ပျီႇတူႉၸိတ်ႉပဢူဝ်း ၵဵပ်းသိုၵ်းမႂ်ႇ တီႈဝဵင်းသီႇသႅင်ႇ 10 ဝၼ်း ၼိုင်ႈပွၵ်ႈ တီႈၵေႇသုတ်း ၵဵပ်း 5 ၵေႃႉ ၵူၼ်းမိူင်းထူပ်းတၢင်းယၢပ်ႇၽိုတ်ႇ ဢမ်ႇၸၢင်ႈၵႂႃႇဢဝ်လႂ်မႃးပၼ်။
ယၢမ်းလဵဝ် တီႈဝဵင်းသီႇသႅင်ႇၼႆႉ သဵင်ၵွင်ႈယဵၼ်ဝႆႉယူႇသေတႃႉ သိုၵ်းသွင်ၾၢႆႇၶဵင်ႈၶႅင် ၵၢၼ်သိုၵ်းၵၼ်ဝႆႉ ၸွမ်းႁိမ်းႁွမ်းဝဵင်းၸိူဝ်းၼၼ်ႉ၊ ပျီႇတူႉၸိတ်ႉပဢူဝ်း တဵၵ်းၸႂ်ႉၵူၼ်းပၢႆႈၽေးသိုၵ်းဝႆႉ ၸိူဝ်းၼၼ်ႉ ပွၵ်ႈယူႇ ၶိုၼ်းဝၢၼ်ႈသူၼ်ႁိူၼ်းယေးသေ ႁႂ်ႈၸတ်းၵဵပ်း ၵူၼ်းၼုမ်ႇၼႂ်းဝၢၼ်ႈၼႂ်းဢိူင်ႇ သူင်ႇႁႅင်းသိုၵ်းပၼ်ၶဝ်။
ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ပျီႇတူႉၸိတ်ႉပဢူဝ်း ၸႂ်ႉၵူၼ်းပၢႆႈၽေးသိုၵ်း မႃးယူႇၶိုၼ်းႁိူၼ်း။ ၽႂ်ဢမ်ႇပွၵ်ႈယူႇၶိုၼ်း တေယိုတ်းဢဝ်လၢႆလိၼ်သူၼ်ႁႆႈၼႃး ႁိူၼ်းယေးၼႆလႄႈ ၽိူဝ်ႇၵူၼ်းဝၢၼ်ႈ ပွၵ်ႈယူႇၶိုၼ်းႁိူၼ်းသမ်ႉ မႃးၵဵပ်းၵူၼ်းသိုၵ်းမႂ်ႇ 10 ဝၼ်း ၼိုင်ႈပွၵ်ႈ။ ၼိုင်ႈပွၵ်ႈ ဢမ်ႇယွမ်း 5 ၵေႃႉ။ ဢမ်ႇမီးၵူၼ်းသမ်ႉ ၸႂ်ႉသႂ်ႇငိုၼ်း ၵူၼ်းမိူင်းယၢပ်ႇ ၵိၼ်းၸႂ်” – ဝႃႈၼႆ။
ဢၼ်ၸုမ်းပဢူဝ်းပျီႇတူႉၸိတ်ႉ ၵဵပ်းသိုၵ်းမႂ်ႇတီႈဝဵင်းသီႇသႅင်ႇၼႆႉ ပွၵ်ႈၼႆႉ ပဵၼ်ပွၵ်ႈၵမ်း 3 ယဝ်ႉ။ သင်ဝႃႈ ဢမ်ႇပၼ် ၵူၼ်းလႆႈၸိုင် တေလႆႈသႂ်ႇငိုၼ်း ၵမ်ႉၸွႆႈပၼ် တႃႇၸႂ်ႉၸၢႆႇၼႂ်းၵၢၼ်သိုၵ်း ႁိူၼ်းၼိုင်ႈလင် တေလႆႈသႂ်ႇ ဢမ်ႇယွမ်း 5 မိုၼ်ႇပျႃး ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈၼင်ႇၼႆ။
တႄႇဝၼ်းတီႈ 23/01/2024 မႃး သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ပိုတ်းယိုဝ်းတိုၵ်းတေႃးၵၼ်တင်း သိုၵ်းပဢူဝ်း PNLA လႄႈ ၵူၼ်းမိူင်းဝဵင်းသီႇသႅင်ႇ လႆႈပၢႆႈၽႄးသိုၵ်း။ ပေႃးသဵင်ၵွင်ႈယဵၼ် ၵူၼ်းပၢႆႈၽေးသိုၵ်းသမ်ႉပွၵ်ႈ ၶိုၼ်းႁိူၼ်းယေး။ ပၢႆႈပၢႆႈပွၵ်ႈပွၵ်ႈ တေႃႇထိုင်ယၢမ်းလဵဝ် ဢမ်ႇၸၢင်ႈယူႇသဝ်း ႁဵတ်းၵၢၼ်ႁႃၵိၼ်လဵင်ႉတွင်ႉ။
မိူဝ်ႈႁူဝ်လိူၼ်ၼႆႉသမ်ႉ ၸုမ်းပျီႇတူႉၸိတ်ႉပဢူဝ်း လၢတ်ႈဝႃႈ တေပဵၼ်ပၢင်တိုၵ်းၼႆသေ တဵၵ်းၸႂ်ႉၵူၼ်းၼႂ်းဝဵင်းပၢႆႈ။ ဝၢႆးလင် ၵူၼ်းဝၢၼ်ႈပၢႆႈ ၽူႈလၵ်ႉသမ်ႉယႃႉၽၵ်းတူႁိူၼ်းယေးသေ ၶဝ်ႈဢဝ်ၶူဝ်းၶွင် ၸိူဝ်းမီးၵႃႈၶၼ်ၵႂႃႇထႅင်ႈ။ ၵူၼ်းမိူင်း ဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉ။ ၵႃႈၶၼ်ၶူဝ်းၵုၼ်ႇၵိၼ်ယႅမ်ႉသမ်ႉ ၵႃႈယႂ်ႇ၊ ပၢႆးမၢၵ်ႈမီးတူၵ်း၊ ၶူဝ်းၶွင်ၼႂ်းသူၼ် ၼႂ်းႁႆႈသမ်ႉ ဢမ်ႇမီးၵႃႈၶၼ်။
ၵွပ်ႈၼႆလႄႈ ဢၼ်ၸုမ်းပျီႇတူႉၸိတ်ႉပဢူဝ်းလၢတ်ႈဝႃႈ ဢမ်ႇမီးၵူၼ်းႁႂ်ႈသူင်ႇငိုၼ်း ၼႆၼၼ်ႉၵေႃႈ ပဵၼ်ဢၼ်ၵိၼ်း ၸႂ် တွၼ်ႈတႃႇၵူၼ်းၼႂ်းပိုၼ်ႉတီႈတႄႉတႄႉ ဝႃႈၼႆ။
ၼၢင်းယိင်း ၵူၼ်းမိူင်း ဝဵင်းသီႇသႅင်ႇ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၵူၼ်းၸိူဝ်း ဢမ်ႇပဵၼ်လႆႈတႃႇသႂ်ႇ ငိုၼ်း ၼၼ်ႉသမ်ႉ တၢမ်တူဝ်တေလႆႈၵႂႃႇႁၢပ်ႇၵၢၼ်သိုၵ်း။ ပေႃႈမႄႈ ၵူၼ်းၼုမ်ႇဢွၼ်ၵၼ်ႁွင်ႉႁွင်ႉႁႆႈႁႆႈ ၵႂႃႇယွၼ်းၼွမ်း ႁႂ်ႈသိုၵ်းလူတ်းယွၼ်ႇပၼ် ၵေႃႈဢမ်ႇလႆႈ – ၵႃႈလႆႈသူင်ႇလုၵ်ႈလၢင်းၵူၼ်းႁိူၼ်းၵႂႃႇပၼ်။ ၼွၵ်ႈလိူဝ် ၸွႆႈလူႇၸွႆႈတၢၼ်းပၼ် ယွၼ်းသူးပၼ်ႁႂ်ႈလွတ်ႈၽေးဢမ်ႇၸၢင်ႈႁဵတ်းႁိုဝ်”- ဝႃႈၼႆ။
တီႈဝဵင်းသီႇသႅင်ႇၼႆႉ ပၢင်တိုၵ်း ဢမ်ႇပဵၼ်ယႂ်ႇလူင် ႁၢဝ်ႈႁႅင်းၼႆသေတႃႉ သိုၵ်းမၢၼ်ႈ လၢမ်းလိမ်းပွႆႇမၢၵ်ႇလူင်လႄႈ တူၵ်းသႂ်ႇႁိူၼ်းယေးၵူၼ်းမိူင်း မၢတ်ႇၸဵပ်းလူႉတၢႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ