လုၵ်ႈၸုမ်းပျီႇတူႉၸိတ်ႉ လူင်ထၢင် ဢၼ်ၵႂႃႇဢဝ်ႁူမ်ႇလူမ်ႈပၼ် တီႈႁိူၼ်းလၢဝ်းပၢၼ်း (ၽူႈမၢၵ်ႈမီး)  လင်ၼိုင်ႈ တီႈဝဵင်းမူႇၸေႊၼၼ်ႉ ယိုဝ်းၶိုၼ်းလၢဝ်းပၢၼ်းတၢႆသေ ဢဝ်ငိုၼ်းပၢႆႈ။

ဝၼ်းတီႈ 12/08/2024 လုၵ်ႈၸုမ်း ပျီႇတူႉၸိတ်ႉ လူင်ထၢင် 3 ၵေႃႉ ဢၼ်ၵိၼ်ၸၢင်ႈ ၵႂႃႇပႂ်ႉဢဝ်ႁူမ်ႇလူမ်ႈ ပၼ်တီႈ ႁိူၼ်းလၢဝ်းပၢၼ်း လင်ၼိုင်ႈ တီႈပွၵ်ႉႁူဝ်ၼႃး ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇၼၼ်ႉ ယွၼ်ႉ ႁၼ်ငိုၼ်းၼမ်သေ ထိင်းၸႂ်ဢမ်ႇလႆႈလႄႈ ယိုဝ်းၶိုၼ်းလၢဝ်းပၢၼ်းတၢႆယဝ်ႉ ဢဝ်ငိုၼ်း မၢၼ်ႈ 6,000 သႅၼ်ပျႃးပၢႆ ပၢႆႈလွတ်ႈၵႂႃႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်လုၵ်ႈၸုမ်းပျီႇတူႉၸိတ်ႉ လူင်ထၢင် မႃးဢဝ်ႁူမ်ႇလူမ်ႈပၼ် တီႈႁိူၼ်းၼၼ်ႉ။ တီႈႁိူၼ်းၼၼ်ႉသမ်ႉ ပဵၼ်ၵူၼ်းမီးငိုၼ်း လၢဝ်းပၢၼ်းလႄႈ ၶဝ်ဢဝ်ငိုၼ်းၶႄႇ 800,000 ယႂၼ်ႊပၢႆ ၵႂႃႇလႅၵ်ႈငိုၼ်းမၢၼ်ႈမႃးဝႆႉ လႆႈ 6,000 သႅၼ်ပျႃးပၢႆသေ ၵွပ်ႈၼႆလႄႈ ၵူၼ်းဢၼ်မႃးဢဝ်ႁူမ်ႇလူမ်ႈပၼ်လၢဝ်းပၢၼ်း 3 ၵေႃႉၼၼ်ႉ ႁၼ်ယဝ်ႉ ထိမ်းၸႂ်ဢမ်ႇလႆႈလႄႈ လၼ်ႇသူၼ်ႈၵွင်ႈ ယိုဝ်းလၢဝ်းပၢၼ်း တီႈႁိူၼ်း ၼၼ်ႉတၢႆသေ ဢဝ်ငိုၼ်းတင်းမူတ်း ပၢႆႈဢွၵ်ႇၵႂႃႇၶႃႈဢေႃႈ”- ဝႃႈၼႆ။

လုၵ်ႈၸုမ်းပျီႇတူႉၸိတ်ႉ လူင်ထၢင် 3 ၵေႃႉ ဢၼ်ဢဝ်ငိုၼ်းပၢႆႈၵႂႃႇၼၼ်ႉ ယၢမ်းလဵဝ် ႁၢႆတူဝ်ဝႆႉ။ ယဝ်ႉၵေႃႈ ၽူႈမၢၵ်ႈမီး (လၢဝ်းပၢၼ်း) သၢမ်ၵေႃႉ ဢၼ်ၺႃးယိုဝ်းတၢႆ တီႈႁိူၼ်းၼၼ်ႉ ပဵၼ်ၸၢႆး 2 ၵေႃႉလႄႈ ယိင်း 1 ၵေႃႉ။ ၵူၺ်းၵႃႈ ၶဝ်သၢမ်ၵေႃႉၼႆႉ ႁဵတ်းၵၢၼ်သင်တႄႉတႄႉ ဢၼ်ဝႃႈၼၼ်ႉ ပႆႇလႆႈႁူႉၸွမ်း လွင်ႈတၢင်းမၼ်း – ၵူၼ်းပိုၼ်ႉတီႈလၢတ်ႈ။

တီႈဝဵင်းမူႇၸေႊၼႆႉ ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ၶၢဝ်းတၢင်း 3 ပီပၢႆၼႆႉ မီးၵူၼ်းၵေႃႇၵၢၼ်ႁၢႆႉ လိူင်ႇၼမ်မႃး။ ၵွပ်ႈၼႆလႄႈ မိူၼ်ၼင်ႇ ၵူၼ်းႁဵတ်းၵၢၼ်ပၢႆးမၢၵ်ႈမီး၊ ၵူၼ်းၶၢႆႁၢၼ်ႉ၊ ၵူၼ်းလႅၵ်ႈငိုၼ်း၊ ၽူႈမၢၵ်ႈမီး ၸၢဝ်းၶႄႇ ၸိူဝ်းၼႆႉ ၵႆႉၺႃးၸုမ်းဢမ်ႇႁူႉၾၢႆႇ ၶဝ်ႈတီႉၺွပ်း ဢဝ်ၵႂႃႇပဵၼ်တူဝ်ယိူဝ်ႇ (ပြန်ပေးဆွဲ) မႃးၶိူဝ်းယႂ်းလႄႈ ယွၼ်ႉၼၼ် လၢဝ်းပၢၼ်း ၸိူဝ်းၼႆႉ ၵမ်ႈၼမ် တေၸၢင်ႈၸုမ်းပျီႇတူႉၸိတ်ႉ ၸိူဝ်းၼႆႉသေ မႃးပႂ်ႉဢဝ်ႁူမ်ႇလူမ်ႈပၼ် – ၵူၼ်းမူႇၸေႊလၢတ်ႈ။