႈယဝ်ႉသေတႃႉ ၾႆးၾႃႉတႄႉ ပႆႇလႆႈၶိုၼ်း ၵူၼ်းပိုၼ်ႉတီႈ ဢၼ်ပွၵ်ႈၶိုၼ်းႁိူၼ်းယေး ၵေႃႉၼိုင်ႈ လၢတ်ႈၽူႈတွႆႇႁွၵ်ႈ ထႅင်ႈၼင်ႇၼႆ။

“ၵူၼ်းပၢႆႈသိုၵ်း ၵမ်ႈၽွင်ႈပွၵ်ႈမႃးၶိုၼ်းယဝ်ႉ မႃးပတ်းၽဵဝ်ႈႁိူၼ်းၽႂ်မၼ်းသေ ယူႇၵႂႃႇ။ မၢင်ႁိူၼ်း ၸဝ်ႈႁိူၼ်းပႆႇပွၵ်ႈမႃးၶိုၼ်း။ ၵူၺ်းၵႃႈ ပေႃးႁိမ်းၶၢင်ႈႁိူၼ်းလႆႈဢၢႆတူႇတႄႉၵေႃႈ လၢတ်ႈၵၼ်ၸႅင်ႈၵၼ်သေ ၸုမ်းပရႁိတၶဝ်၊ ၸုမ်းသိုၵ်းၵဝ်ႈၵၢင်ႉၶဝ် မႃးၽဵဝ်ႈပၼ်ယူႇ။ ၵူၺ်းၵႃႈ ယင်းပႆႇၽဵဝ်ႈလႆႈတင်းမူတ်း”- ဝႃႈၼႆ။

ၵူၼ်းမိူင်းဝဵင်းလႃႈသဵဝ်ႈ ၸိူဝ်းပွၵ်ႈၶိုၼ်းႁိူၼ်းၼၼ်ႉ ၵမ်ႈၼမ် မိူဝ်းပတ်းၽဵဝ်ႈသေ တူၺ်းငဝ်းလၢႆး ပိုၼ်ႉတီႈၵူၺ်း။ ယွၼ်ႉပိူဝ်ႈ တိုၵ်ႉမီးၼႂ်းငဝ်းလၢႆး ပႆႇၸၢင်ႈတမ်းၸႂ်လႄႈ ၶိုၼ်းဢွၵ်ႇပၢႆႈဝႆႉ။ လႆႈမႆႈၸႂ် ယၢမ်းလႂ် တေဢဝ်ၶိူင်ႈမိၼ်မႃးပွႆမၢၵ်ႇ၊ ၵူဝ်ပၢင်တိုၵ်း ပဵၼ်မႃးႁၢဝ်ႈႁႅင်းၶိုၼ်း ဝႃႈၼႆ။  

ၼႂ်းလိူၼ် ဢေႃႊၵတ်ႊသ် ဝၼ်းတီႈ 3 သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇယိုတ်းလႆႈ ငဝ်ႈငုၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ ယမၶ တီႈဝဵင်းလႃႈသဵဝ်ႈသေ ဢဝ်လုၵ်ႈမေးၵူၼ်းသိုၵ်းလႄႈ ၶႃႈသိုၵ်း ၸိူဝ်းၼၼ်ႉ သိုပ်ႇသူင်ႇပၼ် တီႈလွတ်ႈၽေးလီလီ ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)