မိူဝ်ႈဝႃႈ ဝၼ်းတီႈ 13/08/2024 ယၢမ်းႁူဝ်ၶမ်ႈ 4 မူင်းၼၼ်ႉ သိုၵ်းၵဝ်ႈၵၢင်ႉ ႁႅၼ်းသိုၵ်း လေႃႇတိုၵ်းတပ်ႉ သိုၵ်းမၢၼ်ႈ တပ်ႉၵွင် 147 ဢၼ်ပၵ်းဝႆႉတီႈ ဢိူင်ႇၼွင်ၵေႃႈလူင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ သိုၵ်းၵဝ်ႈၵၢင်ႉ ယိုတ်းလႆႈ တပ်ႉသိုၵ်းမၢၼ်ႈ။

ၽူႈၸမ်ၸႂ် တင်းၸုမ်းယိပ်းၵွင်ႈၵၢင်ႇ လၢတ်ႈၽူႈတွႆႇႁွၵ်ႈဝႃႈ-“သိုၵ်းၵဝ်ႈၵၢင်ႉ ယိုတ်းလႆႈတပ်ႉ မၢၼ်ႈထႅင်ႈယဝ်ႉ။ တပ်ႉသိုၵ်း ဢၼ်မီးၼိူဝ်လွႆ တီႈၼွင်ၵေႃႈလူင်ၼႆႉ ယိုတ်းလႆႈ မိူဝ်ႈဝႃႈ ႁူဝ်ၶမ်ႈ 4 မူင်း”- ဝႃႈၼႆ။

သိုၵ်းၵဝ်ႈၵၢင်ႉ လေႃႇတိုၵ်းတပ်ႉသိုၵ်းမၢၼ်ႈ ၶမယ ဢၼ်ပၵ်းတပ်ႉ ဝႆႉတီႈဢိူင်ႇၼွင်ၵေႃႈလူင်ၼၼ်ႉ တႄႇလိူၼ်ၵျူႊလၢႆႊ ဝၼ်းတီႈ 26 ၼၼ်ႉမႃး ပၢင်တိုၵ်း ပဵၼ်ႁၢဝ်ႈႁႅင်းဝႆႉ ဝႃႈၼႆ။

တပ်ႉသိုၵ်းမၢၼ်ႈ 147 ဝၢၼ်ႈၼွင်ၵေႃႈလူင် ဢၼ်သိုၵ်းၵဝ်ႈၵၢင်ႉ MNDAA ယိုတ်းလႆႈၼႆႉ ပဵၼ်ၼႃႈတီႈ သိုၵ်း SSPP/ SSA ၵုမ်းၵမ်ဝႆႉ – ၵူၼ်းပိုၼ်ႉတီႈလၢတ်ႈၼင်ႇၼႆ။

တႄႇလိူၼ်ဢေႃႊၵတ်ႊသ် ဝၼ်းတီႈ 10 ၼႆႉမႃး သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA လႄႈ ၸုမ်း PDF ယိုဝ်းၵၼ် ၼႂ်းပိုၼ်ႉတီႈၼႆႉ ၼႂ်းၶၢဝ်းတၢင်းၽၢၵ်ႇလိူၼ် မႃးၼႆႉ သိုၵ်းမၢၼ်ႈ ဢဝ်မၢၵ်ႇလူင် မႃး ပွႆႇသႂ်ႇ တိူဝ်ႉၵူၼ်းပိုၼ်ႉတီႈ တၢႆမၢတ်ႇ မီး 20 ၵေႃႉယဝ်ႉ ဝႃႈၼႆ။

ယၢမ်းလဵဝ်ၵေႃႈ သိုၵ်းမၢၼ်ႈ ဢၼ်ပၵ်းတပ်ႉဝႆႉတီႈ ဝဵင်းၼမ်ႉလၼ်ႈ ၼၼ်ႉၵေႃႈ လၢမ်းလိမ်းယိုဝ်းၵွင်ႈလူင် မုင်ႈၸူးဝဵင်းသီႇပေႃႉ။ ၵူၼ်းပိုၼ်ႉတီႈ ပဵၼ်ဢၼ်မႆႈၸႂ် တႃႇလွင်ႈႁူမ်ႇလူမ်ႈ ဝႃႈၼႆ။

ဢိင်ၼိူဝ် လွင်ႈပၢင်တိုၵ်း တီႈဢိူင်ႇၼွင်ၵေႃႈၼႆႉသေ ႁဵတ်းႁႂ်ႈၵူၼ်းမိူင်း ဢွၼ်ၵၼ်ပၢႆႈၽေးသိုၵ်း ႁွတ်ႈထိုင် မိူင်းယႆ၊ ၼမ်ႉလၼ်ႈဝႆႉ။ ဢိူင်ႇၼွင်ၵေႃႈၼႆႉ ယၢၼ်ၵၼ်တင်းဝဵင်းသီႇပေႃႉ 14 လၵ်းလႄႈ ဝဵင်းၼမ်ႉလၼ်ႈ 24 လၵ်း။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ၾိုၵ်းၵၢၼ်)