မိူဝ်ႈၼႆႉ ဝၼ်းတီႈ 21/08/2024 ယၢမ်းၵၢင်ၼႂ်ၸဝ်ႉ 8 မူင်း ၽွင်းလုၵ်ႈဢွၼ်ႇ ၵႂႃႇႁူင်းႁဵၼ်းၼၼ်ႉ ရူတ်ႉၵႃး လမ်းၼိုင်ႈလႄႈ ရူတ်ႉၶိူင်ႈဢၼ်တၢင်ႇလုၵ်ႈႁဵၼ်းမႃးလမ်းၼိုင်ႈ ၽႃႇၺႃးၵၼ် တီႈဝဵင်းတူၼ်ႈတီး လုၵ်ႈႁဵၼ်းဢွၼ်ႇ ဢႃယု 10 ၶူပ်ႇ တၢႆထင်တီႈ။ 

ရူတ်ႉၽႃႇၺႃးၵၼ်ၼႆႉ ပဵၼ်တီႈသဵၼ်ႈတၢင်းလဵပ်ႈဝဵင်း ၾၢႆႇတူၵ်း (အနောက်မြို့ပတ်လမ်း) ၼႂ်းၵႄႈၸၼ်ႉ ၸွမ်တူၼ်ႈတီးလႄႈ ႁၢၼ်ႉၼမ်ႉၼဵင်ႈၸဵမ်း ဢေႊရႃႊဝတီႊ။ ရူတ်ႉယႂ်ႇၽႃႇၺႃးရူတ်ႉၶိူင်ႈ ဢၼ်သွင်ပေႃႈ လုၵ်ႈတၢင်ႇၵၼ်မႃး တႃႇၵႂႃႇသူင်ႇႁူင်းႁဵၼ်းၼၼ်ႉသေ လၢၵ်ႈၸၼ်ရူတ်ႉၶိူင်ႈၼၼ်ႉ ၵႂႃႇၸွမ်းပႃး ႁဵတ်းႁႂ်ႈလုၵ်ႈဢွၼ်ႇတူၵ်းရူတ်ႉၶိူင်ႈလူႉတၢႆ – ဝႃႈၼႆ။

ၵူၼ်းမိူင်း ဢၼ်ႁၼ်တေႃႇၼႃႈတေႃႇတႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈႁဝ်းၶႃႈႁၼ်တႄႉ ၶဝ်တိုၵ်ႉၽႃႇ ၵၼ်ယဝ်ႉ။ လုၵ်ႈဢွၼ်တႄႉ ၼွၼ်းလူမ်ႉဢမ်ႇႁူႉတူဝ်ယဝ်ႉ ပေႃႈလုၵ်ႈဢွၼ်ႇၵေႃႈ ႁွပ်ႇလုၵ်ႈမၼ်းဝႆႉ၊ ၵူၼ်းၵေႃႈ ၼမ် ၼႃႇ။ ၽူႈမီးပုၼ်ႈၽွၼ်းၶဝ် မႃးႁွင်ႉၵႂႃႇ တင်းပေႃႈ တင်းလုၵ်ႈယဝ်ႉ”- ဝႃႈၼႆ။

လုၵ်ႈဢွၼ်ႇႁဵၼ်းၼၼ်ႉ တေပဵၼ်လုၵ်ႈႁဵၼ်း တီႈႁူင်းႁဵၼ်းလႂ်တႄႉ ဢမ်ႇလႆႈႁူႉ။ ပေႃႈလုၵ်ႈဢွၼ်ႇတႄႉ မၢတ်ႇၸဵပ်းလိူတ်ႈဢွၵ်ႇၵူၺ်း ဢမ်ႇထိုင်တီႈတၢႆ – ဝႃႈၼႆ။

တီႈဢၼ်ရူတ်ႉၵႃး ၽႃႇၵၼ်ယၢမ်းလဵဝ်ၼႆႉ ပဵၼ်ပိုၼ်ႉတီႈၵူၼ်းၵိုၼ်း ရူတ်ႉလိူင်ႇလႄႈ ၵူႈပွၵ်ႈၵေႃႈ ရူတ်ႉၵႆႉၽႃႇၺႃး ၵၼ်ယူႇ။ ၵူၺ်းၵႃႈ ယၢမ်းလဵဝ် ဢၼ်တၢႆၼႆႉသမ်ႉ ပဵၼ်လုၵ်ႈဢွၼ်ႇႁဵၼ်းလႄႈ ၵူၼ်းပိုၼ်ႉတီႈတူၵ်းၸႂ် ပဵၼ်ဢၼ်ၸႂ် ဢမ်ႇလီ။    

ယၢမ်းလဵဝ် တီႈဝဵင်းတူၼ်ႈတီးၼႆႉ ၼမ်ႉမၼ်းၸၢၵ်ႈ ၼမ်ႉမၼ်းၵႃး ႁႃသိုဝ်ႉယၢပ်ႇ၊ လႆႈၶဝ်ႈထႅဝ်ၵၼ်ပႂ်ႉထႅမ်။ ႁဵတ်းႁႂ်ႈသဵၼ်ႈတၢင်းၵိတ်ႇၵႅပ်ႈ။ ရူတ်ႉၵႃးၵႂႃႇမႃး ဝႄႈၵၼ်ယၢပ်ႇ။ ၵမ်ႈၽွင်ႈသမ်ႉ ႁေႃႈဝႆးဢမ်ႇၸွမ်းပၵ်းပိူင် ၵၢၼ်ၶပ်းႁေႃႈရူတ်ႉ ၵႃး ထိုင်တီႈၵႆႉမီးလွင်ႈၽႃႇၺႃးတုမ်ႉတိူဝ်ႉၵၼ်။

တီႈဝဵင်းလူင်တူၼ်ႈတီးၼႆႉ တႄႇဢဝ်လိူၼ်ၵျႅၼ်ႊၼိဝ်ႊရီႊ ပီၼႆႉမႃး တေႃႇထိုင်လိူၼ်ၵျုၼ်ႊ ၶၢဝ်းတၢင်း 6 လိူၼ်ၼႆႉ ယွၼ်ႉရူတ်ႉၵႃးၽႃႇၵၼ်သေ လူႉတၢႆ မီး 140 ၵေႃႉယဝ်ႉ ၸုမ်းၸွႆႈထႅမ် လွင်ႈမၢတ်ႇၸဵပ်းလူႉတၢႆ လၢတ်ႈၼင်ႇၼႆ။

 တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)