ပေႃးထိုင်ၶၢဝ်းၾူၼ်မႃး ပီလႂ်ၵေႃႈ တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉ ၺႃးၼမ်ႉလုပ်ႇထူမ်ႈ ၵူႈပီ။ ၼႂ်းလိူၼ် ဢေႃႊၵတ်ႊသ်ၼႆႉၵူၺ်း ၼမ်ႉထူမ်ႈယႂ်ႇ 2 ပွၵ်ႈ ပႃးၼႆႉယဝ်ႉ။ ပွၵ်ႈၼႆႉ ၼမ်ႉၼွင်းယႂ်ႇ လိူဝ်ၵဝ်ႇ ၵႄးၼမ်ႉသၢႆ ၼွင်းယႂ်ႇပေႃးတေထူမ်ႈ ၶူဝ်ၶၢမ်ႈလႅၼ်လိၼ်တႆး – ထႆး မၢႆ 1 ။ တႄႇဢဝ်ဝၼ်း တီႈ 13/08/2024 ၼၼ်ႉမႃး ထိုင်မိူဝ်ႈၼႆႉ ၼမ်ႉပႆႇယွမ်းလူင်း။ ၼိူဝ်တၢင်းလူင်ၵၢင်ဝဵင်း ၸိူဝ်းၼၼ်ႉ ပေႃးပဵၼ်ၼမ်ႉပဵၼ်ၼွင်ၵႂႃႇမူတ်း။ ရူတ်ႉၵႃးၵႂႃႇမႃး ဢမ်ႇလႆႈ တႃႇ ၵႂႃႇမႃးၸူးၵၼ်ၼႆႉ ပေႃးလႆႈၸႂ်ႉတၢင်းလတ်း။ ႁၢၼ်ႉၶၢႆၶူဝ်းၵုၼ်ႇၵူႈသႅၼ်းသႅၼ်း ၺႃးၼမ်ႉထူမ်ႈဝႆႉ ဝႃႈၼႆ။

ၾူၼ်မႃးထပ်းၵၼ် လၢႆဝၼ်းသေ တႄႇဢဝ်ဝၼ်းတီႈ 13/08/2024 ၼၼ်ႉမႃး ၼမ်ႉႁူၺ်ႈၼမ်ႉလွႆ ယိုင်ႈၼွင်းလူၼ်ႉ ၾင်ႇ ၵႄးၼမ်ႉသၢႆသေ လုပ်ႇထူမ်ႈပႃးႁိူၼ်းယေး ႁၢၼ်ႉၶၢႆၵုၼ်ႇၵႃႉ တၢင်းၶၢႆ ၵူၼ်းမိူင်းတႃႈၶီႈလဵၵ်း ၸိူဝ်းယူႇၵိၼ်ၸမ် ၵႄးၼမ်ႉသၢႆလႄႈ ပိုၼ်ႉတီႈတႅမ်ႇ ၸိူဝ်းၼၼ်ႉ ၵူၼ်းမိူင်းယၢပ်ႇၽိုတ်ႇႁႅင်းဝႆႉ ဝႃႈၼႆ။

မိူဝ်ႈဢွၼ်တၢင်း ပေႃးၼမ်ႉထူမ်ႈတႃႈၶီႈလဵၵ်းၼႆ ၵမ်ႈၼမ် တေပဵၼ်ၸွမ်းႁိမ်းၶူဝ်ၶၢမ်ႈလႅၼ်လိၼ် တႃႈၶီႈလဵၵ်း – မႄႈသၢႆ ၶူဝ်မၢႆ 1 ၼၼ်ႉၵူၺ်း ဢၼ်လႆႈၶၢၼ်ၸႂ်ၸွမ်းၼမ်ႉထူမ်ႈ။ ပီၼႆႉသမ်ႉ ၵူၼ်းမိူင်း ၸိူဝ်းယူႇႁိမ်းၶူဝ်ၶၢမ်ႈလႅၼ်လိၼ် မၢႆ 2 ၵေႃႈ ၺႃးၼမ်ႉထူမ်ႈ ၵူၼ်းမိူင်းယူႇႁိမ်းၼၼ်ႉ ၵႂႃႇမႃးၸူးၵၼ်ပေႃးယၢပ်ႇ ၵူၼ်းတႃႈၶီႈလဵၵ်း လၢတ်ႈၼႄဝႆႉၼင်ႇ ၼႆ –

“ပေႃးတူၺ်း ၼႂ်းၶၢဝ်ႇငၢဝ်းၾူၼ်လူမ်းသမ်ႉဝႃႈ ၾူၼ်တေမႃးယူႇတိၵ်းတိၵ်းၼႆၶႃႈဢေႃႈ။ မိူဝ်ႈၼႆႉတႄႉ လႅတ်ႇႁိူဝ်ႈမႃးဢိတ်းယဝ်ႉ ၵူၺ်းၵႃႈ ၼႃႈၾႃႉတႄႉ ၵၢမ်ႈဝႆႉယူႇ။ ပေႃးၾူၼ်မႃးတိၵ်းတိၵ်းတႄႉ ၼမ်ႉပႆႇၸၢင်ႈယွမ်းၶႃႈယူဝ်ႉ”- ဝႃႈၼႆ။

ၼႂ်းပီ 2024 ၼႆႉ လႆႈဝႃႈ ၼမ်ႉၼွင်းထူမ်ႈႁႅင်းသေၵူႈပီ ႁိူၼ်းဢၼ်ၼမ်ႉဢမ်ႇတွၼ်ႉထူမ်ႈၵေႃႈ ပီၼႆႉ ၺႃးၼမ်ႉၼွင်းထူမ်ႈ။ မိူၼ်ၼင်ႇ ပွၵ်ႉပုင်းထုၼ် ၊ ပွၵ်ႉတႃႈလေႃႉ ၊ ပွၵ်ႉမၢၵ်ႇၵႃႇႁူဝ်ၶမ်း ၊ ပွၵ်ႉသၼ်သၢႆးလႄႈ ၸွမ်းသဵၼ်ႈတၢင်းလူင် ၼႂ်းၵၢင်ဝဵင်း ၊ ပွၵ်ႉမႄႈၶၢဝ် ၸိူဝ်းၼႆႉ ၺႃးၼမ်ႉလုပ်ႇယိုင်ႈၶဝ်ႈ ၼႂ်းႁၢၼ်ႉ ၶၢႆၵုၼ်ႇၵူႈသႅၼ်းသႅၼ်း ၸဝ်ႈႁၢၼ်ႉသမ်ႉ ပေႃးလႆႈပိၵ်ႉဢိုတ်း ဢမ်ႇၸၢင်ႈၵႃႉၶၢႆသင်။

ယွၼ်ႉၼမ်ႉၼွင်းထူမ်ႈ သဵၼ်ႈတၢင်းလူင်ၵၢင်ဝဵင်း ၸိူဝ်းၼၼ်ႉလႄႈ ၵူၼ်းၸိူဝ်းလူဝ်ႇႁႃသိုဝ်ႉႁႃၶၢႆ ၸွမ်းၾင်ႇတၢင်းလူင် ၸိူဝ်းၼၼ်ႉ ထူပ်းတၢင်းယၢပ်ႇတႄႉတႄႉ။ ယွၼ်ႉဝႃႈ ၵမ်ႈၼမ် ႁၢၼ်ႉၶၢႆၵုၼ်ႇၵူႈ သႅၼ်းသႅၼ်းၼႆႉ ယူႇတိတ်းၸပ်း ၵၼ် တၢင်းသဵၼ်ႈတၢင်းလူင်။

ၵူၼ်းမိူင်း ပေႃးလႆႈလတ်းၵႂႃႇတၢင်းဢၼ်ၼမ်ႉဢမ်ႇထူမ်ႈ မိူၼ်ၼင်ႇ သဵၼ်ႈတၢင်းႁွပ်ႈဝဵင်း ၸိူဝ်းၼၼ်ႉ ၵူၺ်းၵႃႈ တၢင်းသမ်ႉၵႅပ်ႈ ရူတ်ႉၵႃးသမ်ႉၼမ် ရူတ်ႉၵႃးၵိုတ်းၶမ်ပဵၼ်ထႅဝ်ယၢဝ်း။ တႃႇတေဢွၵ်ႇမႃးၸူး တၢင်းလူင်ၼႆႉ ယၢပ်ႇဝႃႈယၢပ်ႇၼႆ ၵူၼ်းၼုမ်ႇတႃႈၶီႈလဵၵ်း လၢတ်ႈဝႆႉလွင်ႈယၢပ်ႇၽိုတ်ႇၼင်ႇၼႆ။

မိူၼ်ၼင်ႇ ၵၢတ်ႇသၼ်သၢႆး ၸိူဝ်းၼၼ်ႉၵေႃႈ ၼမ်ႉထူမ်ႈၶဵင်ႇတီႈဝၢင်းၶၢႆၵၢတ်ႇ ၸိူဝ်းၼၼ်ႉလႄႈ ၵူၼ်းၵႃႉ ပေႃးလႆႈလႄႇႁႃ ၶၢႆႉၶၢႆတီႈလွတ်ႈၽေး။ ယွၼ်ႉၼမ်ႉၼွင်းသေ ပေႃးတေဢမ်ႇၵႃႉ ဢမ်ႇၶၢႆၵေႃႈသမ်ႉ ၵူဝ်ဢမ်ႇမီးငိုၼ်း ၵႃႈၸႂ်ႉ ၸၢႆႇၸွမ်းဝၼ်းလႂ်ဝၼ်းၼၼ်ႉ ဝႃႈၼႆ။

ၽွင်းၼမ်ႉထူမ်ႈၵေႃႈယၢပ်ႇၸႂ် လႆႈႁိပ်ႈၼႅတ်ႈ တေႃႉၶူဝ်းလဵင်း ပၢႆႈယူႇတီႈသုင် ဢၼ်ယၢၼ်ၵႆၼမ်ႉ။ ဝၢႆးၼမ်ႉလူင်း ၶိုၼ်းယဝ်ႉသမ်ႉ တေလႆႈၶိုၼ်းၶၢႆႉၶူဝ်းၶွင် ၸဝ်ႈၵဝ်ႇမႃးဝႆႉႁိူၼ်းယေးၽႂ်မၼ်းၶိုၼ်း။ လိူဝ်ၼၼ်ႉ သမ်ႉလႆႈပတ်းၽဵဝ်ႈႁဵတ်းလွင်ႈမူတ်းသႂ် ဢမ်ႇယဝ်ႉဢမ်ႇဝၢႆး။ ၼႂ်းႁိူၼ်းယေးလႄႈ ၼိူဝ်တၢင်း ၸိူဝ်းၼၼ်ႉ ပဵၼ်ၵူမ်ႇပဵၼ်ဢုင် ပေႃးဝူၺ်ႇႁင်ႈ ၵႂႃႇမူတ်း။ မၢင်ၸိူဝ်း ၶႂ်ႈႁႂ်ႈၸဵဝ်းမူတ်းသႂ်လႄႈ လႆႈၸၢင်ႈ ၵူၼ်းမႃးႁဵတ်းလွင်ႈမူတ်းသႂ် ၶၢဝ်းယၢမ်းၵေႃႈသဵင်ႈ ငိုၼ်းၵေႃႈသဵင်ႈၸွမ်း။ တႃႇမိူၼ်ၵဝ်ႇၶိုၼ်းၼႆႉ လႆႈၸႂ်ႉၶၢဝ်းယၢမ်း ပဵၼ် 3 – 4 ဝၼ်းၼႆ ၵူၼ်းတႃႈၶီႈလဵၵ်း သိုပ်ႇလၢတ်ႈၼႄဝႆႉၼင်ႇၼႆ –

“ဝၢႆးၼမ်ႉယူပ်ႈလူင်းၶိုၼ်းတႄႉ လႆႈၶိုၼ်းမႄးပတ်းၽဵဝ်ႈႁဵတ်းလွင်ႈမူတ်းသႂ်။ မႄးၶပ်ႉၶိုၼ်း တေႃႉၶိုၼ်း ၶူဝ်းၶွင်ႁိူၼ်းယေးၼႆႉ မွၵ်ႈ 3-4 ဝၼ်းၼႆႉဢေႃႈ။ ၵၢၼ်ၵေႃႈ ဢမ်ႇပဵၼ်ၵႂႃႇၵႂႃႇမႃးမႃးၵေႃႈ ဢမ်ႇလႆႈငိုၼ်းၵေႃႈ ဢမ်ႇမီးလၢႆးလႆႈ။ တေလႆႈသဵင်ႈၵႃႈၸၢင်ႈလုမ်းလႃး ဢၼ်လႆႈပတ်းပတ်းၽဵဝ်ႈ ဢၼ်မႄး ၵုမ်းထႅင်ႈ ၸိူဝ်းၼၼ်ႉ”- ဝႃႈၼႆ။

ပေႃးၼမ်ႉထူမ်ႈ ၼိုင်ႈၵမ်းၸိုင် မိူၼ်ၼင်ႇ ၽၵ်းတူႁိူၼ်း ဢၼ်ဢဝ်လဵၵ်းႁဵတ်းဝႆႉၸိူဝ်းၼၼ်ႉ လူႉၵွႆ ယဝ်ႉၵေႃႈ တင်ႇ ၼင်ႈသူဝ်ႊၽႃႊ၊ ၵူႇၼွၼ်းသႅၼ်းယႂ်ႇ၊ ၶူဝ်းႁိူၼ်းယေး မၢင်သႅၼ်းၶၢႆႉဢမ်ႇလႆႈ ၵႃႈလႆႈပွႆႇၼမ်ႉၸုပ်ႉယမ်းသေ လူႉၵွႆ လူႉသုမ်းပႅတ်ႈလၢႆလၢႆၵေႃႈမီး။ ရူတ်ႉၶိူင်ႈ ၊ ၵႃး ၸိူဝ်းၼႆႉ ဢမ်ႇသၢင်ႇထုၵ်ႇလူႉၵွႆ လႆလွင်ႈၸွမ်းၼမ်ႉၼွင်းၵေႃႈမီး။

ပေႃးၼမ်ႉၼွင်း ယိုင်ႈၶိုၼ်ႈမႃးထႅင်ႈသေၼႆႉတႄႉ ၾႆးၾႃႉၵေႃႈ ၸၢင်ႈမွတ်ႇလႄႈ လွင်ႈတုၵ်ႉယၢၵ်ႈ လူင်ၵူၼ်းမိူင်းတႄႉ လၢတ်ႈပေႃးဢမ်ႇသဵင်ႈယဝ်ႉၼႆ မႄႈႁိူၼ်းၵေႃႉၼိုင်ႈလၢတ်ႈ။

ၼမ်ႉထူမ်ႈႁိူၼ်းယေးလႄႈ တေပၢႆႈပႅတ်ႈ ယူႇဝႆႉတၢင်ႇတီႈၼႆၵေႃႈ သမ်ႉၵူဝ်ၽူႈလၵ်ႉၸၵ်ႉၶုတ်ႈ မႃးသွၵ်ႈတဝ်ဢဝ်ၶူဝ်း ၶွင်ၵႂႃႇ၊ ထႅင်ႈၾၢႆႇၼိုင်ႈၵေႃႈ ၵူဝ်ၶူဝ်းၶွင်ႁိူၼ်းယေး လွင်ႈၸွမ်းၼမ်ႉလႄႈ လႆႈပႂ်ႉတူၺ်းၵေႃႈမီး။ ၸဝ်ႈႁိူၼ်း လႆႈပႂ်ႉတူၺ်းယူႇတႃႇသေႇ ဢၼ်လႆႈမႆႈၸႂ်သေပိူၼ်ႈ ၵူဝ်တၢင်းၵိၼ်ၶၢတ်ႇ  ၵူၼ်းပွၵ်ႉသၼ်သၢႆး ၵေႃႉၼိုင်ႈ လၢတ်ႈၼင်ႇၼႆ။

လွင်ႈၼမ်ႉထူမ်ႈၼမ်ႉၼွင်း ၶဝ်ႈထိုင်ၼႂ်းပွၵ်ႉၼႂ်းယွမ်ႇ တီႈတႃႈၶီႈလဵၵ်းၼႆႉ လၢႆပီပူၼ်ႉမႃးၵေႃႈ တႃႇၵႅတ်ႇၶႄႁႄႉၵင်ႈ ၼႆသေ ၸုမ်းၵဵဝ်ႇၶွင်ႈၶဝ်၊ ႁွင်ႈၵၢၼ်ၾၢႆႇလိူမ်ႈလၢႆႇၶဝ် ယၢမ်ႈၸတ်း ပၢင်ဢုပ်ႇဢူဝ်း တႃႇမူၼ်ႉမႄးၵၼ်မႃးသေတႃႉ ထိုင်မိူဝ်ႈလဵဝ် ပႆႇႁၼ်မီးလွင်ႈၶိုပ်ႈၼႃႈသင်မႃး။ သမ်ႉပဵၼ် ၶၢဝ်းယၢမ်း သိုၵ်းမၢၼ်ႈ ယိုတ်းမိူင်းလႄႈ တႃႇမူၼ်ႉမႄးယိုင်ႈ ၶႅၼ်း တေယၢပ်ႇ။