ၵူၼ်းပၢႆႈၽေးသိုၵ်း ပွတ်းႁွင်ႇ ဢၼ်မႃးသွၼ်ႈဝႆႉ တီႈဝဵင်းတႃႈၶီႈလဵၵ်းၼႆႉ ဢွၼ်ၵၼ်ႁဵတ်းၶဝ်ႈၶူဝ်ႈ သႂ်ႇၵွင်ႇသေ ၸႃႇၵပၼ် ၵူၼ်းထူပ်းၽေးၼမ်ႉထူမ်ႈၶိုၼ်း။

ဝၼ်းတီႈ 15/08/2024 ၼႆႉ ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဢွၼ်ႁူဝ်သေ ႁူမ်ႈလူၺ်ႈ ၸုမ်း ၵူၼ်းၼုမ်ႇတႆး TYO လႄႈ New Power ဢဝ်ၶဝ်ႈၵွင်ႇ ဢၼ်ၵူၼ်းပၢႆႈၽေးသိုၵ်း တီႈႁူင်းႁေႃး ၵေႃလိၵ်ႈလၢႆး ႁဵတ်းၸႃႇၵပၼ်ၼၼ်ႉ မႃးၸႅၵ်ႇပၼ် ၵူၼ်းထူပ်းၽေးၼမ်ႉထူမ်ႈ တီႈပွၵ်ႉသၼ်သၢႆး၊ မႄႈၶၢဝ် ၼႂ်းဝဵင်း တႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး တႃႇၶဝ်ႈၵွင်ႇ 200 ၵွင်ႇပၢႆ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းတႃႈၶီႈလဵၵ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ယူႇတီႈ ၵူၼ်းပၢႆႈၽေးသိုၵ်းႁဝ်းၶႃႈ တီႈႁူင်းႁေႃး ၵေႃလိၵ်ႈလၢႆးၼႆႉသေ ႁူမ်ႈၵၼ် တူမ်ႈႁုင် ႁဵတ်းၶဝ်ႈၵွင်ႇ ၸႃႇၵပၼ် ၵူၼ်းထူပ်းၽေးၼမ်ႉထူမ်ႈ တီႈဝဵင်းတႃႈၶီႈလဵၵ်းၼႆႉၶိုၼ်း။ ယွၼ်ႉဝႃႈ ၶဝ်ႈသၢၼ်ၶဝ်ႈသွႆး ၶွင်ၵိၼ်ယႅမ်ႉ တီႈပိူၼ်ႈမႃးၸွႆႈဝႆႉ တီႈႁူင်းႁေႃးၼႆႉ ၼမ်ဝႆႉလႄႈ ၸင်ႇဢဝ်ဢၼ်ၼႆႉသေ တူမ်ႈႁုင်ၸႃႇၵလဵင်ႉလူၶိုၼ်း တႃႇၶဝ်ႈၵွင်ႇ 211 ၵွင်ႇ”- ဝႃႈၼႆ။

ဢိင်ၼိူဝ် လွင်ႈၼႆႉသေ ယူႇတီႈ ၵေႃလိၵ်ႈလၢႆး တႃႈၶီႈလဵၵ်း လႆႈဢဝ်ၶဝ်ႈၵွင်ႈ 200 ပၢႆၼႆႉ သႂ်ႇႁိူဝ်းသေ လူင်းပိုၼ်ႉတီႈ ၸႃႇၵပၼ် ၵူၼ်းထူပ်းၽေးၼမ်ႉထူမ်ႈၵႂႃႇ။ ယွၼ်ႉဝႃႈ ဢမ်ႇၸၢင်ႈဢွၵ်ႇၵႂႃႇႁႃသိုဝ်ႉၵိၼ် မႃးတူမ်ႈႁုင် ၼႆယဝ်ႉ။  

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈႁူင်းႁေႃး ၵေႃလိၵ်ႈလၢႆး တႃႈၶီႈလဵၵ်းၼႆႉ ယၢမ်းလဵဝ် မီးႁူဝ်ၵူၼ်း 30 ပၢႆ ပဵၼ်ၵူၼ်းမိူင်းလႃႈသဵဝ်ႈ၊ သႅၼ်ဝီလႄႈ ၵျွၵ်ႉမႄး။

“တင်းမူတ်းမီး 50 ပၢႆ ၼႂ်းၼၼ်ႉ တႃႇ 19 ၵေႃႉ ဢွၵ်ႇၵႂႃႇႁဵတ်းၵၢၼ် ယူႇၸွမ်းပီႈၼွင်ႉ ၽႂ်မၼ်း ၸိူဝ်းၼၼ်ႉသေ ယၢမ်းလဵဝ် ၵိုတ်းဝႆႉ ႁူဝ်ၵူၼ်း 30 ပၢႆ တီႈႁူင်းႁေႃး ၵေႃလိၵ်ႈလၢႆးၼႆႉ။ ယၢမ်းလဵဝ် သင်ဝႃႈ ပီႈၼွင်ႉႁဝ်းၶႃႈ တၢင်းပွတ်းႁွင်ႇ ပၢႆႈမႃးထႅင်ႈၸိုင် ႁဝ်းၶႃႈ ယိၼ်းၸူမ်းႁပ်ႉတွၼ်ႈယူႇၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တီႈဝဵင်းတႃႈၶီႈလဵၵ်းၼႆႉ ၼမ်ႉသၢႆၼွင်းထူမ်ႈမႃး ႁိုင် 4 ဝၼ်းယဝ်ႉ ပႆႇယွမ်းလူင်း ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇႁႅင်း မၢင်ဢွင်ႈတီႈ ၼမ်ႉလိုၵ်ႉထိုင်ဢႅဝ် ၸိူဝ်းၼႆႉလႄႈ ၸဵမ်ရူတ်ႉၵႃး ၶူဝ်းႁိူၼ်းယေး ၸိူဝ်းၼႆႉ ၺႃးၼမ်ႉထူမ်ႈ လူႉသုမ်းၵွႆၼမ် ၼႆယဝ်ႉ။