ၾူၼ်တူၵ်းထပ်းၵၼ်လၢႆလၢႆဝၼ်းလႄႈ ၼမ်ႉႁူၺ်ႈ ၼမ်ႉလွႆၼွင်း မႄႈၼမ်ႉၵႄးၼမ်ႉ လူၼ်ႉၾၢင်ႇ ထူမ်ႈၶဝ်ႈၼႂ်းဝၢၼ်ႈၼႂ်းသူၼ် ၵူၼ်းမိူင်း ၸိုင်ႈတႆးပွတ်းၸၢၼ်း လၢႆလၢႆဝဵင်း ။

တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၼၼ်ႉ ၾူၼ်တူၵ်း ၶၢဝ်းတၢင်း 10 ဝၼ်းပၢႆယဝ်ႉလႄႈ ၼမ်ႉလၢတ်ႈ ၼွင်းလူၼ်ႉၾင်ႇ ၶဝ်ႈၼႂ်းပွၵ်ႉ (1) ၵူၼ်းပိုၼ်ႉတီႈ လႆႈၶၢႆႉၶူဝ်းၶွင် ပၢႆႈသွၼ်ႈယူႇသဝ်း တီႈလွတ်ႈၽေး။

ၵူၼ်းၼမ်ႉၸၢင် ၵေႃႈၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၾူၼ်တူၵ်းဢမ်ႇထၢတ်ႇ မီးၸမ် 10 ဝၼ်းယဝ်ႉ။ ၼမ်ႉၵေႃႈၶိုၼ်ႈ ၵူႈဝၼ်း။ ၵူၼ်းၼႂ်းပိုၼ်ႉတီႈၵေႃႈ လႆႈၶၢႆႉၶူဝ်း ၶၢႆႉလဵင်း။ ႁူင်းႁဵၼ်းၸၼ်ႉငဝ်ႈ ပွၵ်ႉ (1) ၵေႃႈ ၸမ်တေထူမ်ႈယဝ်ႉ။ ၼမ်ႉထူမ်ႈၼႆႉ ပဵၼ်ၵူႈပီယူႇသေတႃႉ ပီၼႆႉတႄႉ ထူမ်ႈႁႅင်းဝႆႉ” – ဝႃႈၼႆ။

ယွၼ်ႉၼမ်ႉထူမ်ႈသေ လွင်ႈၵူၼ်းမိူင်းမၢတ်ႇၸဵပ်းလူႉတၢႆတႄႉ ဢမ်ႇမီး။

မိူၼ်ၼႆၼင်ႇၵဝ်ႇ ၼႂ်းထုင်ႉပူင်း တီႈဢၼ်ၶဝ်ႈႁွမ်ၶဝ်ႈၶႅမ်ႉ ဢွၵ်ႇၼမ်သုတ်း ၼႂ်းမိူင်းတႆးၵေႃႈ ၼမ်ႉတၢမ်ၽၢၵ်ႇၼွင်းလူၼ်ႉၾင်ႇထူမ်ႈ 19 ဝၢၼ်ႈ ဢၼ်ယူႇၸွမ်း သွင်ၾင်ႇမႄႈၼမ်ႉ။ ထူမ်ႈၶဝ်ႈ ၼႂ်းသူၼ်ႁႆႈလွၵ်းၼႃးလႄႈႁိူၼ်းယေး ၵူၼ်းမိူင်း။

ၸဝ်ႈၼႃး ထုင်ႉပူင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၼမ်ႉထူမ်ႈၼႃးၼႆႉ ထူမ်ႈၵူႈဝၢၼ်ႈယဝ်ႉ။ တီႈဝၢၼ်ႈသၢႆလႄး၊ ၼွင်ၸၢင်ႉ၊ ၵုၼ်သၢႆးတင်း ဝၢၼ်ႈပူင်း ၸိူဝ်းၼႆႉ ၼမ်ႉထူမ်ႈၼမ်။ ထူမ်ႈတူင်ႈၼႃး ႁဵင်ဢေႊၶိူဝ်ႊပၢႆ။ ပဵၼ်ၽွင်းႁူင်းၶဝ်ႈသုၵ်းလႄႈ ပေႃးဢမ်ႇၼႅတ်ႈဢဝ် ၶဝ်ႈၸၢင်ႈငူင်းၼေႃႇမႃး။ မၢင်ၸိူဝ်း ဢၼ်ပႆႇဢဝ်လႆႈၼၼ်ႉၵေႃႈ ၵႃႈလႆႈပွႆႇပႅတ်ႈ။ ပီ ၼႆႉၵေႃႈ လူႉသုမ်းၼမ်တႄႉတႄႉ”- ဝႃႈၼႆ။

ၼွၵ်ႈလိူဝ် တီႈထုင်ႉပူင်းယဝ်ႉ တီႈဝဵင်းမိူင်းၼၢႆး ယွင်ၶဝ်ႈလူင်ထီႉသွင် မိူင်းတႆးပွတ်းၸၢၼ်း ၼၼ်ႉၵေႃႈ ၼမ်ႉႁူၺ်ႈၼမ်ႉလွႆၼွင်း ၼမ်ႉႁွင်ႈၵေႃႈ လူၼ်ႉၾင်ႇသေ ထူမ်ႈတိူၵ်ႇႁႆႈလွၵ်းၼႃးၵူၼ်းမိူင်း လူႉသုမ်း မွၵ်ႈ 7000 ဢေႊၶိူဝ်ႊ၊ တေႃႇထိုင်ဝၼ်းတီႈ 19/08/2024 ၼႆႉ ၼမ်ႉယင်းပႆႇယွမ်းလူင်း။ ပီၼႆႉၵေႃႈ သုမ်းတူင်ႈၶဝ်ႈတင်းၼမ် ဝႃႈၼႆ။

တီႈဝဵင်းလၢင်းၶိူဝ်း ၸိုင်ႈတႆး ပွတ်းၸၢၼ်းၵေႃႈ ၼမ်ႉတဵင်းၼွင်းယိုင်ႈလႆႈ 2-3 ဝၼ်းယဝ်ႉ။ ဝၼ်းတီႈ 18/08/2024 ယၢမ်းၵၢင်ၶမ်ႈ ၼမ်ႉလူၼ်ႉၾင်ႇၼွင်းၶဝ်ႈၼႂ်းပွၵ်ႉ တီႈတႅမ်ႇတီႈယၢၼ်း ၸိူဝ်းယူႇႁိမ်းၸမ် ၾင်ႇၼမ်ႉ။ မိူၼ်ၼင်ႇ ဝၢၼ်ႈတႃႈ၊ ဝၢၼ်ႈပၢင်သၼွင်း၊ ဝၢၼ်ႈမၢၵ်ႇပိၼ်း၊ ဝၢၼ်ႈလူင်ပွၵ်ႉဢွၵ်ႇ၊ ဝၢၼ်ႈၵၢတ်ႇလႄႈ ဝၢၼ်ႈပုင်းထုၼ် ၸိူဝ်းၼႆႉ။ 

လိူဝ်ၼၼ်ႉ ဝၢၼ်ႈမႆႉဢုၼ်လဝ်း ၼႃးၵူင်း ၸိူဝ်းယူႇ တွၼ်ႈတၢင်းတႂ်ႈ ႁိမ်းၸမ်ၼမ်ႉတဵင်း တေၶဝ်ႈၼမ်ႉၶူင်း ၼၼ်ႉ ၵေႃႈ ၼမ်ႉထူမ်ႈႁႅင်း မိူၼ်ၵၼ်။ တေႃႇထိုင်ဝၼ်းတီႈ 19/08/2024 ၼႆႉ ၾူၼ်တူၵ်းယင်းပႆႇထၢတ်ႇလႄႈ ၵူၼ်းမိူင်းမႆႈ ၸႂ် ၵူဝ်ၼမ်ႉၶိုၼ်ႈသုင် မိူၼ်မိူဝ်ႈ 20 ပီပူၼ်ႉမႃးၼၼ်ႉ ၵူၺ်းယဝ်ႉ ဝႃႈၼႆ။

ၸုၸုၸၢၼ်ႇ ၽူႈလူင်ႉလႅၼ်ႇ ၾၢႆႇၾိင်ႈၾႃႉရႃႇသီႇတႄႉ ပိုၼ်ၽၢဝ်ႇဝႆႉဝႃႈ – တေႃႇထိုင်ဝၼ်းတီႈ 22 လႄႈ 23 /08/2024 ၼႆႉ ၾူၼ်တေတူၵ်းႁႅင်း ၼႂ်းၸႄႈတွၼ်ႈၵၢတ်ႇလေႃႉ၊ ၸႄႈတွၼ်ႈတူၼ်ႈတီးလႄႈ ၸႄႈတွၼ်ႈလၢင်းၶိူဝ်း၊ ၸႄႈတွၼ်ႈမိူင်းသၢတ်ႇ၊ တႃႈၶီႈလဵၵ်း၊ ၵဵင်းတုင် ၸိူဝ်းၼႆႉလႄႈ ၼမ်ႉႁွင်ႈၼမ်ႉၵႄး ၸၢင်ႈၼွင်းလူၼ်ႉၾင်ႇၶဝ်ႈထူမ်ႈ ၼႂ်းဝၢၼ်ႈၼႂ်းဝဵင်း။ ႁႂ်ႈလႆႈဢွၼ်ၵၼ် ၾၢင်ႉယူႇၾၢင်ႉၵိၼ်ၵၼ် – ဝႃႈၼႆဝႆႉ။