သိုၵ်းမၢၼ်ႈလၢမ်းလိမ်းယိုဝ်းၵွင်ႈလူင် တူၵ်းသႂ်ႇႁိူၼ်းယေးၵူၼ်းမိူင်းဝဵင်းၼမ်ႉလၼ်ႈ လူႉၵွႆ 2 လင် ၵူၼ်းဝၢၼ်ႈမၢတ်ႇၸဵပ်းၸၢၵ်ႇမၢၵ်ႇၵေႃႉၼိုင်ႈ လႆႈယူတ်းယႃတူဝ်ဝႆႉ။
ဝၼ်းတီႈ 16/08/2024 ယၢမ်းၵၢင်ဝၼ်းမွၵ်ႈ 3 မူင်း သိုၵ်းမၢၼ်ႈယူႇတၢင်းၵွင်းသူၼ်ၼဵင်ႈလွႆလဵၵ်း ဢၼ်မီးၵွင်းမူးၼၼ်ႉသေ ယိုဝ်းၵွင်ႈလူင်ၵႂႃႇ တူၵ်းသႂ်ႇႁိူၼ်းယေးၵူၼ်းဝၢၼ်ႈတၢင်းပွၵ်ႉၵွင်းလၢင်း လူႉၵွႆ 2 လင်။
ၵူၼ်းမိူင်းဝဵင်းၼမ်ႉလၼ်ႈလၢတ်ႈတီႈၽူႈတွႆႇႁွၵ်ႈဝႃႈ- “မၢတ်ႇၸဵပ်းၵေႃႉၼိုင်ႈပဵၼ်ၼၢင်းယိင်းဢွၼ်ႇ။ ယၢမ်းလဵဝ်ၵႂႃႇယူတ်းယႃတူဝ်ဝႆႉတီႈတူၼ်ႈတီး။ သိုၵ်းမၢၼ်ႈယိုဝ်းၵွင်ႈလူင်ႁိမ်းဝၢၼ်ႈၵူႈဝၼ်းလႄႈ ၵူၼ်းမိူင်းဝဵင်းၼမ်ႉလၼ်ႈ ဢွၼ်ၵၼ်ပၢႆႈၵႂႃႇယူႇတၢင်ႇတီႈတၢင်ႇဝဵင်းယူႇယွတ်းယွတ်းယႅတ်းယႅတ်းၸဵမ်လႂ်ယဝ်ႉ။ ဝၢႆးလင်မၢၵ်ႇမႃးတူၵ်းသႂ်ႇၼႆႉတႄႉ ဢၼ်ပၢႆႈဢွၵ်ႇမီးၵူႈဝၼ်း ။ ၽႂ်ဢမ်ႇႁတ်းယူႇယဝ်ႉ။ ၵွပ်ႈဝႃႈ ယူႇၵေႃႈဢမ်ႇမီးလွင်ႈလွတ်ႈၽေး။ ဢမ်ႇမီးၽႂ်ၸုမ်းလႂ်မႃးၵႅတ်ႇၶႄပၼ်ၵူၼ်းမိူင်း”- ဝႃႈၼႆ။
သဵင်ယိုဝ်းမၢၵ်ႇလူင်ၼႆႉ ယူႇတီႈၼမ်ႉလၼ်ႈသေ ငိၼ်းယူႇၵူႈမိုဝ်ႉၵူႈဝၼ်း။ ဢၼ်သိုၵ်းမၢၼ်ႈယိုဝ်းမၢၵ်ႇမႃးတူၵ်းတီႈဝၢၼ်ႈၵွင်းလၢင်းၼႆႉသိုၵ်းမၢၼ်ႈတီႈဝဵင်းၼမ်ႉလၼ်ႈသမ်ႉယိုဝ်းၵႂႃႇၶိုၼ်း ။ ၵႂႃႇတူၵ်းတၢင်းဝၢၼ်ႈၵုင်းသႃႇၾၢႆႇတူၵ်းမိူင်းၶိူဝ်း ၵႂႃႇတူၵ်းတၢင်းလႅၼ်ၶႅၼ်ႈဢိူင်ႇသီႇထွၵ်ႈ လႄႈ မိူင်းၶိူဝ်း။
ၵူၼ်းၼမ်ႉလၼ်ႈလၢတ်ႈထႅင်ႈဝႃႈ-“ မိူဝ်ႈဝႃးၵေႃႈငိၼ်းသဵင် မၢၵ်ႇ ၵူၺ်းၺႃးတီႈလႂ်တေ့ ဢမ်ႇႁူႉ။ တီႈၼမ်ႉလၼ်ႈၼႆႉတႄႉ ၸဵမ်လုၵ်ႈဢွၼ်ႇၵူၼ်းထဝ်ႈ ဢွၼ်ၵၼ်ပၢႆႈၵႂႃႇယူႇဝႆႉတၢင်ႇတီႈတၢင်ႇတၢင်းယဝ်ႉ။ ၵမ်ႈၽွင်ႈလူင်းၵႂႃႇတၢင်းလၢႆးၶႃႈ မိူင်းၵိုင်။ ၵမ်ႈၽွင်ႈၵႂႃႇထိုင်တူၼ်ႈတီးၸိူဝ်းၼႆႉၵေႃႈမီး ။ ၵူၼ်းလူင်ၵေႃႈဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉ၊ လုၵ်ႈဢွၼ်ႇၵေႃႈဢမ်ႇၸၢင်ႈလႆႈႁဵၼ်းလိၵ်ႈလၢႆးလီလီ ”- ဝႃႈၼႆ။
ဝၼ်းၽတ်း 15/08/2024 ပူၼ်ႉမႃးၼႆႉၵေႃႈ သိုၵ်းမၢၼ်ႈလုၵ်ႉၼမ်ႉလၼ်ႈမႃး ဢၢင်ႈမႃးထႅမ်ႁႅင်းသိုၵ်းတီႈၼွင်ၵေႃႈ ၽွင်းထိုင်တီႈဝၢၼ်ႈၵွင်းႁၵ်ႉ ၾၢႆႇၸၢၼ်းၼႃးမၢၵ်ႇၶေႃ ၼၼ်ႉ ၺႃးသိုၵ်းၵဝ်ႈၵၢင်ႉ လူမ်ႇတိုၵ်း ၵႃးသိုၵ်းမၢၼ်ႈၵွႆ လမ်းၼိုင်ႈ ၵူၼ်းသိုၵ်းမၢၼ်ႈတၢႆၼမ်၊ ၵႃးသိုၵ်းမၢၼ်ႈတႃႇသွင်လမ်းတႄႉထွႆမိူဝ်းတၢင်းၼမ်ႉလၼ်ႈၶိုၼ်း- ၵူၼ်းမိူင်းၼႂ်းပိုၼ်ႉတီႈလၢတ်ႈၼင်ႇၼႆ။
ယၢမ်းလဵဝ် တီႈဝဵင်းသီႇပေႃႉ သိုၵ်းတဢၢင်း(ပလွင်ႈ) TNLA လေႃႇတိုၵ်းတပ်ႉသိုၵ်းမၢၼ်ႈ ၶလယ 23 ၊ ၶမယ 503-504 ယူႇႁၢဝ်ႈႁႅင်း။
တႅမ်ႈ-ယိင်းသဵဝ်ႈၶၢဝ် ( ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ