ၸုမ်းၾၢႆႇၵူတ်ႇထတ်းလဵပ်ႈႁဵၼ်း လွတ်ႈလႅဝ်း ၵဵဝ်ႇၵပ်းမိူင်းမၢၼ်ႈ IIMM ပိုၼ်ၽၢဝ်ႇ ၼႂ်းဝၼ်းတီႈ 13 လိူၼ်ၼႆႉဝႃႈ ဢၼ်တပ်ႉသိုၵ်းမၢၼ်ႈ တဵၵ်းငႅၼ်းႁဵတ်းႁၢႆႉတေႃႇၵူၼ်းမိူင်း၊ သိုၵ်းမၢၼ်ႈ ပဵၼ်မူႇပဵၼ်ၸုမ်း ၵၼ်ႉၸၼ်လူလၢႆတေႃႇ ၼၢင်းယိင်းလႄႈ ႁဵတ်းႁၢႆႉတေႃႇလုၵ်ႈဢွၼ်ႇ ႁူမ်ႈပႃး လွင်ႈပူၼ်ႉပႅၼ်ၼိူဝ်ၵူၼ်းၶိူဝ်း ၸိူဝ်းၼႆႉ ပဵၼ်လွင်ႈပူၼ်ႉပႅၼ် ၵၢၼ်သိုၵ်းယဝ်ႉ ဝႃႈၼႆ။
လွင်ႈသိုၵ်းမၢၼ်ႈ ႁဵတ်းႁၢႆႉမိူၵ်ႈမႂ်ႈ တေႃႇၵူၼ်းမိူင်းၼၼ်ႉ မီးဝႆႉလၵ်းထၢၼ် တင်းၼမ်ယဝ်ႉ။ သိုၵ်းမၢၼ်ႈၼႆႉ မီးယိူင်း ဢၢၼ်း တင်ႈၸႂ်ၶႂ်ႈႁႂ်ႈၵူၼ်းမိူင်းၵူဝ်ႁႄသေ ႁဵတ်းႁၢႆႉတေႃႇၵူၼ်းမိူင်းမႃး၊ ၵူၼ်းမိူင်းၼပ်ႉႁူဝ်ႁဵင် ၺႃးတီႉၺွပ်း ၼႂ်း ၼၼ်ႉ ၵမ်ႈၼမ် ၺႃးႁဵတ်းႁၢႆႉပေႉၵိၼ် ဢမ်ႇၼၼ် ၵူၼ်းမိူင်း ၸိူဝ်းၺႃးၶင်ၶွၵ်ႈဝႆႉၼၼ်ႉ ဢမ်ႇလႆႈသုၼ်ႇတဵမ်ထူၼ်ႈ သေ လူႉတၢႆၵႂႃႇ ဝႃႈၼႆ။
ၸွမ်းၼင်ႇ IIMM ၵဵပ်းၶေႃႈမုလ်းဝႆႉ တႄႇႁၢင်လိူၼ်ၵျူႊလၢႆႊ ပီၵၢႆ တေႃႇထိုင် လိူၼ်ၵျုၼ်ႊသဵင်ႈ ပီ 2024 ၶၢဝ်းတၢင်း ၼိုင်ႈပီၼႆႉ လွင်ႈႁဵတ်းႁၢႆႉမိူၵ်ႈမႂ်ႈတေႃႇၵူၼ်းမိူင်း တိူဝ်းပဵၼ်မႃးလိူဝ်ၵူႈပွၵ်ႈၼႆ ပိုၼ်ၽၢဝ်ႇပႃးဝႆႉၼင်ႇၼႆ။
လိူဝ်ၼၼ်ႉ ယွၼ်ႉပၢင်တိုၵ်းတင်း ပတိၵ်ႈၶၢတ်ႈ ပဵၼ်ၼႂ်းမိူင်းမၢၼ်ႈပတ်းပိုၼ်ႉသေ ၶၢဝ်းတၢင်း 6 လိူၼ်ၼႆႉၵူၺ်း ၵူၼ်းမိူင်း ၸိူဝ်းပွႆႇၽႃႈႁိူၼ်းယေးငိူင်ႉပၢႆႈ မီးဝႆႉ 3 လၢၼ်ႉပၢႆ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။
