သိုၵ်းၵဝ်ႈၵၢင်ႉ MNDAA ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈၶလယ 147 မႃးႁၢဝ်ႈႁႅင်း တီႈဝဵင်းသီႇပေႃႉ ၶၢဝ်းတၢင်း ၸမ်လိူၼ်ယဝ်ႉ ၸင်ႇယိုတ်းၵုမ်းလႆႈ ၽူႈၵွၼ်းတပ်ႉတႄႉ ပၢႆႈလွတ်ႈဝႆႉ ဝႃႈၼႆ။

ဝၼ်းတီႈ 21/08/2024 ယၢမ်းၵၢင်ၼႂ်ၸဝ်ႉ သိုၵ်းၵဝ်ႈၵၢင်ႉ ယိုတ်းၵုမ်းလႆႈ တပ်ႉသိုၵ်းမၢၼ်ႈ ၶလယ 147 ဢၼ်ပၵ်းဝႆႉ တီႈၼႂ်းဢိူင်ႇၼွင်ၵေႃႈလူင် ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ယွၼ်ႉသိုၵ်းၵဝ်ႈၵၢင်ႉ ဢဝ်ႁႅင်းသိုၵ်းတင်းၼမ် ၶိုၼ်ႈလေႃႇတိုၵ်းႁၢဝ်ႈႁႅင်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းၵဝ်ႈၵၢင်ႉၶဝ် သိမ်းလႆႈတပ်ႉသိုၵ်းမၢၼ်ႈ 147 တီႈၼွင်ၵေႃႈယဝ်ႉၶႃႈ။ ၵွပ်ႈပိူဝ်ႈသိုၵ်းၵဝ်ႈၵၢင်ႉၶဝ် ဢဝ်ဢဵၼ်ႁႅင်းတင်းၼမ် ၶိုၼ်ႈယိုဝ်းသေ ၾၢႆႇသိုၵ်းမၢၼ်ႈ လႆႈဝၢင်း ၶိူင်ႈပၼ် ၵူၺ်းၵႃႈ ၽူႈၵွၼ်းတပ်ႉၶဝ်တႄႉ ပၢႆႈပႅတ်ႈလုၵ်ႈၼွင်ႉတပေးမၼ်းဢေႃႈ။ ယၢမ်းလဵဝ် တီႈတပ်ႉၼွင်ၵေႃႈ ၼၼ်ႉ သိုၵ်းၵဝ်ႈၵၢင်ႉၶဝ် ၶိုၼ်ႈပၵ်းတုင်းၶဝ်ယဝ်ႉ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈ သုမ်းတပ်ႉပၢင်သဝ်း တီႈဢိူင်ႇၼွင်ၵေႃႈလူင်ၼႆႉသေ ၵူၼ်းသိုၵ်း မၢင်ၸိူဝ်း ပၢႆႈႁွတ်ႈထိုင် တၢင်းဝၢၼ်ႈတူၼ်ႈၵႅင်း – ၼႃးမၢၵ်ႇၶေႃလႄႈ ၼမ်ႉလၼ်ႈ ၸိူဝ်းၼႆႉ။

“ဝၢႆးသိုၵ်းၵဝ်ႈၵၢင်ႉ သိမ်းလႆႈယၢမ်းၵၢင်ၼႂ်ယဝ်ႉ ထိုင်မႃး ယၢမ်းၶမ်ႈ ၶဝ်ႁဵတ်းဢွင်ႇပွႆးသေ ဢဝ်မူတူဝ်လိပ်း ပွႆႇၶဝ်ႈမုၵ်ႉၾႆးၵမ်းသိုဝ်ႈ သဵင်မူႁွင်ႉ ပေႃးပၼ်းလူင်ဝႆႉ ၵူၼ်းဝၢၼ်ႈလႄႈ သင်ၶၸဝ်ႈ ၸိူဝ်းဢမ်ႇပၢႆႈသေ ၵိုတ်းဝႆႉၼၼ်ႉ ၼွၼ်းပေႃးဢမ်ႇလပ်းတင်းၶိုၼ်းယဝ်ႉ။ ယွၼ်ႉပၢင်တိုၵ်းၼႆႉသေ မၢၵ်ႇၵွင်ႈတူၵ်းၸွမ်းၼႃးၸွမ်းထိူၼ်ႇလႄႈ ၸွမ်းႁိမ်းဝၢၼ်ႈ ၸိူဝ်းၼႆႉ တင်းၼမ်။ ယဝ်ႉၵေႃႈ တင်းသွင်ၾၢႆႇ မီးလွင်ႈလူႉတၢႆမၢတ်ႇၸဵပ်းၼမ် မိူၼ်ၵၼ်”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ငဝ်းလၢႆး တၢင်းဢိူင်ႇၼွင်ၵေႃႈလူင်ၼႆႉ သိုၵ်းၵဝ်ႈၵၢင်ႉ တိုၵ်ႉထႅမ်ႁႅင်းၵူၼ်းလႄႈ မၢၵ်ႇမိုဝ်ႈၸိုၼ်းယၢမ်း ထႅင်ႈတင်းၼမ်ယူႇ ဝႃႈၼႆ။

ပၢင်တိုၵ်း တီႈဢိူင်ႇၼွင်ၵေႃႈလူင်ၼႆႉ တႄႇပဵၼ်မႃး မိူဝ်ႈဝၼ်းတီႈ 28/07/2024 ၼၼ်ႉသေ ၾၢႆႇသိုၵ်းၵဝ်ႈၵၢင်ႉ ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈၶလယ 147 ၼၼ်ႉမႃး ႁၢၼ်ႉတေႃႇထိုင်ဝၼ်းတီႈ 21 ၼႆႉ ၸင်ႇယိုတ်းၵုမ်းလႆႈ။

ဢိူင်ႇၼွင်ၵေႃႈလူင်ၼႆႉ တေယၢၼ်ဝဵင်းသီႇပေႃႉ 14 လၵ်းလႄႈ ယၢၼ်ဝဵင်းၼမ်ႉလၼ်ႈ 24 လၵ်း ၼႆယဝ်ႉ။