ၸွမ်းၼင်ႇ ၽႅၼ်ၵၢၼ် 120 ဝၼ်း ၶွင်ႁွင်ႈၵၢၼ် ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်း မိူင်းထႆးသေ ၼႂ်းၶၢဝ်းတၢင်း ၵူတ်ႇထတ်းမႃး 2 လိူၼ်ပၢႆၼႆႉ ႁႅင်းၵၢၼ်မိူင်းမၢၼ်ႈ ၸိူဝ်းၺႃးတီႉၺွပ်း မီးၸမ် 2 သႅၼ် ယဝ်ႉၼႆ – ဢူးမူဝ်းၵျူဝ်း ႁူဝ်ပဝ်ႈ ၵေႃႇမတီႇ ၾၢႆႇႁူမ်ႈၵၢၼ်တူင်ႉၼိုင် လွင်ႈႁႅင်းၵၢၼ် မိူင်းမၢၼ်ႈ လၢတ်ႈတီႈၶၢဝ်ႇ BBC ၼင်ႇၼႆ။
တႄႇဢဝ် ဝၼ်းတီႈ 5 လိူၼ်ၵျုၼ်ႊတေႃႇထိုင် ဝၼ်းတီႈ 5 သႅပ်ႊထႅမ်ႊပိူဝ်ႊၼႆႉ ယူႇတီႈ ႁွင်ႈၵၢၼ် ၾၢႆႇၵူတ်ႇထတ်း ၵူၼ်းၶဝ်ႈဢွၵ်ႇမိူင်း မိူင်းထႆး လူင်းၵူတ်ႇထတ်းတီႉၺွပ်း ႁႅင်းၵၢၼ်ယၢၼ်မိူင်း ၸိူဝ်းဢမ်ႇမီး ဝတ်းဝႂ်တဵမ်ထူၼ်ႈလႄႈ ၵၢၼ်ငၢၼ်းဢမ်ႇမႅၼ်ႈၸွမ်း ၼႂ်းဝတ်းဝႂ်ႁဵတ်းၵၢၼ် ၸိူဝ်းၼၼ်ႉ ဝႃႈၼႆ။
လိူဝ်ၼၼ်ႉ မိူၼ်ၼင်ႇ ၵၢၼ်ပိၼ်ႇၽႃႇသႃႇ ၊ ၵၢၼ်ၵိၼ်ၸၢင်ႈၶပ်းရူတ်ႉၵႃး ၶၢဝ်းတၢင်းပွတ်း/ ယၢဝ်း ၊ ၵၢၼ်မိပ်ႇၼူတ်ႈ ႁူမ်ႈပႃးၵၢၼ်ငၢၼ်း 27 ဢၼ် ၸိူဝ်းမၵ်းမၼ်ႈပၼ်ၶႂၢင်ႉဝႆႉ တွၼ်ႈတႃႇၵူၼ်းထႆးၵူၺ်း။ သင်ႁႅင်းၵၢၼ် တၢင်ႇမိူင်းပူၼ်ႉပႅၼ် ႁဵတ်းၼႆၸိုင် ၺႃးတီႉၺွပ်းမိူၼ်ၵၼ် – ဝႃႈၼႆ။
လွင်ႈၵူတ်ႇထတ်း တီႉၺွပ်းႁႅင်းၵၢၼ်ၼႆႉ လိူဝ်သေ ႁႅင်းၵၢၼ်မိူင်းမၢၼ်ႈယဝ်ႉ မိူၼ်ၼင်ႇ ႁႅင်းၵၢၼ်မိူင်းၵမ်ႇပေႃးတီးယႃး ၊ မိူင်းဝႅတ်ႉၼၢမ်းလႄႈ မိူင်းလၢဝ်း ၸိူဝ်းၼႆႉၵေႃႈ ၺႃးၵူတ်ႇထတ်းတီႉၺွပ်း ယွၼ်ႉၽႅၼ်ၵၢၼ် 120 ဝၼ်းၼႆႉ – ၼႆယဝ်ႉ။
ၵူၼ်းၸိူဝ်းၺႃးတီႉၺွပ်းၼႆႉ ၸွမ်းၼင်ႇ ပၵ်းပိူင်မၢႆမီႈ လဝၵ မိူင်းထႆး မီးဝႆႉသေ တေၺႃးတၢမ်ႇမႂ်ငိုၼ်း 5,000 ထိုင် 50,000 ဝၢတ်ႇငိုၼ်းထႆး ၊ တူတ်ႈတၢမ်ႇ ဢၼ်ၼၵ်းလိူဝ်သေပိူၼ်ႈသမ်ႉ တေထုၵ်ႇလိုပ်ႈဢွၵ်ႇမိူင်း ဢမ်ႇပၼ်ၶဝ်ႈမိူင်းထႆး တႃႇၶၢဝ်းတၢင်း 2 ပီ – ၼႆယဝ်ႉ။
