ၾူၼ်တူၵ်းႁႅင်း ၼမ်ႉႁူၺ်ႈ ၼမ်ႉလွႆလူၼ်ႉၾင်ႇ ၼွင်းထူမ်ႈ တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ၼႂ်းၽၢၵ်ႇလိူၼ် ၵူၺ်းမီး 2 ၵမ်းယဝ်ႉ တုမ်ႉတိူဝ်ႉၶူဝ်းၶွင်ၵူၼ်းမိူင်း ႁူင်းႁဵၼ်းၸၼ်ႉသုင် တီႈပွၵ်ႉသၼ်သၢႆးလိုဝ်ႉၵေႃႈ လႆႈဢိုတ်းဝႆႉ ၸူဝ်ႈၶၢဝ်း ဝႃႈၼႆ။
မိူဝ်ႈၼႆႉ ဝၼ်းတီႈ 14/08/2024 ၼမ်ႉသၢႆ ၵိုင်ႉၵၢင်ႉၼွင်းၶိုၼ်ႈႁႅင်းသေ လူၼ်ႉထူမ်ႈ ၶဝ်ႈၼႂ်းပွၵ်ႉသၼ်သၢႆး ၊ ပွၵ်ႉတႃႈလေႃႉ ၊ မၢၵ်ႇၵႃႇႁူဝ်ၶမ်း ၸိူဝ်းၼႆႉ တီႈလိုၵ်ႉသုတ်း မီးမွၵ်ႈ 5 ထတ်း/ ပေႇ ဝႃႈၼႆ။
ၵူၼ်းတႃႈၶီႈလဵၵ်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၼမ်ႉၼႆႉတႄႉ တႄႇၶိုၼ်ႈမိူဝ်ႈဝႃးဢေႃႈ။ ၵူၺ်းဢမ်ႇ ၶိုၼ်ႈႁႅင်းပဵင်းၼႂ်ၼႆႉ။ ပေႃးၼမ်ႉထူမ်ႈတႄႉ ၵူၼ်းၵၢတ်ႇတႃႈလေႃႉၶဝ် လႆႈၼႅတ်ႈၶၢႆႉၶူဝ်းပၢႆႈ။ ပေႃးၼမ်ႉ လူင်းၶိုၼ်းသမ်ႉ လႆႈလၢင်ႉၽဵဝ်ႈၶီႈၵူမ်ႇ ႁဵတ်းလွင်ႈမူတ်းသႂ်ထႅင်ႈ လႆႈယၢပ်ႇၸွမ်းၼႃႇ။ လၢၼ်ႉၶူဝ်းၶွင် ဢၼ်လႆႈၺႃးၼမ်ႉထူမ်ႈၼၼ်ႉၵေႃႈ မီးလွင်ႈလူႉသုမ်းၼမ်”- ဝႃႈၼႆ။
ယွၼ်ႉၼမ်ႉထူမ်ႈလႄႈ ၵူၼ်းၸိူဝ်းၶၢတ်ႈႁွင်ႈ ယူႇသဝ်းဝႆႉတီႈတႅမ်ႇတီႈယၢၼ်း ၼႂ်းပွၵ်ႉသၼ်သၢႆး(ၵ) (သၼ်သၢႆးလိုဝ်ႉ) ၸိူဝ်းၼၼ်ႉၵေႃႈ လႆႈၶၢႆႉတီႈယူႇ။ ႁူင်းႁဵၼ်းၸၼ်ႉသုင် သၼ်သၢႆးလိုဝ်ႉၵေႃႈ လႆႈၵိုတ်းလိုဝ်ႈဢိုတ်းဝႆႉ ၸူဝ်ႈၶၢဝ်း ဝႃႈ ၼႆ။
ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “ပေႃးၼမ်ႉထူမ်ႈၵေႃႈ ပဵၼ်ဢၼ် ယၢပ်ႇၸႂ်ၽႂ်မၼ်း ၼမ်ႉၵႆႉထူမ်ႈၼႃႇလႄႈ ပေႃးၾူၼ်တူၵ်းထပ်းၵၼ် 2-3 ဝၼ်း ၵမ်ႈၽွင်ႈသမ်ႉ ပေႃးၶၢႆႉၶူဝ်းဝႆႉထႃႈယဝ်ႉ”- ဝႃႈၼႆ။
မိူဝ်ႈၽွင်း ႁူဝ်လိူၼ်ဢေႃႊၵတ်ႊသ် ဝၼ်းတီႈ 05/08/2024 ၼႆႉၵေႃႈ ၼမ်ႉသၢႆၼွင်းထူမ်ႈဝဵင်းယဝ်ႉ ၵမ်းၼိုင်ႈ။ ဝၢႆးလင် ၼမ်ႉယွမ်းလူင်း ၵူၼ်းၼႂ်းပိုၼ်ႉတီႈ ႁဵတ်းလွင်ႈမူတ်းသႂ် ၶီႈၵူမ်ႇၶီႈငႂ်ႈယဝ်ႉ ပႆႇႁိုင်သင် ၼမ်ႉပေႃးၼွင်းထူမ်ႈထႅင်ႈ ၵမ်း ၼိုင်ႈယဝ်ႉ ဝႃႈၼႆ။
ၼမ်ႉသၢႆ ၼွင်းထူမ်း ပွၵ်ႈၼႆႉ ဢမ်ႇၸႂ်ႈပဵၼ်ပွၵ်ႈႁႅၵ်ႈ ပေႃးထိုင်ၶၢဝ်းႁိုဝ်ႉၶၢဝ်းၾူၼ် ၼမ်ႉသၢႆၼွင်းထူမ်ႈ ၵူႈပီ။ ယွၼ်ႉႁွင်ႈၼမ်ႉသၢႆ ၵႅပ်ႈတိုၼ်ႈၵေႃႈ ပိူင်ၼိုင်ႈ၊ ယုၵ်းယၢၵ်း ၵိုတ်းၶၢင်ႉၶမ်ၵေႃႈ ပိူင်ၼိုင်ႈ။
လွင်ႈၼႆႉ ၼႂ်းပၢင်ၵုမ်ၶွမ်ႊမတီႊလႅၼ်လိၼ်ထႆး – မၢၼ်ႈ ဢဝ်ဢုပ်ႇၼႂ်းပၢင်ၵုမ်ၶဝ်ၵူႈပွၵ်ႈၵူႈၵမ်းယူႇၵေႃႈ တင်းသွင်ၸိုင်ႈမိူင်း ဢမ်ႇပႆႇၵႄႈလိတ်ႈပၼ်ၵူၼ်းမိူင်းပိုၼ်ႉတီႈလႆႈ – ၵူၼ်းမိူင်းတႃႈၶီႈလဵၵ်း လၢတ်ႈၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇ ၾိုၵ်းၵၢၼ်)
