ၾူၼ်တူၵ်းထပ်းၵၼ်ဢမ်ႇထၢတ်ႇ လၢႆဝၼ်းလႄႈ ႁဵတ်းႁႂ်ႈၼမ်ႉလုပ်ႇထူမ်ႈ တူင်ႈၼႃးၵူၼ်းမိူင်းတူၼ် မီးလွင်ႈလူႉသုမ်းၼမ် ဢမ်ႇယွမ်း 10 ဢေႊၶိူဝ်ႊ။
တႄႇဢဝ် ၵၢင်လိူၼ်ဢေႃႊၵတ်ႊသ်ၼႆႉမႃး ထိုင်ယၢမ်းလဵဝ် ၼႃႈၾႃႉပႆႇပိုတ်ႇပၢင်ႇ ၾူၼ်တိုၵ်ႉတူၵ်းယူႇလႄႈ ႁဵတ်းႁႂ်ႈ ၵႄးၼမ်ႉတူၼ် လူၼ်ႉၾင်ႇလုပ်ႇထူမ်ႈတူင်ႈၼႃး ၵူၼ်းမိူင်း ၼႂ်းၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇသေ ႁဵတ်းႁႂ်ႈမၢၵ်ႇၶဝ်ႈတဝ်ႈၼမ်ႉ လူႉသုမ်းၼမ် ၼႆယဝ်ႉ။
ၸဝ်ႈၼႃးမိူင်းတူၼ် ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၶၢဝ်းၼႆႉ ပိူင်လူင်မၼ်းတႄႉ ပဵၼ်ၶၢဝ်းသွမ်ႈၼႃး မႅၼ်ႈၽွင်းလီပႂ်ႉတူၺ်းတူၼ်ႈၶဝ်ႈယႂ်ႇၶိုၼ်ႈမႃးၵူၺ်းယဝ်ႉ။ ၵူၺ်းၵႃႈ ၼမ်ႉသမ်ႉ မႃးယိုင်ႈထူမ်ႈ ယူႇၸိူင်ႉၼႆ ပဵၼ်လၢႆဝၼ်းယဝ်ႉလႄႈ တူၼ်ႈၶဝ်ႈ ပေႃးဢမ်ႇႁၼ်ယဝ်ႉ။ ပီၼႆႉတႄႉ ၶဝ်ႈဢၼ်ၽုၵ်ႇဝႆႉၵေႃႈ ၼဝ်ႈပႅတ်ႈမူတ်းယဝ်ႉ။ တႃႇပီမႃးၼႃႈတႄႉ လႆႈမႆႈၸႂ်ဢေႃႈ။ ဢၼ်ၺႃးၼမ်ႉထူမ်ႈယူႇ ၸိူဝ်းၼႆႉ ဢေႊၶိူဝ်ႊ ဢမ်ႇယွမ်း 10 ။ တၢင်းဝၢၼ်ႈၼွင်ပႃယဵၼ်ႇပုၼ်ႉ ၶၢဝ်း ၼမ်ႉၼွင်းယႂ်ႇၼႆႉ မီးၵူၼ်း ၸူမ် ၼမ်ႉလူႉတၢႆ ၵေႃႉၼိုင်ႈလူးၵွၼ်ႇ”- ဝႃႈၼႆ။
ဢွင်ႈတီႈ ဢၼ်ၺႃးၼမ်ႉထူမ်ႈႁၢဝ်ႈႁႅင်း ၼႂ်းၸႄႈဝဵင်းမိူင်းတူၼ်ၼႆႉ ပဵၼ်တူင်ႈၼႃး ၵူၼ်းဝၢၼ်ႈၼွင်ပႃယဵၼ်ႇ၊ ဝၢၼ်ႈ ၶုမ်ႇ (ပွၵ်ႉဢူးယဵၼ်ႇ) ၊ ဝၢၼ်ႈမႂ်ႇလႄႈ ဝၢၼ်ႈလူင်မႄႈၵႅၼ်း (မႄႈၶႅၼ်း) ၸိူဝ်းၼႆႉ။ ၵမ်ႈၼမ် ၶၢဝ်းၾူၼ်ၼႆႉ ၽုၵ်ႇသွမ်ႈ ၶဝ်ႈၼႃး ပဵၼ်ပိူင်ယႂ်ႇလႄႈ ယဝ်ႈၵေႃႈ တေၽုၵ်ႇၽၵ်းၵၢတ်ႇ၊ ၽၵ်းၵီး ၸွမ်း ၵမ်ႈၽွင်ႈ။ ၼၼ်ႉၵေႃႈ ထုၵ်ႇၼမ်ႉထူမ်ႈပႃး ၼႆယဝ်ႉ။
ၵူၼ်းမိူင်းတူၼ် လၢတ်ႈၽူႈတွႆႇႁွၵ်ႈဝႃႈ – “လွင်ႈလူႉသုမ်းတႄႉ ၼမ်ဢေႃႈ။ ၼမ်ႉထူမ်ႈ ၸဵမ်မိူဝ်ႈလိူၼ် 8 လပ်းပုၼ်ႉ တေႃႇပေႃးထိုင်လိူၼ်ၵဝ်ႈလွင်ႈ 2 ၶမ်ႈ မိူဝ်ႈၼႆႉ။ ပိုၼ်ႉတီႈသုင်တႄႉ ၼမ်ႉလူတ်းယွမ်း ၵမ်ႈၽွင်ႈယူႇသေတႃႉ ၸိူဝ်းတီႈတႅမ်ႇတႄႉ တိုၵ်ႉထူမ်ႈယူႇ ၶဝ်ႈတႄႉ ၼဝ်ႈမူတ်းယဝ်ႉ ဢၼ်ၽုၵ်ႇသွမ်ႈဝႆႉ ၸိူဝ်းၼၼ်ႉ”- ဝႃႈၼႆ။
ၼႂ်းၵၢင်လိူၼ်ဢေႃႊၵတ်ႊသ်ၼႆႉ ယွၼ်ႉၾူၼ်တူၵ်းႁႃႇယႂ်ႇသေ ၼမ်ႉႁူၺ်ႈၼမ်ႉလွႆ ယိုင်ႈၼွင်းလုပ်ႇ ထူမ်ႈသဵၼ်ႈတႃႈသၢႆႈတၢင်း ႁဵတ်းႁႂ်ႈၾင်ႇႁိုၵ်းယၢတ်ႇ၊ ၶူဝ်တႆႇတီႈႁိမ်းဝၢၼ်ႈၼႃး ၼၼ်ႉၵေႃႈ ၵူၼ်ႇပင်းလူႉၵွႆၸွမ်း ႁၢၼ်ႉတေႃႇထိုင်ယၢမ်းလဵဝ် လႆႈႁဵတ်းၶူဝ်တႆႇဝႆႉ ၸူဝ်ႈၶၢဝ်း။
