မိူဝ်ႈၼႆႉ ဝၼ်းတီႈ 04/07/2025 ၾူၼ်တူၵ်းၸွမ်းထုင်ႉသၼ်လွႆလႄႈ ႁဵတ်းႁႂ်ႈၼမ်ႉသၢႆၼွင်းၶိုၼ်ႈ လႆထူမ်ႈၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇသေ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ တုမ်ႉတိူဝ်ႉၵၢၼ်ပၢႆးမၢၵ်ႈမီးလႄႈ လွင်ႈၵႂႃႇမႃးႁႃၵိၼ်လဵင်ႉတွင်ႉ။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈၼႆႉ ၼမ်ႉၶိုၼ်ႈထႅင်ႈ။ ၶိုၼ်ႈၸွမ်းပွၵ်ႉပုင်းထုၼ်၊ သၼ်သၢႆး၊ တႃႈလေႃႉ ၸိူဝ်းၼႆႉ ၼမ်ႉၶိုၼ်ႈယူႇတိၵ်းတိၵ်းယဝ်ႉၶႃႈ။ တီႈၶူဝ်ၶၢမ်ႈလႅၼ်လိၼ်ႁိမ်းၵၢတ်ႇတႃႈလေႃႉၼၼ်ႉၵေႃႈ ၼမ်ႉၶိုၼ်ႈ။ ၼမ်ႉၼႆႉ လႆႈဝႃႈၶိုၼ်ႈဝႆးၵျႃႉ မိူဝ်ႈၵၢင် ၼႂ်မွၵ်ႈ 8 မူင်းၼႆႉ ၼမ်ႉၶိုၼ်ႈၼႆသေတႃႉ ၼႂ်းၵၢင်ဝဵင်းၼႆႉ ၼမ်ႉပႆႇၶိုၼ်ႈၵွၼ်ႇ ၸွမ်းၸိူဝ်းၼႃႈဝတ်ႉသၢႆမိူင်း ၸိူဝ်းၼၼ်ႉၵေႃႈ ၼမ်ႉပႆႇၶိုၼ်ႈ။ ၽိူဝ်ႇထိုင်ၶၢဝ်းယၢမ်းမွၵ်ႈ 11 မူင်းၶိုင်ႈၼႆႉ ၼမ်ႉၶိုၼ်ႈထိုင်ၵၢင် တၢင်း ၵႃးပေႃးဢမ်ႇၸၢင်ႈ ၵႂႃႇမႃးယဝ်ႉ။ မၼ်းပဵၼ်ယွၼ်ႉၾူၼ်မႃးသေ ၼမ်ႉတင်းၼိူဝ် ပွတ်းလွႆၼၼ်ႉ ၼွင်းၶႃႈၼႃႇ။ ၼႂ်းဝဵင်းတႄႉၵေႃႈ လႅတ်ႈမႆႈယူႇ”- ဝႃႈၼႆ။

တီႈဝဵင်းတႃႈၶီႈလဵၵ်းၼႆႉ ၼမ်ႉလုပ်ႇၼွင်းထူမ်ႈၼိုင်ႈပီ ဢမ်ႇယွမ်း 5 ပွၵ်ႈ တေႃႇထိုင်ယၢမ်းလဵဝ် ၵူၼ်းမိူင်းတိုၵ်ႉလႆႈထူပ်းၽေးၼမ်ႉၼႆႉထႅင်ႈယူႇ ယွၼ်ႉၼၼ် ၵူၼ်းမိူင်းၸိူဝ်းႁဵတ်းၵၢၼ် ပိုတ်ႇႁၢၼ်ႉၵႃႉၶၢႆ ၵမ်ႈၽွင်ႈ ယင်းဢမ်ႇၸၢင်ႈပိုတ်ႇႁၢၼ်ႉ တင်ႈတူဝ်ၶိုၼ်းၵေႃႈမီး။

ၵူၼ်းပိုတ်ႇႁၢၼ်ႉၶၢႆၵုၼ်ႇ တီႈဝဵင်းတႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “လႆႈဝႃႈယၢပ်ႇ ၸႂ်ႁႅင်းဢိူဝ်ႈ။ ပေႃးၼမ်ႉထူမ်ႈယဝ်ႉၼႆ လႆႈၵမ်းၵမ်းမႄးတႄႇမႂ်ႇၶိုၼ်း ႁဵတ်း ၼၼ်တိၵ်းတိၵ်းယဝ်ႉ။ လႆႈ မႄးတႄႇတိုၼ်းလၢင်းမၼ်းၶိုၼ်း ႁဵတ်းၼႆဢိူဝ်ႈ။ လွင်ႈယၢပ်ႇၸိူင်ႉၼႆ မဵဝ်းႁဝ်းၵူၼ်းၵႃႉၶၢႆၼႆႉ ပေႃးမီး ႁႅင်းငိုၼ်းၼမ်ၸင်ႇ တေၸၢင်ႈသိုပ်ႇပိုတ်ႇၶိုၼ်း ႁၢၼ်ႉ။ သင်ဝႃႈ ဢမ်ႇမီးငိုၼ်းၼမ်ၵေႃႈ ၵႃႈလႆႈပွႆႇသုမ်းပႅတ်ႈသေ လႆႈၶိုၼ်းသိုပ်ႇႁႃႁဵတ်းၵၢၼ် တၢင်ႇဢၼ်ၶိုၼ်းၼၼ်ႉယဝ်ႉ။ တီႈႁဝ်းၼႆႉ ၵႃႈၶၢတ်ႈႁၢၼ်ႉၶၢႆၵေႃႈ ၵႃႈႁႅင်းၼႃႇ။ ၵမ်ႈ ၼမ် သုမ်းတိုၼ်းလၢင်းသေပွႆႇပႅတ်ႈၵေႃႈမီးယဝ်ႉ”- ဝႃႈၼႆ။

ၼွၵ်ႈလိူဝ်တုမ်ႉတိူဝ်ႉၵၢၼ်ပၢႆးမၢၵ်ႈမီး ယွၼ်ႉၽေးၼမ်ႉၼႆႉယဝ်ႉ။ မိူဝ်ႈၽွင်းၼမ်ႉလုပ်ႇၼွင်းထူမ်ႈ ၼၼ်ႉ သမ်ႉပဵၼ်ၼမ်ႉဝူၺ်ႇႁင်ႈဝႆႉလႄႈ ၼႆႉၵေႃႈ လႆႈမႆႈၸႂ်တႃႇပၢႆးယူႇလီပႃးထႅင်ႈ။

“ၼမ်ႉထူမ်ႈမႃးယဝ်ႉၼႆၵေႃႈ ၼမ်ႉၼႆႉသမ်ႉလႅင်ဝႆႉၶႃႈၼေႈ။ လိူဝ်ၼၼ်ႉသမ်ႉ ပဵၼ်ၼမ်ႉၵူမ်ႇၼမ်ႉဢုင် သမ်ႉထွင်းမႃးပႃး တင်းၽုၼ်ႇတင်းလိၼ်လႅင်ထႅင်ႈၸိူင်ႉၼႆသေ ပေႃးမၼ်းလႆႈႁႅင်ႈမႃးသမ်ႉ ပဵၼ်ၵူမ်ႇပဵၼ်ငႂ်ႈၵိုတ်းဝႆႉ။ ၼမ်ႉၼႆႉ မၼ်းဢမ်ႇသႅၼ်ႈသႂ်သေဢိတ်း မိူဝ်ႈပူၼ်ႉမႃးၼၼ်ႉၵေႃႈ ၾင်ႇထႆးၶဝ် ၵူတ်ႇထတ်းၸႅတ်ႈတူၺ်းသေ ႁၼ်ဝႃႈၼမ်ႉၼႆႉမီးၵွင်ႉဝႆႉ မၼ်းၸၢင်ႈတူမ်ႉတိူဝ်ႉပၢႆးယူႇလီၵူၼ်းမိူင်း ၼႆဢိူဝ်ႈ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

ၼႂ်းပီ 2025 ၼႆႉၵူၺ်း တီႈဝဵင်းတႃႈၶီႈလဵၵ်းၼႆႉ ထူပ်းၽေးၼမ်ႉထူမ်ႈ မိူဝ်ႈႁၢင်လိူၼ်ဢေႊပရိူဝ်ႊ ၼိုင်ႈပွၵ်ႈ၊ မိူဝ်ႈလိူၼ်မေႊၼၼ်ႉသမ်ႉ သွင်ပွၵ်ႈယဝ်ႉ။

ၼႂ်းႁူဝ်လိူၼ်ၵျူႊလၢႆႊၼႆႉၵူၺ်း ၼွၵ်ႈလိူဝ်တီႈဝဵင်းတႃႈၶီႈလဵၵ်းယဝ်ႉ ၼႂ်းမိူင်းတႆးပွတ်းႁွင်ႇ တီႈဝဵင်းပၢင်ႇသၢႆးတင်း ဝဵင်းလၢဝ်ႇၵၢႆးၼၼ်ႉၵေႃႈ ၼမ်ႉထူမ်ႈမိူၼ်ၵၼ် ၼႂ်းဝဵင်းလၢဝ်ႇၵၢႆးၼၼ်ႉ မီးၵူၼ်းလူႉတၢႆၸွမ်း 3 ၵေႃႉ ၼႆယဝ်ႉ။